Reflections for the homily of Easter Sunday (05/04/2026) by Br. Vinan Souz
पास्काचा सण
दिनांक: ०५/०४/२०२६
पहिले वाचन: प्रेषितांची
कृत्ये १०:३४अ ३७-४३.
दुसरे वाचन: कलस्सैकरांस पत्र: ३:१-४.
शुभवर्तमान: योहान
२०:१-९.
प्रस्तावना
ख्रिस्त मरणातून उठला आहे. त्याने मरणावर
विजय मिळविला आहे. आपल्या ख्रिस्ती जीवनातील अति महत्त्वाचे भाग म्हणजे, ‘येशू ख्रिस्ताचे दु:ख, मरण व पुनरुत्थान.
ख्रिस्ताचे पुनरुत्थान हे आपल्या ख्रिस्ती
विश्वासाचा केंद्रबिंदू आहे. आजच्या उपासनेतील तिन्ही वाचने आपणांस ‘सत्य’
पटवून देत आहेत की, ख्रिस्ताने
मरणावर विजय मिळवून संपूर्ण जगाला दाखविले की, आपला देव हा जिवंत देव आहे.
पहिल्या वाचनात आपण ऐकतो कि, पेत्र
ज्यांने ख्रिस्ताची सुवार्ता ऐकली नाही व जे खऱ्या जिवंत देवाविषयी उत्सुक आहेत, अशांना प्रभू येशूच्या पुनरुत्थानाविषयी
साक्ष देतो. दुसऱ्या वाचनात संत पौल आपल्याला आपले लक्ष स्वर्गीय येशू ख्रिस्तावर
केंद्रित करण्यास सांगत आहे. कारण प्रभू येशूने मृत्यूवर व जगावर विजय मिळविला
आहे. शुभवर्तमानात आपण पाहतो की, येशू
ख्रिस्त हा मरणावर विजय मिळवून उठला आहे.
येशू ख्रिस्त म्हणतो, ‘पुनरुत्थान व जीवन मीच आहे’ आणि आपण
त्याच पुनरुत्थित ख्रिस्ताचे अनुयायी आहोत. ‘प्रत्येक अंधारमय प्रसंगानंतर आशेचा
किरण दिसत असतो’, म्हणून
मृत्यू हा आपल्या जीवनाचा शेवट न मानता आपणदेखील प्रभूच्या पुनरुत्थानात एकदिवस
सामील होणार आहोत हा आपला विश्वास दृढ व्हावा म्हणून या ख्रिस्तयागात आपण विशेष
प्रार्थना करुया.
मनन चिंतन
प्रिय बंधू आणि
भगिनींनो, आज आपण मोठ्या आनंदाचा दिवस साजरा करतो म्हणजेच ईस्टर रविवार! आजचा दिवस आपल्याला सांगतो: “येशू उठला आहे! तो जिवंत आहे!” हा फक्त एक सण नाही, तर आपल्या
विश्वासाचा पाया आहे.
इजिप्तमधील
पिरॅमिड्स हे प्राचीन जगातील “सात आश्चर्यांपैकी” एक म्हणून जगप्रसिद्ध आहे. परंतु
प्रत्यक्षात ते इजिप्तच्या फराओंच्या ममीकृत मृतदेहांना ठेवण्यासाठी बनवलेली
प्रचंड समाधीस्थळे आहेत. आणि हजारो लोक तेथे भेट देतात, कारण तिथे
नामवंत लेखक, तत्त्वज्ञ
आणि राजकारण्यांचे मृतदेह समाधीत ठेवलेले आहेत. पण जेरुसलेममध्ये “होली सेपल्कर”
नावाचे एक पवित्र समाधीस्थान आहे, आणि जगभरातून यात्रेकरू त्या ठिकाणी
येतात. एक अशा थडग्याला भेट देण्यासाठी जे रिकामे आहे, आणि
ज्याच्या प्रवेशद्वारावर लिहिलेले आहे, “तो येथे
नाही.” “येशू उठला आहे! तो जिवंत आहे!” हे थडगे
प्रसिद्ध आहे कारण येशू ख्रिस्त, ज्यांना एकदा तिथे दफन करण्यात आले होते, त्यांनी मृत्यूवर
विजय मिळवत पुनरुत्थान केले, जसे त्यांनी आपल्या शिष्यांना आधीच
सांगितले होते. अशा प्रकारे, येशूंनी आपल्या जीवनातील सर्वात
महत्त्वाचा चमत्कार केला. निसर्गाच्या नियमांना आव्हान देत आणि आपण देव आहोत हे
सिद्ध करत.
ख्रिस्ताचे
पुनरुत्थान हे आपल्या ख्रिस्ती श्रद्धेचा पाया आहे, कारण ते
सिद्ध करते की येशू देव आहे. म्हणूनच संत पौल लिहितात: “जर ख्रिस्त उठविला गेला
नाही, तर आमची
घोषणा व्यर्थ आहे, आणि तुमचा विश्वासही व्यर्थ आहे… आणि जर
ख्रिस्त उठविला गेला नाही, तर तुमची श्रद्धा भ्रम आहे, आणि तुम्ही
अजूनही तुमच्या पापांत अडकलेले आहात… पण प्रत्यक्षात, ख्रिस्त मेलेल्यांमधून
उठवला गेला आहेच, जे झोपले आहेत त्यांचे पहिले फळ आहेत” (१
करिंथकर 15:14, 17, 20). जर येशू ख्रिस्त मृतांतून उठला नसता, तर देऊळमातेची
शिकवण फसवणूक ठरली असती आणि श्रद्धा
निरर्थक ठरली असती. पण जर तो खरोखर उठला असला, तर त्यांचा
संदेश सत्य आहे! ख्रिस्ती धर्माच्या सर्व
मूलभूत शिकवणी पुनरुत्थानाच्या सत्यावर आधारलेल्या आहेत. “येशू प्रभु आहे; तो उठला आहे!”
(रोमकरांस पत्र 10:9) हे प्रेषितांच्या प्रचाराचे केंद्रबिंदू
होते.
ईस्टर
आपल्याच्या स्वतःच्या पुनरुत्थानाचे आश्वासन आहे. येशूने लाझरसच्या थडग्याजवळ
मार्थाला सांगितले: “पुनरुत्थान व जीवन मीच आहे; जो माझ्यावर
विश्वास ठेवतो तो मेला असला तरी जगेल”
(योहान 11:25-26). “ख्रिस्त
आपल्याला ‘शेवटच्या दिवशी’ उठवील, पण एका अर्थाने आपण आधीच ख्रिस्ताबरोबर
उठलो आहोत. पवित्र आत्म्यामुळे, आपले ख्रिस्ती जीवन आधीच ख्रिस्ताच्या
मृत्यू आणि पुनरुत्थानात सहभागी आहे”
ईस्टर
हा सण आहे जो आपल्याला या दुःख, वेदना, भीती आणि
अश्रूंनी भरलेल्या जगात आशा आणि धैर्य देतो. ईस्टर आपल्याला आठवण करून देतो की
जीवन जगण्यासारखे आहे. आपल्या अंतकरणात, देऊळमातेमध्ये, पवित्र
संस्कारात आणि स्वर्गात, पुनरुत्थित येशूच्या वास्तविक उपस्थितीवरील विश्वास
आपल्या वैयक्तिक तसेच सामूहिक प्रार्थनांना अर्थ देतो. पुनरुत्थित प्रभूच्या
सर्वव्यापी उपस्थितीवरील विश्वास आपल्याला लोभ किंवा मोहांशी लढण्याचे बळ देते आणि
अनावश्यक चिंता व भीतीपासून मुक्त करते.
प्रिय
बंधू आणि भगिनींनो, पुनरुत्थानाची
घटना आपल्याला सांगते की येशू ख्रिस्त मृत्यूतून उठला आहे आणि तो आजही जिवंत आहे.
ही केवळ ऐतिहासिक घटना नाही, तर एक जिवंत
सत्य आहे जे आपल्या जीवनात बदल घडवून आणते. जर ख्रिस्त उठला नसता, तर आपला विश्वास व्यर्थ ठरला असता. पण तो
उठला आहे, आणि म्हणूनच
आपल्याला नवीन जीवनाची आशा आहे.
ईस्टर
आपल्याला “पुनरुत्थानाचे लोक” बनण्याचे आमंत्रण देते. याचा अर्थ आपण आपल्या
पापांच्या, वाईट
सवयींच्या आणि व्यसनांच्या कबरेत अडकून राहू नये. अनेक वेळा आपण निराशा, भीती, शंका, आणि दुःख यांच्या ओझ्याखाली दबून जातो.
पण येशूचे पुनरुत्थान आपल्याला सांगते की कोणतीही कबर आपल्याला कायमचे बंदिस्त करू
शकत नाही. देवाची शक्ती आपल्याला त्या सर्वांपासून मुक्त करू शकते.
पोप
फ्रान्सिस यांनी एक
सुंदर संदेश दिला आहे: “नेहमी नव्याने सुरुवात करता येते.” कितीही चुका झाल्या
असल्या तरी, देव
आपल्याला नवीन जीवन देतो. तो आपल्यावर अमर्याद प्रेम करतो आणि प्रत्येक क्षणी
आपल्या सोबत आहे.
म्हणूनच, या ईस्टरच्या दिवशी आपण ठरवूया:
- आपण भूतकाळ मागे
सोडून नवीन जीवन सुरू करूया.
- आपण आनंद, शांती, आणि प्रेम यांचे साधन बनूया.
- आपण ख्रिस्ताचे
जिवंत साक्षीदार बनूया.
प्रिय
मित्रांनो, पुनरुत्थानाचा
संदेश आपणास स्पष्ट करतो की: काहीही आपल्याला नष्ट करू शकत नाही, न दुःख, न पाप, न मृत्यू, पण त्यासाठी आम्ही देवावर
विश्वास ठेवला पाहिजे. ख्रिस्ताने मृत्यूवर विजय मिळवला आहे, आणि त्याच्यात आपणही विजयी होऊ शकतो.
ईस्टरच्या, या दिवशी आपण आनंदाने घोषित करूया: “ख्रिस्त उठला आहे! खरोखरच तो उठला
आहे!”आणि आपल्या जीवनातून हा आनंद जगाला दाखवूया.
विश्वासू लोकांच्या प्रार्थना
प्रतिसाद: “हे पुनरुत्थित ख्रिस्ता आमची प्रार्थना ऐक.”
१. हे प्रभु, तुझे पुनरुत्थान तुझ्या शिष्यांच्या
हृदयांना आणि आत्म्याना आशा, सांत्वन आणि आनंदाने भरते,
आज तुझ्यावर विश्वास ठेवणार्या सर्वांना तुझ्या वैभवी पुनरुथानाची
साक्ष जगाला देण्यास तू त्यांना अभिषिक्त करावे म्हणून आम्ही प्रार्थना करतो.
२. हे प्रभु, तुझ्या पुनरुत्थानाबद्दल तुझ्या अनेक
शिष्यांना शंका आहे: त्यांना पुन्हा शांतता आणि खात्री मिळावी, तसेच त्यांचा तुझ्या पुनरुथावरील विश्वास दृढ व्हावा म्हणून आम्ही तुझ्याकडे प्रार्थना करतो.
३. हे दयावंत परमेश्वरा, जे लोक वेगवेगळ्या
कारणाने दु:खी आणि निराशित आहेत, अश्यांना आशीर्वादित कर. तू
त्यांची शक्ती व त्यांचा आधारस्तंभ बनून त्याचं दुख दूर कर, तसेच
त्यांच्या निराशेच रुपांतर आशेत करून त्यांची जीवने तुझ्या अलौकिक आनंदाने भर
म्हणून तुझ्याकडे प्रार्थना करतो.
४. हे पवित्र प्रभु, ह्या जगातील अराजकता, अशांतता
व अन्याय दूर कर, सर्वांनी एकामेकांबरोबर सौख्याने, एकीने, आणि प्रेम भावनेने जगावे, तसेच ह्या जगात शांतता नांदावी म्हणून तुझ्याकडे प्रार्थना करतो.
५. हे
सर्वसमर्थ परमेश्वरा,
आमच्या कुटुंबातील सर्व मृत बंधू आणि भगिनीची, दया कर. त्यांची सर्व पापातून सुटका कर आणि तुझ्या अनंत आणि पुनरुथित
जीवनात त्यांना सहभागी कर म्हणून आम्ही प्रार्थना करतो.
