Reflections for the homily of the Fifth Sunday In Ordinary Time (05/02/2023) by Fr. Benher Patil.

सामान्य काळातील पाचवा रविवार

दिनांक: ५/२/२०२३

पहिले वाचन: यशया ५८: ७-१०

दुसरे वाचन: करिंथकरांस पहिले पत्र २: १-५

शुभवर्तमान: मत्तय ५: १३-१६

विषय: तुम्ही जगाचे मीठ आणि प्रकाश आहेत.

प्रस्तावना:

आज आपण सामान्यकाकाळातील पाचवा रविवार साजरा करत आहोत. आजची उपासना आपल्यला ख्रिस्ती जबाबदारी आणि कर्तव्ये ह्यांची ओळख करून देते आणि ती पार पाडण्यास निमंत्रित करते. ह्या जगात ख्रिस्ताचे शिष्य म्हणून वास्तव्य करत असताना आपण आपलं जीवन मिठाप्रमाणे आणि प्रकाश्याप्रमाणे, लोकांच्या हितासाठी, परोपकारासाठी खर्ची घालणे ह्यातच आपला परमार्थ आहे ह्याची जाणीव करून देते. यदाकदाचित आपल्या कृत्याने किवा शब्दांनी, आपण सद्गुणी जीवन जगण्यास उणे पडलो असू, अथवा पापांच्या अंधकारात चाचपत पडले असल्यास, त्याबद्दल पश्चाताप करून देवाची क्षमा मागुया.

मनन चिंतन:

एकदा एका लहान मुलाला त्याच्या आईने प्रसिद्ध देऊळ/चर्च पाहण्यासाठी नेले. खिडक्यांवर विविध नावाजलेल्या ख्रिस्ती-पंडित व साधू-संतांची चित्रे रेखाटलेली होती. काचेच्या खिडक्यांमधून चमकणारे सूर्यकिरण पाहत असताना त्याने आईला विचारले, “खिडक्यावरील ती लोकं कोण आहेत?” ती म्हणाली, "ते संत आहेत." लहान मुलाने खिडकीकडे बघितले आणि आईला म्हणाला, “ठीक आहे, आता मला समजले की, संत काय किवा कोण असतात. ते असे लोक आहेत कि ज्यांनी प्रकाश चमकू दिला आहे.”

      आज आपण ज्या जगात राहतो ते दुर्दैवाने वेगवेगळ्या समस्यांनी, चिंतांनी आणि संकटांनी ग्रासलेले जग आहे. ह्या जगातील लोक भ्रष्टाचार, अहंकार, लोभ, अन्याय, अत्याचार आणि पापरुपी अंधकारात खितपत पडले आहेत. त्याचं वैयक्तिक आणि सामाजिक जीवन नैराश्यान भरून, एकप्रकारे बेसूर, बेचव, आणि अर्थहीन झालं आहे. अश्या परिस्थितीत ख्रिस्त आपणास आपली ख्रिस्ती भूमिकाची जाणीव करून देतो. आजच्या शुभवर्तमानात तो दोन रूपकांचा वापर करून, आपणास पृथ्वीचे मिठ आणि जगाचा प्रकाश बनण्यास आमंत्रण करतो. आपण कश्या प्रकारे आपली ख्रिस्ती भूमिका/जबाबदारी पार पडू शकतो?

      आपण मीठाचे गुणधर्म आपल्या संपूर्ण जीवनात जोपासले पाहिजे. पहिल्याप्रथम, मीठ हे शुद्धतेचे प्रतीक आहे. ते प्राचीनकाळी  यज्ञांमध्ये वापरले जात असे.  त्यावरून ख्रिस्ती माणसाने आपल्या बोलण्यात, आचरणात आणि विचारातही शुद्धतेचे उदाहरण असले पाहिजे असे सूचित होते.  दुसरं म्हणजे, मीठ हे जंतुनाशक असून आरोग्यदायी घटकांनी भरलेले आहे, त्याचप्रमाणे ख्रिस्ती माणसाचा इतरांच्या जीवनावर आणि समाजावर विशिष्ट प्रभाव असणे आवश्यक आहे: भ्रष्टाचाराचा पराभव करणे, अन्यायाविरुद्ध लढणे आणि इतरांना पाप करण्यापासून परावृत्त करणे म्हणजेच पृथ्वीचे मीठ बनणे होय. आणखीन एक मिठाचा गुणधर्म म्हणजे मीठ खाद्यपदार्थांचे रक्षण करते, त्याप्रमाणे आपण येशूने आपल्याला दिलेली धार्मिक श्रद्धा, ख्रिस्ती  सांस्कृतिक मूल्ये आणि नैतिक तत्त्वे जतन करणे आवश्यक आहे.  दैनदिन भोजनात मीठ हे अन्न रुचकर आणि स्वादिष्ट बनवण्यासाठी वापरले जाते. त्याचप्रमाणे ह्या जगात जे लोक निराशित आणि हताश आहेत त्यांचे मनोबल वाढवून, त्यांना मदत करून त्यांच्या जीवनात आशेचा किरण बनण्यास आपण झटले पाहिजे.

      प्रकाश हा परोपकारी आहे, त्याच्यामुळे आपण पाहू शकतो. तो आपल्याला अंधकारात मार्गदर्शन करतो आणि थंडीच्या दिवसात उब देतो. त्याचप्रमाणे आपणसुद्धा लोकसेवा आणि जनहित, परोपकारी आणि निस्वार्थी भावनेने करण्यास आपल्याला प्रेरणा देतो. आजच्या पहिल्या वाचनात, प्रभु देव त्याचा संदेष्टा यशया द्वारे आपल्याला शिकवतो की आपण देवाचा प्रकाश आपणाद्वारे कसा चमकू देऊ शकतो? “तुमची भाकर भुकेल्यांना वाटून घ्या, अत्याचारित आणि बेघरांना आश्रय द्या; जेव्हा तुम्ही त्यांना नग्न पाहता तेव्हा त्यांना कपडे घाला आणि स्वतःहून त्यांच्याकडे पाठ फिरवू नका. मग अंधारात तुमच्यासाठी प्रकाश उगवेल आणि अंधार तुमच्यासाठी दुपारप्रमाणे होईल” (यशया ५८:७, १०). जगाला प्रकाश देण्यासाठी आपणास पहिल्या प्रथम ख्रिस्ताचा प्रकाश प्राप्त करणे गरजेचे आहे. ख्रिस्त जगाचा खरा प्रकाश आहे, त्याच्या पावलावर पावूल ठेऊन आपण समाजात प्रेम, दयाळूपणा, चांगुलपणा, क्षमा, नम्र सेवा आणि आदरयुक्त जीवनाने इतरांना प्रेरित केले पाहिजे. त्याचप्रमाणे द्वेष्य,  पूर्वग्रह, आणि मत्सर यांच्यामुळे निर्माण झालेला अंधार दूर करणे आपले कर्त्यव आहे.

      जेव्हा आपण मिठाप्रमाणे आणि प्रकाशाप्रमाणे दुसऱ्याच्या गरजेस धावून येतो आणि सत्कर्माने, सदाचाराने जीवन जगतो, तेव्हा आपण स्वता:चे आणि इतरांचे जीवन रुचकर आणि प्रकाशमान करत असतो आणि अश्याप्रकारे आपण देवाचा गौरव प्रगट करतो.

विश्वासू लोकांच्या प्रार्थना:

प्रतिसाद: हे प्रभू, आम्हाला पृथ्वीचे मीठ आणि प्रकाश बनव.

१. सर्व ख्रिस्ती लोकांनी, प्रत्येक परोपकारी कृतीत, प्रेरणादायी शब्द आणि प्रेमळ हावभावात आपला ज्याच्यावर अढळ विश्वास आणि जिवंत आशा आहे, अश्या प्रभु येशूला, म्हणजेच जगाच्या प्रकाशाला अधिक स्पष्टपणे चमकू द्यावे म्हणून आपण प्रार्थना करूया.

२. अखिल ख्रिस्तसभेच्या पुढाऱ्यांनी, जगात ऐक्यासाठी मध्यस्थी करावी आणि जगात शांतता, न्याय, समता आणि समेट घडवून आणण्यास आपले जीवन चिकाटीने आणि प्रेमाने समर्प्रीत करावे म्हणून प्रार्थना करूया.

३. जे कोणी जीवनात निराश आहेत, आजारी, अस्वस्थ व अंधकारात आहेत त्यांनाही  तारणदायी येशूच्या प्रेमाचा व शांतीचा अनुभव यावा व  त्यांचे जीवन आनंदाने आणि आशीर्वादाने भरावे, तसेच त्यांच्या जीवनात बदल घडून यावा म्हणून आपण प्रार्थना करूया.

४. आमची कुटुंबे, स्वागतार्ह आणि आदरातिथ्य करणारी, विश्वासात शिक्षण देण्यास आणि आशेने स्वतःचे पोषण करण्यास सक्षम असावीत आणि खऱ्या ख्रिस्ती जीवनास साजेशी अशी इतरांना चांगली प्रेरणा आणि प्रोस्ताहन देणारी असावीत म्हणून प्रार्थना करूया.

 

Reflection for the Homily for Fourth Sunday In Ordinary Time (29/01/2023) By  Fr. Suhas Pereira.

सामान्य काळातील चौथा रविवार

दिनांक: २९/०१/२०२३

पहिले वाचन: सफन्या २:३, ३:१२-१३

दुसरे वाचन: पौलचे करिंथकरांस पहिले पत्र १: २६-३१

शुभवर्तमान: मत्तय ५: १- १२

प्रस्तावना:

प्रिय बंधू-भगिनींनो, प्रत्येक मनुष्याला आपल्या जीवनात आनंद हवा-हवासा असतो. प्रत्येक मनुष्याला आनंदी जीवन जगायचे असते. परंतु प्रत्येक मनुष्याची आनंदाची व्याख्या आणि कल्पना वेगवेगळी असते. खरा आनंद काय आहे? आज आपण सामान्य काळातील चौथा रविवार साजरा करत आहोत. आजची तिन्ही वाचने आपणास सांगत आहेत कि, खरा आनंद आपल्याला परमेश्वरच देऊ शकतो. तोच खऱ्या आनंदाचा स्रोत आहे. म्हणून ऐहिकतेमध्ये खरा आनंद न शोधता केवळ परमेश्वराकडून येणाऱ्या खऱ्या आनंदाचा शोध घेण्यासाठी आणि जीवन जगण्यासाठी आजची उपासना आपल्याला पाचारण देत आहे. आजच्या पहिल्या वाचनात संदेष्टा सफन्या आपल्याला सांगतो, कि जे लीनता आणि नम्रतेने परमेश्वराचा शोध घेतात आणि त्याच्या आज्ञा पाळून त्याचीच सेवा करतात अशांना खऱ्या शांतीचा आणि आनंदाचा अनुभव येईल. आजच्या दुसऱ्या वाचनात संत पौल करिंथ येथल्या लोकांना देवाने त्यांना केलेल्या पाचारणाची आठवण करून देतो आणि त्यांना ऐहिकता आणि नैतिकता यांमधील फरक दाखवून देतो. आजच्या शुभवर्तमानात प्रभू येशू आपल्याला खऱ्या आणि चिरकाल टिकणाऱ्या आनंदाकडे जाणाऱ्या मार्गाबद्दल बोध करत आहे.

मनन चिंतन:

अस्सिसीकर संत फ्रान्सिस ह्याला परमेश्वराची हाक ऐकू आली, त्या क्षणापासून त्याने शुभवर्तमानात प्रभू ख्रिस्ताचे, "जा आणि तुज्याजवळ जे आहे ते सर्व गरिबांना दे" हे आव्हान स्वीकारले. परमेश्वराच्या आणि देवाच्या नजरेत खरोखर मुक्त होण्यासाठी, सर्व मानवी आणि ऐहिक हाव आणि लोभापासून मुक्त होण्यासाठी एके दिवशी तो गोर-गरिबांना आपला पैसा वाटत असताना सिल्वेस्टर नावाचा एक धर्मगुरू त्याचं निरीक्षण करत होता. त्याच वेळेला त्याला आठवण झाली कि त्याने फ्रांसिसला देऊळाचा जीर्णोद्धार करण्यासाठी दगड दिलेले होते. आता फ्रांसिसला गरिबांना पैसे वाटताना पाहून, आपणसुद्धा संधीचा फायदा घ्यावा आणि आपण दिलेल्या दगडाच्या मोबदल्यात पैसे मिळवावेत अशी इच्छा त्याच्या मनात उत्पन्न झाली आणि तो लगेच फ्रांसिसकडे गेला. फ्रांसिसने मात्र त्याला क्षणाचाही विलंब न करता एक बटवाभर सोन्याची नाणी दिली. सिल्वेस्टरला अत्यानंद झाला आणि तो घरी गेला कारण तो अचानक खूप श्रीमंत झाला होता. परंतु त्याला मात्र मनातल्या मनात चांगलं वाटत नव्हतं. त्याचा अंतरात्मा त्याला सांगत होता, कि त्याने चूक केलेली होती: "मी एक धर्मगुरू आहे, वडीलधारी आहे तरीसुद्धा मला पैशाचा खूप मोह आहे. फ्रान्सिस हा तरुण आहे, धर्मगुरूसुद्धा नाही तरीसुद्धा त्याला पैशाचा मोह नाही आणि तो शुभवर्तमानात प्रभू येशूची शिकवण तंतोतंत पळत आहे." त्याच क्षणी सिल्वेस्टर त्याला मिळालेला सोन्याच्या नाण्यांचा बटवा घेऊन फ्रांसिस्कडे गेला आणि त्याला तो परत केला आणि विचारलं: "मी तुझ्याप्रमाणे प्रभू येशूचा खरा शिष्य होऊ शकतो का?" अशा प्रकार सिल्वेस्टरच्या जीवनाचा कायापालट झाला आणि तो अस्सिसीकर फ्रांसीसचा एक महत्वाचा साथीदार बनला.

फ्रान्सिस ज्याप्रमाणे शुभवर्तमानाची शिकवण जगला त्याप्रमाणे आपण जगू शकणार नाहीत. आपण फ्रान्सिस नाहीत. आजचं शुभवर्तमान आपल्याला आमंत्रण देत आहे.: “जे आत्म्याने दीन ते धन्य, कारण स्वर्गाचे राज्य त्यांचे आहे." असं म्हणतात कि अस्सीसीकर संत फ्रान्सिस जितका गरीब बनला, तितकाच जास्त आनंद, खरा आनंद तो अनुभवू शकला. कारण इतरांना आपल्याकडील सर्वकाही देण्याच्या त्याच्या वृत्तीमुळे तो स्वार्थत्यागी बनला. आजच्या शुभवर्तमानात धन्यवाद आपल्याला स्वार्थत्यागी, आत्मत्यागी, नम्र, लीन, दीन, दयाळू, नीतिमान आणि शांतीप्रिय बनण्यासाठी  आणि त्याद्वारे खऱ्या आणि परिपूर्ण आनंदाचा उपभोग घेण्यास आमंत्रण देत आहेत. आजचं शुभवर्तमान जणूकाही सर्वकाही उलटंच पाहत आहे. आजच शुभवर्तमान गरीब, दीन, दुःखी, नम्र, शोक करणारे, छळ होणाऱ्या आणि निंदा-नालस्ती होणाऱ्या लोकांना धन्य म्हणत आहे. कारण प्रभू येशू ख्रिस्त सांगतो, कि स्वर्गाचे राज्य अशा लोकांचेच आहे. प्रभू येशू जणूकाही नवीन आज्ञाच देत आहे. मोशेने ज्याप्रमाणे सियोन पर्वतावरून देवच्या दहा आज्ञा लोकांना दिल्या, त्याप्रमाणे प्रभू येशू आजच्या शुभवर्तमानात डोंगरावर गेला आणि त्याने जणूकाही लोकांना स्वर्गराज्यातील प्रवेशासाठी आवश्यक नियमावली सांगितली.

परंतु आपल्याला प्रश्न पडेल कि, नम्र, दीन, दुःखी, शोक करणारे, ज्यांचा छळ होतो, ज्याची निंदा होते अशी लोकं धन्य कशी असू शकतात? कारण, त्यांच्या अशा वाईट परिस्थितीमध्येच परमेश्वराचं प्रेम अनुभवण्याची आणि त्यांचं हृदय आणि जीवन दैवी प्रेमाने भरून घेण्याची कृपा आणि क्षमता त्यांना लाभते. आपल्या सभोवतालीसुद्धा अशी लोकं आहेत जी गरीब आहेत, दीन आहेत, ज्यांच्या जीवनात दुःखच आहे. तरीसुद्धा अशी लोकं मात्र आपल्या सभोवताली हास्य, आनंद, प्रेम पसरवत असतात, जगाला आनंद देतात. प्रभू येशू ख्रिस्ताचे जीवन हेच आपल्यासाठी सर्वश्रेष्ठ उदाहरण आहे. आजच्या शुभवर्तमानात सर्व धन्यवाद प्रभू येशू आपल्या जीवनात जगला. त्याच प्रभू ख्रिस्ताचे अनुकरण आपण करू या. आजचं शुभवर्तमान आपल्याला एक उदार जीवन जगण्याची प्रेरणा देत आहे. आणि आपण आजच्या शुभवर्तमानात धन्यवाद आपल्या जीवनात जगताना जरी अनेक वेळा अपयश आपल्या पदरी पडलं तरीसुद्धा आपण नाउमेद न होता, प्रयत्न करावेत आणि पुन्हा एकदा नवीन सुरुवात करावी म्हणून आजची उपासना आपल्याला बोध करत आहे.

विश्वासू लोकांच्या प्रार्थना:

जो प्रभू येशूचा आदर्श घेऊन, त्याने दाखवलेल्या मार्गावर जीवनक्रमण करतो तो खऱ्या

 आणि परिपूर्ण आनंदाचा अनुभव घेऊ शकतो. त्याच प्रभू ख्रिस्ताद्वारे आपण आपल्या

 गरज देवपित्याच्या चरणाशी मांडू या.

प्रतिसाद: हे प्रभो आमची प्रार्थना ऐकून घे.

१) हे प्रभो देऊळमातेच्या सर्व सेवकांनी नम्र बनून प्रभूची सुवार्ता पुढे ठेवत असलेल्या आव्हानांचा स्वीकार करावा आणि प्रभूच्या सुवार्तेचे निष्ठावंत सेवक बनावे, म्हणून आम्ही आज प्रार्थना करतो.

२) हे प्रभो, दुःख, अन्याय, हिंसा आणि भ्रष्टाचाराने भरलेलं आमचं जग या सर्व गुलामगिरीतून मुक्त व्हावं आणि आमच्या जगात तुझ्याकडून येणारी शांती प्रस्थापित व्हावी म्हणून आम्ही आज प्रार्थना करतो.

३) हे प्रभो, शारीरिक आणि मानसिक आजाराने ग्रासलेल्या आमच्या सर्व बंधू-भगिनींना तुझ्या कृपेचा गुणकारी स्पर्श व्हावा आणि त्यांना नवीन अरींगचे आणि जीवन लाभावे, म्हणून आम्ही प्रार्थना करतो.

४) हे प्रभो तुझ्यावरील विश्वासात जीवन जगून, हे जग सोडून गेलेल्या आमच्या बंधू-

भगिनींना स्वर्गाचे सुख लाभावे म्हणून आम्ही आज प्रार्थना करतो.

       Reflections for the homily of the Third Sunday In Ordinary Time (22/01/2023) by Br. Jostin Pereira  

सामान्य काळातील तिसरा रविवार

दिनांक: २२/०१/२०२३

पहिले वाचन: यशया ८: २३ - ९: ३

दुसरे वाचन: पौलचे करिंथकरांस पहिले पत्र १: १-३

शुभवर्तमान: मत्तय ४: १२- २३

विषय: “माझ्या मागे या.”

प्रस्तावना:

 माझ्या प्रिय बंधू आणि भगिनींनो आज देऊळमाता सामान्य काळातील तिसरा रविवार साजरा करीत आहे. आज पवित्र ख्रिस्तसभा प्रभूशब्द रविवार साजरा करत आहे. आजची उपासना ही सूचना कार्यावर विश्वास ठेवण्यास पश्चाताप करूण चांगल्या मार्गावर चालण्यास बोलावित आहे.

स्नान-संस्कारद्वारे आपण सर्वजण देवाच्या राज्यात सहभागी झालो आहोत. त्यासाठी देवाच्या शब्दाप्रमाणे वागण्यास आणि देवाचा शब्द दुसऱ्यांपर्यंत पसरविण्यास व तशीच लोकांची सेवा कार्य करण्यासाठी पाचारण करत आहे. आज आपण ह्या पवित्र मिस्साबलीदानात सहभागी होत असता आपली अंतकरणने साफ करू; आपण देवाचा शब्द ऐकण्यास आणि ख्रिस्ताचे अनुयायी बनण्यासाठी परमेश्वराकडे प्रार्थना करूया.

मनन चिंतन:

देवाचें पाचारण सर्वाना लाभले आहे. परंतु आपले कार्य वेगळ्या प्रकारचे असून सर्वांचा हेतु एकच आहे आणि ते म्हणजे गोरगरिबांची सेवा. देवाचे कार्य मनापासून केल्यामुळे जीवन बदलून जाते. जेव्हा आपल्या जीवनाला प्रेरणा लाभते तो आनंद आपण पैशाने विकत घेऊ शकत नाही. हाच उपदेश आजच्या या तीनही वाचानाद्वारे मिळतो. आजच्या पहिल्या वाचनात यशया संदेष्ठा इस्रायली लोकांच्या जीवनातील अंधारी बाजू सादर करीत आहे. या अंधारात बसलेले लोक लवकरच मोठा प्रकाश पाहणार आहेत, असा आशीर्वाद यशया संदेष्टा देतो. त्यानंतर मात्र त्याच्या वाट्याला जो परिपूर्ण आनंद येणार आहे त्यांची तुलना शत्रूंवर विजय, गुलामगिरीतून मुक्तता या सर्व प्रसंगीं होणाऱ्या आनंदाशी करण्यात आलेला आहे. असा आनंद खाजगी स्वरूपाचा नसतो; तो इतरांबरोबर राहूनच मिळविता येतो. परमेश्वर मानवाला अशा सामुदायिक आनंदासाठी पाचारण करतो.

दुसऱ्या वाचनात करिंथ येथल्या ख्रिस्ती लोकांमध्ये पडलेली फूट आपण पाहतो. संत पौलाने त्यांना येशूची सुवार्ता सांगितल्यानंतर अपोलो नावाचा प्रभावी वक्ता अवतरला. त्यानंतर जेरुसलेममधून संत पेत्राच्या अधिकाराचा बोंबाटा करणारी मंडळी आली. पेत्र, पौल, अपोलो यांना माननारे तीन गट पडले. चौथ्या गटाने ख्रिस्ताच्या झेंड्याखाली रहाणे पसंत केले. ह्या सर्वांना सुवार्ता प्रसाराचा यशासाठी एकत्र द्यावे असे आव्हान पौलाने केलेले आहे.

आजच्या शुभवर्तामानामध्ये दोन भाग आहेत. पहिल्या भागात येशु सर्वांना अंधार आणि प्रकाशाबद्दल सांगितले आहे. मरणाचे सावट असलेल्या प्रदेशात राहणाऱ्या लोकांसाठी प्रकाश उतरला आहे. एक अंधकारमुक्त जीवन जगण्याची आणि ज्या गोष्टीमुळे आपलं जीवन अंधूकमय प्रकाशरहित बनतात अशा गोष्टींपासून मुक्त अस जीवन जगण्याची आशा आपल्याला सर्वांमध्ये, आपल्या हृदयात खोल दडलेली आहे. परंतु आपल्या जीवनावर अंधकाराचे वर्चस्व सुद्धा आहे. आणि हा अंधकार वेगवेगळ्या तर्हेने आणि वेगवेगळ्या रूपात आपल्या जीवनाचा ताबा घेतो. अनेक वेळा आपण इतर लोकांविषयी विचार करतो व ते जगत असलेल्या जीवनाविषयी बोलताना सांगतो की, ही लोकं अंधकारात पाप करून गरीबांचा छळ करतात. अंधकारात राहता त्यांच्या जीवनावर मृत्यूरूपी अंधकाराचे सावट आहे.  

दुसऱ्या भागात प्रभू येशू शिष्यत्वासाठी पाचारण करतो. इतरांचे नेतृत्व करण्यासाठी त्यांना स्वतःचा व्यवसाय सोडून देण्यास सांगत आहे. प्रभू येशू लोकांना स्वर्गीय शांती प्रदान करून त्याद्वारे एकमेकांना स्वर्गीय पित्याची लेकरे बनविण्यासाठी आलेला होता. लोकांना तारणाचा प्रकाशाचा अनुभव यावा म्हणून प्रभू येशू लोकांना पश्चातापाबद्दल उपदेश करतो, “पश्चाताप करा, कारण स्वर्गाचे राज्य जवळ आले आहे.” आणि लोकांना त्याच्या उपदेशाचा बोध व्हावा म्हणून प्रभू येशू त्यांना फक्त शब्दांद्वारे बोलत नाही, तर देवच राज्य ह्या जगात कस येऊ शकते हे तो त्यांना दाखवतो. त्याला आजार्याबद्दल, गरीब आणि अपेक्शितांबद्दल आस्था वाटतो. तो लोकांमध्ये आपण सर्व एक कुटुंब – बंधू- भगीणी आहोत अशी भावना जोपासतो. अशा प्रकारे प्रभू येशू स्वर्ग राज्य या जगात प्रस्थापित करतो आणि अंधारात चाचपडत असलेल्या जगाला प्रकाश देतो. जेथे अंधार आहे तेथे प्रकाश आणणे, हाच प्रभू येशूचा मिशन कार्याचा हेतू होता. आपल्या जीवनातील अंधकारावर मात करून आपण प्रभू येशूचा प्रकाश त्याच्या प्रेमाचा संदेश आणि त्याचा तारणाचं दान आपल्या जीवनात यावं म्हणून आपण आजच्या मिस्साबलिदानामध्ये प्रभू येशू ख्रिस्ताकडे प्रार्थना करूया.

 

 

विश्वासू लोकांच्या प्रार्थना:

प्रतिसाद: “हे प्रभो, तुझ्या पाचारणास होकार देण्यास आम्हांला शिकव!”

१) आपल्या ख्रिस्तसभेची आध्यात्मिक काळजी घेणारे आपले पोप महाशय, कार्डीनल्स, बिशप्स, धर्मगुरू-धर्मभगिनी आणि सर्व प्रापंचिक ह्या सर्वावर देवाच्या कृपेचा वर्षाव व्हावा व त्यांच्या कृतीतून देवाचे प्रेम लोकांकडे पोहचावे म्हणून आपण प्रार्थना करू या.

२) आपल्या धर्मग्रामात जे कोणी आजारी आहेत. अशा सर्व आजारी लोकांना परमेश्वरी कृपेचा स्पर्श होऊन त्यांची आजारातून सुटका व्हावी म्हणून आपण प्रार्थना करू या.

३) आज आपण आपल्या देशासाठी प्रार्थना करूया की, देशभर पसरलेली अशांतता नष्ट व्हावी व सर्वत्र शांतता व सलोखा नांदावा म्हणून आपण प्रार्थना करू या.

४) आपल्या सर्व राजकीय पुढाऱ्यांनी व अधिकाऱ्यांनी आपला स्वार्थ बाजूला ठेऊन सतत देशाच्या उन्नतीसाठी व प्रगतीसाठी झटावे म्हणून आपण प्रार्थना करू या.

५) येशू ख्रिस्त आपल्या आई-वडीलांच्या आज्ञेत राहिला व त्यांना मान व सन्मान दिला. आज मुल-मुली आई-वडिलांना अपशब्द बोलतात व दु:खवितात अशा मुला-मुलींना ईश्वराचे प्रेम मिळावे, जेणेकरून ही मुल-मुली आपल्या आई-वडिलांचा आदर राखतील म्हणून आपण प्रार्थना करू या.

७) आता थोडा वेळ शांत राहून आपल्या आपल्या वैयक्तिक, कौटुंबिक व सामाजिक गरजांसाठी प्रार्थना करूया.