Friday 25 June 2021

    Reflection for the 13th Sunday in Ordinary Time (27/06/2021) By Fr. Suhas Pereira



सामान्य काळातील तेरावा रविवार 


दिनांक: २७/०६/२०२१

पहिले वाचन ज्ञानग्रंथ :- १:१३-१५; २:२३-२४

दुसरे वाचन - कारीथकरांस दुसरे पत्र :- ८:७.९.१३-१५

शुभवर्तमान - मार्क :- ५:२१-४३

प्रस्तावना

          प्रिय बंधू आणि भगिनींनो, कोरोना महामारी आपल्याला सुरक्षित शारीरिक अंतर ठेवण्यास, गर्दीच्या ठिकाणी जाणे टाळण्यास आणि इतरांची शारीरिक उपस्थिती टाळण्यास भाग पाडत  आहे. शोकांतिका अशी कि, इतकी खबरदारी घेऊनसुद्धा या प्राणघातक कोरोना विषाणूने आपल्या शरीरामध्ये घर केलेलं आहे का, हे आपल्याला माहित पडत नाही. आपल्या संपर्कात येणाऱ्या कोणत्याच व्यक्तीला या रोगाच्या संसर्गाच्या धोक्यात आणण्याची/ कोणत्याच व्यक्तीला कोरोनाच्या जीवघेण्या संकटात ढकलण्याची आपली इच्छा नाही. दुसऱ्यांच्या सुरक्षिततेच्या खबरदारीचा हा विचार खुद्द आपल्या स्वतःच्या जीवनाला असलेला धोका आणि आपल्या विवशतेचं किंव्हा असहाय्यतेचंसुद्धा चिन्ह आहे.

          करिंथिकरांस पाठवलेल्या दुसऱ्या पत्रात संत पौल म्हणतो कि, "परमेश्वराचे सामर्थ्य हे मानवी दुर्बलतेमध्ये पूर्णत्वास येते"(१२: ९). परमेश्वर हा जीवंताचा देव आहे. तो मरणाचा किंव्हा मृत्यूचा देव नाही. त्याने सर्व सृष्टीला जीवन दिलेलं आहे, मरण नाही. जिवंताच्या मरणात किंवा नाशात त्याला आनंद वाटत नाही.  म्हणूनच "अधोलोकाची सत्ता पृथ्वीवर नाही", असे आपण शल्मोनाच्या ज्ञानग्रंथातून घेतलेल्या आजच्या पहिल्या वाचनात ऐकतो. आजच्या शुभवर्तमानामध्ये प्रभू येशूने आपल्या गुणकारी आणि पवित्र स्पर्शाने याईरच्या कन्येला बरे केल्याचा आणि त्याचप्रमाणे  बारा वर्ष रक्तस्रावाने पिडलेल्या महिलेला बरे केल्याबद्दलचा वृत्तांत संत मार्क आपल्याला सांगत आहे. रक्तस्रावाने पिडलेल्या महिलेने आणि याईर आणि त्याच्या कन्येने येशू-ख्रिस्ताप्रति जी श्रद्धा दाखवली तशाच श्रद्धेने आपण येशू आपला बंधू आणि प्रभू ह्याकडे वळूया. कारण त्याच्यामध्ये आपल्याला आपल्या सर्व शारीरिक आणि मानसिक दुर्बलता आणि आजारांतून मुक्त करण्याचे सामर्थ्य आहे. तोच आपला खरा वैद्य आहे.

मनन-चिंतन

          मुखावाटे निघालेला चांगला शब्द एखाद्याच्या हृदयाला, आत्म्याला स्पर्श करून जातो, नैराश्याचे रूपांतर नव्या उमेदीत करून जातो. एक सौम्य हस्तांदोलन, एखादा कोमल स्पर्श शारीरिक आणि मानसिक व्यथा कमी करू शकतात. प्रभू येशूने आपल्या चांगल्या वक्तव्याद्वारे आणि शुभ-वृत्ताद्वारे लोकांना जगण्याची नवीन आशा आणि उमेद दिली. प्रभूचे शब्द हे जीवनाचे शब्द होते, चांगले, शुभ शब्द होते. या शुभ शब्दांच्या सामर्थ्यानेच प्रभूने लोकांना बरे केले, त्यांच्या व्याधींतून त्यांना मुक्त केले. "सर्व समुदायांची त्याला स्पर्श करण्याची धडपड चालू होती, कारण त्याच्यातून सामर्थ्य निघून ते सर्वांस निरोगी करीत होते" (लूक ६, १९).  "तेव्हा त्यांचे स्वागत करून तो त्यांच्याबरोबर देवाच्या राज्याविषयी बोलत होता, आणि ज्यांना बरे होण्याची जरुरी होती, त्यांना तो बरे करीत होता" (लूक ९, ११).

          परंतु प्रत्येक वेळेला येशूने लोकांना निरोगी केले नाही. त्याच्या प्रत्येक प्रबोधनानंतर त्याने आपल्या सामर्थ्याने लोकांना बरे केले नाही. किंबहुना तो बरे करू शकला नाही. का बरे? जेथे संशयवाद आणि अविश्वास असतो तेथे दैवी चमत्कार कसे होऊ शकतील? प्रभू येशूच्या काळातील अनेक लोकांचीसुद्धा तीच परिस्थिती होती. येशूचे चमत्कार आणि त्याचे सामर्थ्य पाहून, त्याचा बोध ऐकून सर्व लोकं थक्क आणि चकित होत होती. परंतु तरीसुद्धा त्यांतील अनेकांनी त्याच्यावर अविश्वास दाखवला, ज्या गोष्टीचं प्रभू येशूलासुद्धा आश्चर्य वाटलं. म्हणूनच थोड्याशाच रोग्यांवर हात ठेवून त्याने त्यांना बरे केले" (मार्क ६, ५). 

          जेथे जागतिक ऐश्वर्य, स्वार्थ आणि मोह ठाण मांडून बसलेलं असते, तेथे दैवी रोगनिवारक सामर्थ्य आपला प्रभाव दाखवू शकत नाही. परंतु परमेश्वराचं रोगनिवारक सामर्थ्य अशा ठिकाणी प्रभावशाली ठरते जेथे मानवी जीवन फक्त आणि फक्त आशेच्या जोरावर आणि बळावर अस्तित्वात असतं आणि जेथे जीवनाकडून इतर काहीच अपेक्षा नसतात. रक्तस्त्रावाने पिडलेल्या स्त्रीचीसुद्धा तशीच परिस्थिती होती. तिच्या व्याधीमुळे तिच्या शरीराची पार जणू चिंधी झालेली. तिने रोगमुक्त होण्यासाठी आपल्याजवळ होते नव्हते ते सर्व खर्चून टाकले होते, तरी तिला गुण न येतां तिचा रोग बळावला होता. कदाचित ती स्त्री श्रीमंत होती. परंतु त्या श्रीमंतीने तिला काय दिलेतिची श्रीमंती, तिचा पैसा-अडका तिला तिच्या रोगातून आणि तिच्या पीडेतून  मुक्त करू शकला नाही. निस्तेज मृत्य हाच आता तिचा अखंड सांगाती बनला होता. ती स्त्री जणूकाही एक जिवंत प्रेत बनली होती.

          हताश हृदयाने, आणि त्याचबरोबर मिणमिणत्या परंतु जिवंत असलेल्या आशेच्या ज्योतीच्या बळावर, ती पीडित स्त्री येशूच्या लक्षातसुद्धा येणार नाही अशी हळूच आणि कोणत्याही मागणीशिवाय किंव्हा दाव्याशिवाय येशूकडे अली. तिला गाजावाजा करावयाचा नव्हता. दैवी सामर्थ्य जे गुप्तपणे आणि डोळ्यांना न दिसता आपले कार्य सिद्धीस नेते आणि जे सामर्थ्य देवपुरुष प्रभू येशू ख्रिस्तामध्ये दृश्यमान होते, त्या दैवी सामर्थ्यावर तिचा विश्वास होता. ते सामर्थ्य खुद्द प्रभू ख्रिस्ताच्यासुद्धा एकदा लक्षात येणार नव्हते.  ती स्त्री येशूच्या मागे येऊन त्याच्या कपड्याला शिवली. आणि त्या क्षणाला त्या ठिकाणी दैवी सामर्थ्य त्या स्त्रीच्या मानवी अशक्तपणात पूर्णत्वास आले (२ करिंथ १२, ९).  तिच्या आजारपणामुळे त्या स्त्रीला वाळीत टाकण्यात आलेलं होतं आणि तिच्याकडे कोणी ढुंकूनसुद्धा पाहत नव्हतं. परंतु तिने येशूच्या कपड्यांना स्पर्श केल्यानंतर जेव्हा येशू तिच्याकडे वळला तेव्हा संपुर्ण जमावाच्या नजरा त्या स्त्रीकडे वळल्या आणि त्या स्त्रीच्या उपस्थितीला अचानक महत्व प्राप्त झाले.

          या घटनेवेळी दैवी कृपेच्या सामर्थ्याची आग नेहेमीप्रमाणे प्रभू येशूने स्पर्श केल्याने आरक्त झाली नाही. शुभवर्तमानांत आपण अनेक वेळा वाचतो किंव्हा ऐकतो कि, येशूने आपल्या हाताच्या स्पर्शाने लोकांना बरे केले, निरोगी केले. परंतुआज त्या ठिकाणी झालेल्या चमत्काराचं माध्यम प्रभू येशूने त्या स्त्रीला केलेला स्पर्श नव्हता तर परमेश्वरी कृपेस आणि दयेस आपण पात्र नाहीत, अशी भावना हृदयी ठेवून त्या पीडित स्त्रीने प्रभू येशूच्या वस्त्राच्या फक्त कडेला केलेला घुटमळणारा स्पर्श. तिच्या विश्वासाने तिला बरे केले.

        त्यानंतरच्या घटनेतसुद्धा दैवी सामर्थ्य मानवी अशक्तपणात पूर्णत्वास येण्याची प्रचिती आपल्याला होते. याईरची कन्या आजारी होती. परंतु येशू याईरच्या घरी जाईपर्यंत उशीर झाला आणि तिचा मृत्यू झाला. परंतु येशू तरीसुद्धा याईरच्या घरी गेला. त्याच्या घरी जमलेला आणि रडणारा आणि आकांत करणारा लोकांचा समुदाय आणि त्याचबरोबर येशूला हसणारे सर्वजण बाहेरच राहिले. येशू फक्त मुलीचे आई-बाप आणि आपल्या तीन शिष्यांना घेऊन त्या मृत मुलीकडे आतमध्ये गेला आणि दरवाजा बंद केला. परंतु रक्तस्रावाने पीडित असलेल्या महिलेप्रमाणे हि मृत मुलगी मात्र येशूला स्वतःहून स्पर्श करू शकत नव्हती. तिच्यामध्ये जीवनाचं कोणतच चिन्ह नव्हतं. अशा परिस्थितीत येशू त्या मृत मुलीचा हात धरून म्हणला: "तालिथा कूम", म्हणजेच, "मुली, मी तुला सांगतो, उठ"(मार्क ५, ४१).  आणि ती मुलगी जीवंत झाली, आणि उठून चालू लागली.

          आजची उपासना आपल्याला एक महत्वाचा संदेश देत आहे, कि, परमेश्वराची कृपा, जी मानवी अशक्तपणात, दुर्बलतेमध्ये पूर्णत्वास येते आणि कार्यसिद्ध होते, ती कृपा आपल्या चांगल्या शब्दांद्वारे आणि कृत्यांद्वारे कार्यान्वित करण्यासाठी आपल्याला या जगात पाठवण्यात आलेलं आहे. आपण हि जबाबदारी एकनिष्ठेने आणि सातत्याने पार पाडावी म्हणून त्याच परमेश्वराचा आशीर्वाद मागू या.

विश्वासू लोकांच्या प्रार्थना

हे रहस्यमय परमेश्वरा, आमच्या डोळ्यांनी आम्ही तुला पाहू शकत नाहीत. म्हणूनच तुझी या जगातील सक्रियता आमच्यापासून लपलेली राहते. परंतु श्रद्धेच्या डोळ्यांनी आम्ही सृष्टीच्या सुंदरतेमध्ये, माणसाच्या चांगुलपणामध्ये आणि खास करून दुःखी, कष्टी लोकांमध्ये तुझे रूप पाहू शकतो. तुजवरील विश्वासात आम्ही आमच्या विनंत्या आणि गरजा तुझ्या चरणी अर्पण करतो.

आपले उत्तर: हे प्रभू आमची प्रार्थना ऐक.

१) तुझ्या पवित्र आत्म्याला आमच्या पवित्र ख्रिस्तसभेचे नूतनीकरण करावयाचे आहे. परंतु अनेक वेळा  आम्हीच त्या नूतनीकरणाला विरोध करून त्याच्यात अडथळे निर्माण करण्याचा प्रयत्न करतो. हे परमेश्वरा, बदलत्या वेळेची आणि काळाची चिन्हे आणि गरज ओळखून त्याप्रमाणे आमच्यातसुद्धा बदल घडवून आणण्यासाठी आम्हाला विश्वासू आणि धाडशी हृदय दे.

२) संपूर्ण मानवजातीला आजाराने पछाडलेले आहे. आज मानव स्वार्थी, मतलबी जीवन जगत आहे. त्यामुळे निसर्ग प्रतिकार करत आहे आणि वेगवेगळ्या नैसर्गिक आपत्तींद्वारे मानवाशी संघर्ष करत आहे.  परमेश्वरा तू आमच्या जीवनावर आणि हृदयावर राज्य करतोस. आम्हाला निसर्गाचा मान आणि काळजी राखण्यास, निसर्गाचे संगोपन आणि संवर्धन करण्यास शिकव.

३) पर्यावरणाच्या होणाऱ्या नाशामुळे जागतिक शांतीसुद्धा ऱ्हास पावत आहे. तू या जगाच्या सुरुवातीला आम्हाला दिलेले शांतीचे दान आम्ही हरवून बसलेलो आहोत. हे परमेश्वरा तुझ्या ख्रिस्तसभेला तू शांतीचं वाहन बनाव आणि तुझी शांती आमच्या हृदयात आणि आमच्या जीवनात वाढीस लागू दे.

४) आमच्या सर्व आजारी बंधू-भगिनींवर दया कर आणि त्यांना तुझ्या कृपेच्या स्पर्शाने बरं कर.

५) या कोरोना महामारीच्या काळात मृत्युरूपी राक्षस जगामध्ये आणि खास करून आमच्या देशात भयंकर आणि भयावह असे मनुष्यरूपी पीक घेत आहे. परंतु आमच्या मृत्युद्वारे आम्ही तुझ्याबरोबर अनंतकाळच्या जीवनात असू असा आमचा विश्वास आहे. या महामारीच्या काळात हे जग सोडून गेलेल्या आमच्या सर्व बंधू-भगिनींवर दया कर आणि त्यांना तुझ्या स्वर्गराज्यात चिरंतन शांती दे.


Friday 18 June 2021

   Reflection for the 12th Sunday in Ordinary Time (20/06/2021) By Fr. Benher Patil 



सामान्यकाळातील बारावा रविवार
दिनांक: १३/०६/२०२१
पहिले वाचन: - ईयोब ३८: १, ८-११
दुसरे वाचन: - २ करिंथ ५: १४-१७
       शुभवर्तमान: - मार्क ४: ३५-४१ 

“उगा राहा, शांत हो.”

प्रस्तावना:

          सामान्यकाळातील बाराव्या रविवारची उपासना आज आपणास स्पष्टपणे सांगते की अखिल नभोमंडळ आणि आपण राहत असलेल हे अफाट जग परमेश्वराने निर्माण केले आहे. ह्या विश्वात असलेले सर्वकाही: अगणित तारे, उंच पर्वत, अफाट समुद्र, त्याचप्रमाणे सुंदर आणि निरनिराळे पशु, पक्षी आणि मानवप्राणी हि देवाची अदभूत अशी किमया आहे. ह्या सृष्ठीतील प्रत्येक सजीव आणि निर्जीव चराचरावर फक्त देवाचीच सत्ता असून सर्वकाही त्याने आखलेल्या योजनेप्रमाणे नियमितपणे तो चालवतो. तर आजच्या शुभवर्तमानात आपल्याला असं कळून येत कि, देव सर्वशक्तिशाली असून, ह्या जगातल्या सर्व शक्तीवर आणि नैसर्गिक आपत्तीवर त्याच साम्राज्य आहे आणि सर्व त्याच्या नियंत्रणात आहे. म्हणूनच आपल्या आणि पृथ्वीच्या निर्माणकर्त्या ईश्वरावर आपण नितांत श्रद्धा ठेवावी आणि हर एक आपत्तीत सर्वशक्तीशाली परमेश्वराचा धावा करण्याची सुबुद्धी आपणास मिळावी म्हणून ह्या मिस्साबलीत विशेष प्रार्थना करूया.

मनन-चिंतन:

          एकदा एक प्रवाशी बोट सागरातून मार्गक्रमण करत असताना वादळात सापडते. तुफानी वारा आणि खवळलेला समुद्र पाहून सर्व प्रवाशी घाबरून गेले होते. मात्र एक चिमुकला मुलगा बिनधास्तपणे बोटीत खेळत होता. जेव्हा त्याला  विचारण्यात आल: “बाळा तुला भिती वाटत नाही का?” तेव्हा तो उत्तरतो: “नाही, कारण माझे वडील ह्या बोटीचे कॅप्टन आहेत आणि ते हि नौका कधीही बुडू देणार नाहीत.”

          प्रिय बंधू-भगिनींनो, आपण सर्व परमेश्वराची प्रिय लेकरे आहोत. तो आपली निगा राखतो, काळजी घेतो आणि आपल्या संकटसमयी तो आपलं रक्षण करण्यास धावून येतो. आजच्या उपासनेत देवाच्या आपल्यावरील महान प्रेमाची आणि सामर्थ्याची प्रचीती होते. आजच्या पहिल्या वाचनात आपण ऐकतो कि देवाचा खरा भक्त, ईयोबच्या जीवनात एकामागून एक अशी असंख्य संकटे आणि आपत्ती आल्या: त्याचं संपूर्ण कुटुंब उध्वस्त झालं, सर्व संपती हरवली, आणि त्याला आजाराने ग्रासलं. अश्या केविलवाण्या परिस्थितीत सुद्धा  त्याने देवावर विश्वास ठेवला. म्हणूनच देवाने त्याला वाऱ्यावर सोडलं नाही. त्याच्या दृढ विश्वासामुळे त्याला आजारातून बरं केलं आणि त्याची समृद्धी त्याला पुन्हा प्राप्त करून दिली आणि ती ही दोन पटीने.

          संत मार्क, आजच्या शुभवर्तमानात आपल्याला देवाच्या सामर्थ्याची आणि नैसर्गिक शक्तीवर असलेल्या त्याच्या अधिकाराची जाणीव करून देतो. येशू आणि त्याचे शिष्य बोटीतून गालील समुद्र पार करत असता अचानक त्यांची बोट वादळाच्या तडाख्यात सापडली. मोठ मोठ्या लाटांनी बोट बुडू लागल्याची जाणीव होताच घाबरलेले शिष्य येशूला हाका मारतात, त्याला झोपेतून उठवतात, आणि त्याच्याकडे विनवणी करतात. तेव्हा येशू वादळाला धमकावतो: “उगा राहा, शांत हो”, आणि ताबडतोब वादळ निवांत झाले. आणि ह्या चमत्काराने अचंबित झालेले शिष्य उद्गारतात: “हा आहे तरी कोण? वारा व समुद्र देखील ह्याचे ऐकतात.” ह्या चमत्कारातून संत मार्क आपणास येशूची खरी ओळख करून देतो. येशुमध्ये देव मानवीरूप घेऊन आपल्यात आणि ह्या जगात वास करतो. त्याद्वारे येशू हा देवाचा पुत्र असून, त्याच देवत्व / दैविपणा आणि दैवी सामर्थ्य सिद्ध होते.

          संत पौल, येशूचा विश्वासू सेवक, ह्याला यहुदी लोकांकडून येशुमुळे आणि त्याच्या सुवार्तेमुळे अनेक छळ, दुःख, नकाररुपी वादळांचा सामना करावा लागला. त्याला कितीतरी संकटांना सामोर जावं लागलं, तरी येशू हाच जगाचा खरा आणि एकमेव तारणारा आहे आणि त्याच्याच ठायी राहिल्याने आपणास नवजीवनाचा लाभ होतो, असं ठामपणे संत पौल आजच्या दुसऱ्या वाचनात सांगतो.          

          माझ्या प्रिय बंधू-भगिनीनो, आपलं जीवन हि एक नौका आहे. ह्या जगाच्या भवसागरातून दैनंदिन प्रवास करत असताना, आपल्यावर सुद्धा ईयोब आणि संत पौल प्रमाणे पुष्कळ संकटे येतात, वैयक्तित आणि कौटुंबिक समस्या उदभवतात. आपली जीवनरूपी बोट मोह, नैराश्य, परीक्षा, आर्थिक अडचणी, मानसिक आणि शारीरिक आजार अशा नानारूपी वादळांशी झुंजत असताना आपण कोणावर विसंबून राहतो? अश्या कठीण आणि बिकट प्रसंगी आपण निराश न होता किंवा घाबरून न जाता येशू हाच आमचा खरा तारणारा आणि सर्व संकटातून निवारण करणारा एकमेव स्वामी म्हणून त्याचा स्वीकार केला पाहिजे. कसोटीच्या समयी डगमगून न जाता आपल्या जीवनाची सूत्र येशूच्या हाती सुपूर्द करायला शिकलं पाहिजे. त्याने सर्व ऐहिक शक्तीवर विजय मिळविला आहे, नैसर्गिक आपत्तीवर तो सत्ता चालवतो, भयंकर जीवघेण्या आजारातून तो आपणास बरे करण्यास सक्ष्यम आहे. आपल्या जीवनातील कोणतेही वादळ शमविण्यास तो समर्थ आहे, असा त्याच्या दैवी सामर्थ्यावर आपण ठाम विश्वास ठेवला पाहिजे. जेव्हा आपण विश्वासाने जीवनरूपी मचव्यात येशूला स्वीकारतो आणि आपल्या ह्या बोटीच सुकाणू त्याच्या हाती सोपवतो तेव्हा तो आपल्याला सुखरूप पैलतीरी जाण्यास मदत करतो.

विश्वासू लोकांच्या प्रार्थना

प्रतिसाद : हे प्रभू, आमची प्रार्थना ऐक.

1. हे परमेश्वरा तुझ्या सेवेत बोलाविलेले आमचे पोप फ्रान्सिस, कार्डीनल्स, बिशप, फादर्स व सर्व व्रतस्त बंधूभगिनी, ह्यांना तुझे कार्य करण्यास शारीरिक व मानसिक आरोग्य मिळावे. तुझ्याशी एकनिष्ठ राहून जगाला तुझी ओळख द्यावी म्हणून आपण प्रार्थना करूया.

2. जे लोक देवापासून दूर गेले आहेत. त्या सर्वाना दैवी दयेचा स्पर्श व्हावा व त्यांनी देवाकडे वळून एक नवीन, विश्वासू जीवन जगावे म्हणून प्रार्थना करूया.

3. जी कुटुंबे दैनिक वाद-विवादाला बळी पडून मोडकळीस आली आहेत, त्या कुटुंबात शांती नांदावी व प्रेमाला भर यावी म्हणून आपण विशेष प्रार्थना करूया.

4.  जी दांपत्ये, असून बाळाच्या देणगीसाठी वाट पाहत आहेत, त्याची प्रार्थना परमेश्वराने ऐकावी व बाळाच्या देणगीने त्याचे जीवन आनंदमय व्हावे म्हणून प्रार्थाना करूया.

5. ह्या पावसाळी हंगामात चांगला पाऊस पडावा व सर्व प्राणी, पक्षी व शेतीची वाढ चांगल्या प्रकारे व्हावी म्हणून प्रार्थना करूया. 

6. थोड्या वेळ शांत राहून आपल्या वैयक्तिक व सामाजिक हेतूसाठी प्रार्थना करूया.


Friday 11 June 2021

Reflection for the 11th Sunday in Ordinary Time (13/06/2021) By Fr. Benjamin Alphonso



सामान्य काळातील अकरावा रविवार

दिनांक: १३/०६/२०२१

पहिले वाचन:- यहेजकेल १७: २२-२४

दुसरे वाचन:- २ करिंथ ५:६-१०

शुभवर्तमान:- मार्क ४: २६-३४


संत अन्थोनीचा सण



प्रस्तावना:

       आज आपण सामान्य काळातील अकरावा रविवार साजरा करीत आहोत. आज आपण जग प्रसिद्ध संत अन्थोनी ह्याचा सण साजरा करीत आहोत. आजचे पहिले वचन यहेजकेल या पुस्तकातून घेतले आहे. देवा यहेजकेल ह्या संदेष्ट्याद्वारे आपल्याला सांगतो कि, मी निचास उंच व जे स्वःताला उंच असे मानतात त्यांना नमविण. दुराऱ्या वाचनात संत पौल कारीन्थिकरांस पाठवलेल्या दुसऱ्या पत्रामध्ये ‘श्रध्येच्या मार्गदर्शनाने आम्ही धैर्याने वागतो आणि प्रभूला संतोश्वीने हेच आमचे ध्येय होय. संत मार्क लिखित शुभवर्तमानान आपण स्वर्ग राज्याविषयी ऐकतो. प्रभू येशू म्हणतो, “स्वर्गाचे राज्य एका मोहरीच्या दाण्यासारखे आहे. मोहरीचा दान अगदी लहान (सूक्ष्म) असला तरी त्याचे रुपांतर मोठ्या झाडामध्ये होते. देवाचे राज्य अगदी त्याचा प्रमाणे नकळत वाढते. जगप्रसिद्द पादुआचा संत अन्थोनी ह्याने आपल्या प्रवचनाद्वारे लोकांना प्रभूकडे आणले आणि देवराज्य प्रस्थापित करण्याचा प्रयत्न केला. आजच्या ह्या पवित्र मिस्साबलिदानात आपण विशेष प्रार्थना करूया कि, आपण सर्वांनी आनंदाने देवराज्याची घोषणा करावी.

मनन चिंतन:

       आपण अनेक राज्याविषयी गोष्टी ऐकतो. आपण वाचले व ऐकले आहे कि, अनेक प्रसिद्ध व लोकप्रिय असे राजे होऊन गेले ज्यांनी आपल्या कार्याद्वारे आपले प्रजेची मने जिंकली आणि अशा राज्याविषयी लोकांच्या मनात प्रेम व आपुलकी आहे. आपल्या भारत देशाच्या उत्तरेला तिबेर नावाचा एक देश आहे. तिबेर ह्या देशात अजुनही राजा आहे. तिकडचा राजा लोक प्रिय आहे. त्या देशाच्या राज्याने जाहीर केले कि, आता राजेशाही बस झाली आपण निवडणूक घेऊन देशाची सत्ता लोकांकडे देऊया. पण लोकांनी ती गोष्ट स्वीकारली नाही. लोकांच म्हणन असं आहे कि, राजा हा फार चांगला आहे. त्याचे लोकांवर खूप प्रेम आहे. राजा स्वतः लोकांना भेट देतो. आपल्या राज्यात (देशात) सर्व लोक आनंदित असावीत असा त्याचा ध्येय आहे. सर्वांना मोफत व वैद्यकीय इलाज देतात. जर काही कारणामुळे एखाद्याच घर पडले किंवा नष्ट झाले तर राज स्वतः नोंद घेऊन त्यांना नवीन घर व जागा देतात. असा राजा ज्याला सर्व प्रजेची काळजी व प्रेम आहे. ह्या कोरोनाच्या काळात ते स्वतः लोकांना भेट देऊन त्यांनी कशी काळजी घ्यायची हा सल्ला देत आहत. जगत तिबेर असा देश आहे, जिथे सर्वांचे लसीकरण झाले आहे. जसा राजा तसी प्रजा. आज तिबेर देशात, जगातील सगळ्यात आनंदी लोक आपल्याला आढळतात.

       आपल्या सगळ्यांना प्रश्न पडतो कि, देवाचे राज्य म्हणजे नक्की काय? प्रभू येशूची नक्की शिकवण काय होती? प्रभू येशूच्या शुभवर्तमानाचा मुख्य विषय होता, ‘देवाचे राज्य’ अथवा ‘स्वर्गाचे राज्य’. होय, प्रभू येशू देवराज्याची घोषणा करण्यासाठी ह्या जगत आला होता. आजच्या शुभवर्तमानात आपण ऐकतो कि, आपण चीवातूर घेऊन धडपड करण्याची काहीही गरज नाही. पेरलेले बी वाढून आपोआप फळ देईल. नैसर्गिक वाढीची प्रतिक्रिया आम्हाला समजत नाही. पण त्या वाढीत सहभागी होण्यासाठी ती समजून घेण्याची आम्हाला गरज नाहीच, कारण बीज अंकुरात वाढीस लागण्याच्या स्थितीत असण मात्र गरजेचे आहे. पिक मिळण्याचे अभिवच तर आहेच पण त्याबरोबर पवित्र शास्त्रात अनेकदा देवाच्या न्यायाची सूचनाही आहे. दुसऱ्या दाखल्यामध्ये पुन्हा जवळजवळ लक्षात येणारी बीयाची वाढ आणि त्याचे आश्चर्यकारक परिणाम याचे वर्णन केले आहे. मोहरीचे ‘बी’ अगदी छोटे असते पण त्याची वाढ झाली कि कालांतराने मध्यपूर्वेतील एका मोठ्यात मोठ्या रोपात त्याची गणना केली जाते. देव राज्याची वाढही अशीच असते. प्रारंभी ते अगदी अल्प वाढते पण अखेरीज त्याचाच जय होतो.

       आजच्या पहिल्या वाचनात आपण ऐकतो कि, याहोवाने संदेष्ट्याद्वारे सांगितले कि, तो स्वतः गंधसरूच्या शेंड्यावरील एक डहाळी घेऊन ती लावील आणि त्याचे रुपांतर तो सुंदर आणि बलाढ्य अशा झाडामध्ये होऊन ह्या झाडाच्या छायेखाली सर्व पशुपक्षी निवास करतील. हे झाड परमेश्वराच्या राज्याचे प्रतिक होय. सर्व राज्ये सहभागी होण्यासाठी तो आमंत्रण करतो. त्याचबरोबर कालांतराने ही सर्व राष्ट्रे एका मागोमाग नाश पावतील असे याहोवा म्हणतो; परंतु इतिहासावून कळते कि, देवाचे राज्य सर्वदा टिकेल. त्याचा कोणीही नाश करू शकत नाही.

       दुसऱ्या वाचनात संत पौल करिंथकरांस म्हणतो, देवाकडे आपल्याला केवळ विश्वासाने जाता येते. आपल्या प्रत्येकाला देहाने केलेल्या गोष्टी म्हणजे ह्या जीवनात कोणताही व्यक्तीने केलेले कृत्य, असाच ह्या संदर्भाचा अर्थ आहे. आमच्या सर्व कृत्यांबद्दल आपण देवाला जबाबदार आहोत आणि योग्य असेल त्याप्रमाणे आपल्याला लाभ होईल किंवा हानी सोसावी लागेल.  

       परमेश्वर नेहमी आपल्याकडे करुणामय दृष्टीने पाहतो. आपण सर्वजन मोहरीच्या दाण्यासारखे आहोत. आपण देवाचा म्हणजेच स्वर्गराज्याचा शोध घेतला पाहिजे. आपण आपल्या वागण्या, कृत्याद्वारे देवाराज्य प्रस्थापित करण्याचा प्रयत्न केला पाहिजे. आज आपण स्वतःला प्रश्न विचारूया कि, आपण देवराज्याची सुवार्ता पसरविण्याचा प्रयत्न करतो का? पादुआचा संत अन्थोनीने आपल्या प्रवचनाद्वारे व कार्याद्वारे देवाचे राज्य प्रस्थापित करण्याचा प्रयत्न केला. आज आपण पादुआचा संत अन्थोनीच्या मध्यस्थीने देवाकडे मागुया कि, परमेश्वराने आपल्या सगळ्यांना आशीर्वादित करावे जेणे करून आपळे कार्य आणि वागण्याद्वारे आपण देवाचा राज्याची घोषणा करावी.

विश्वासू लोकांच्या प्रार्थना

प्रतिसाद :- हे प्रभो आमची प्रार्थना ऐक.

1. आमचे परमगुरुस्वामी, महागुरुस्वामी व सर्व कार्यकर्त्यांना परमेश्वराचा स्पर्श व्हावा व प्रभूच्या प्रेमशांतीचा संदेश त्यांनी सर्वत्र पसरावा म्हणून आपण प्रार्थना करू या.

2. यंदाच्या वर्षी सुद्धा आपल्याला चांगला पाऊस मिळावा व आपल्या शेतकरी बांधवाना चांगले पिक घेता यावे म्हणून आपण प्रार्थना करू या.

3. जे कोणी आजारी आहेत त्यांना चांगले आरोग्य, जे दुःखी आहेत त्यांचे दुःख दूर व्हावे व जे एकटे आहेत अशांना प्रभूचा सहवास मिळावा म्हणून आपण प्रार्थना करू या.

4. जे तरुण-तरुणी देवापासून दूर जाऊन अंधारात भरकटत आहेत, त्यांना प्रभूच्या प्रकाशात मार्गक्रमण करावे व जागतिक मोह सोडून प्रभूच्या प्रेमाकडे वळावे म्हणून प्रार्थना करू या.

5. थोडा वेळ शांत राहून आपल्या वैयक्तिक, सामाजिक गरजासाठी देवाकडे प्रार्थना करू या.


Friday 4 June 2021

      Reflection for the SOLEMNITY OF THE MOST HOLY BODY AND BLOOD OF THE LORD (06/06/2021) By Br. Gilbert Fernandes



येशूच्या अतिपवित्र शरीर व रक्ताचा सोहळा


दिनांक: ०६/०६/२०२१

पहिले वाचन: निर्गम २४:३-८

दुसरे वाचन: इब्री लोकांस पत्र ९:११-१५

शुभवर्तमान: मार्क १४:१२-१६, २२-२६


प्रस्तावना:

ख्रिस्ताठायी माझ्या प्रिय बंधू-भगिनींनो, आज आपण प्रभू येशूच्या अतिपवित्र शरीराचा आणि रक्ताचा सण साजरा करीत आहोत. परमेश्वराने आपल्याला पापातून मुक्त करण्यासाठी आपला एकलुता एक पुत्र ह्या धरतीवर पाठविला आणि येशू ख्रिस्ताने वधस्तभावर आपला बळी देऊन आम्हाला आमच्या पापातून मुक्त केले. प्रभू येशूने आपले रक्त पुष्कळांकरिता वाहिले आहे.

आजच्या पहिल्या वाचनात आपण ऐकतो की, इस्त्रायल लोकांनी देवाचे वचन ऐकावे व त्याच्या आज्ञा पाळाव्यात म्हणून मोशे रक्त शिंपडून करार करतो. दुस-या वाचनात आपण एकतो कि,ख्रिस्ताने स्वतःचे रक्त अर्पण करून एकदाच परम पवित्र स्थानांत गेला आणि त्याने सार्वकालिक मुक्ती मिळविली. तर शुभवर्तमानात ख्रिस्ताने आपल्या शिष्यांना भाकर व द्राक्षारस देऊन स्वतःला प्रकट केले, असा बोध करण्यात येतो.

प्रभू येशूच्या शरीर व रक्ताचा सण साजरा करत असताना आपणा सर्वांना प्रभू येशू ख्रिस्ताच्या शरीराचा आणि रक्ताचा एक घटक होता यावे म्हणून ह्या पवित्र मिस्साबलीदानामध्ये भक्तिपूर्वक मनाने सहभागी होऊया.

मनन-चिंतन:

          ख्रिस्ती धर्मात मिस्साबलीदानाला अतिशय महत्व आहे. ख्रिस्ती लोकांसाठी मिस्साबलीदानातून जीवनासाठी आवश्यक असलेले दान मिळते व श्रद्धा बळकट होऊन आध्यात्मिक जीवनात वाढ होते आणि त्यामुळेच ख्रिस्तसभेत ख्रिस्ताच्या अतिपवित्र शरीराचा व रक्ताचा सण आपण साजरा करतो. ह्या सणाची सुरुवात सर्वप्रथम बेल्जियम ह्या देशात झाली. पोप उर्बन चौथे ह्यांनी संपूर्ण कॅथलिक देऊळमातेत हा सण साजरा करण्यास सातशे वर्षापूर्वी सुरुवात केली.

          येशूच्या अतिपवित्र रक्ताचा व शरीराचा सण हा ख्रिस्तसभेला मिळालेले खूप अप्रतिम असे वरदान आहे. भाकररूप ख्रिस्त शरीर हे ख्रिस्त धर्मातील एक महान रहस्य आहे. ख्रिस्ताचे आम्हाला दिव्य दर्शन घडावे, आमचे आत्मिक पोषण व्हावे, त्याच्या मायेचा ओलावा आम्हांला सदैव मिळावा त्याची सोबत आम्हांला नित्य लाभावी म्हणून ख्रिस्त भाकररूप बनला.

प्रभू येशु ख्रिस्ताने क्रूसावरील समर्पणाद्वारे स्वत:चे रक्त सांडून मानव आणि परमेश्वर पिता ह्यामध्ये नवीन कराराची स्थापना केली. आपण पवित्र मिस्साबलिदानात भाकरीचे म्हणजेच प्रभू येशूच्या शरीराचे सेवन करतो व त्याद्वारे आपण प्रभूमध्ये सामील होतो. आपण प्रभूबरोबर एकजीव बनतो. जेव्हा आपण ख्रिस्तशरीर स्विकारतो तेव्हा आपला विश्वास न डळमळता आपण त्या भाकररुपी ख्रिस्ताला आपल्या हृदयात स्विकारले पाहिजे. व ह्या सेवनानंतर आपल्या जीवनात परिवर्तन घडून आले पाहिजे.

ह्या जगात असे पुष्कळ लोक आहेत ज्यांना ख्रिस्तशरीर स्वीकारण्याची जरी त्यांची इच्छा असली तरी त्यांना मिळत नाही. आज ह्या कोरोना महामारीच्या काळात आपण ख्रिस्तशरीर स्वीकारू शकत नाही. पुष्कळ लोक प्रभूचा स्विकार करण्यासाठी तळमळत आहेत. कारण अशा सर्व लोकांना प्रभूच्या शरीरातून मिळणाऱ्या आनंदाची, कृपेची व मायेची जाणीव झाली आहे.

आजपर्यंत आपण खूप वेळा पवित्र ख्रिस्तशरीराचे सेवन केले असेल. जेव्हा आपण सर्वप्रथम ख्रिस्तशरीराचे सेवेन केले तोच भक्तीभाव आजपर्यंत आहे का ? आपल्याला ख्रिस्तशरीराबद्दल योग्य असा आदर वाटतो का ? व आपण त्यामध्ये येशू स्वत: हजर आहे हे जाणून घेतो का ?

जर ह्या प्रश्नांचे उत्तर नाही असेल तर आपले काहीतरी चुकत आहे. आपण योग्य मार्गावर नाहीत व देवापासून दूर जात आहोत. जेव्हा आपण चर्चमध्ये रांगेत ख्रिस्तशरीर स्विकारण्यास जातो तेव्हा आपण मनात निर्धार केला पाहिजे की मी एखादी भाकर नाही तर ख्रिस्तशरीर स्विकारणार आहे. आपण स्विकारतो तो, त्याच येशूला जो बेथलेहेममध्ये जन्माला आला होता. तसेच आपण त्याच ख्रिस्ताला स्विकारतो जो क्रुसावर आपल्यासाठी मरण पावला आणि आपण त्याच प्रभूला स्विकारतो जो मरणातून उठला.

आज ख्रिस्तशरीर ह्या सांक्रामेतामुळे अनेक लोक ख्रिस्तसभेच्या जवळ येत आहेत. जर आपण तर्कशक्तीच्या बळावर ख्रिस्तशरीरातील येशूच्या अस्तित्वाचे सत्य पाहण्यास गेलो तर आपल्याला उत्तर मिळणार नाही परंतु विश्वासानेच ह्या सर्व गोष्टी साध्य होतात. व ह्याच विश्वासाने आपण प्रभुचे सेवन करू शकतो.

आज आपण ख्रिस्ताच्या अतिपवित्र शरीराचा व रक्ताचा सण साजरा करत असताना आपण त्याचा स्वीकार करण्यास आणि त्याच्याशी एकजीव होण्यास पात्र ठरावे म्हणून प्रार्थना करूया.

विश्वासू लोकांच्या प्रार्थना:

प्रतिसाद: हे प्रभो, तुझ्या शरीर व रक्ताद्वारे आमचे रक्षण कर.

१. ख्रिस्तसभेची धुरा वाहणारे परमगुरुस्वामी फ्रान्सीस, सर्व महागुरू, धर्मगुरू, व्रतस्त व प्रापंचिक या सर्वांवर देवाचा विशेष आशिर्वाद यावा व त्यांना त्यांच्या पवित्र कार्यात प्रभूचे मार्गदर्शन व कृपा मिळावी म्हणून आपण प्रार्थना करू या.

२. ख्रिस्ताच्या मळ्यात कार्य करण्यासाठी आपल्या परिसरातील अनेक तरुण-तरुणींना पुढे येण्यास पवित्र आत्म्याची प्रेरणा मिळावी म्हणून आपण प्रार्थना करू या.

३. आज आपण प्रभू येशु ख्रिस्ताच्या अतिपवित्र शरीर व रक्ताचा सण साजरा करीत असताना आपण आपल्या शरीररूपी मंदिरात देवाला प्रथम स्थान द्यावे व आपले जीवन त्याच्याठायी समर्पित करावे म्हणून आपण प्रार्थना करू या.

४. आपल्या धर्मग्रामात जे दु:खीत, पिडीत आहेत, तसेच जे असाध्य आजाराने पछाडलेले आहेत, विशेषकरून जे कोरोनाच्या महामारीने ग्रासलेले आहेत त्यांना परमेश्वरी कृपेचा अनुभव यावा व नवजीवनाची वाट त्यांना दिसावी म्हणून आपण प्रार्थना करू या.

५. यंदाच्या वर्षात भरपूर पर्जन्यवृष्टी व्हावी, शेतक-यांच्या सर्व गरजा पूर्ण व्हाव्यात व सर्वांनी शांतीने, प्रेमाने रहावे म्हणून आपण प्रार्थना करू या.

६. थोडावेळ शांत राहून आपण आपल्या वैयक्तिक, कौटुंबिक आणि सामाजिक हेतूंसाठी प्रार्थना करू या.