Reflections for the homily for 6^th Sunday of Easter (26-05-2019) by Br. Lipton Patil 

पुनरुत्थान काळातील सहावा रविवार

दिनांक: २६/०५/२०१९

पहिले वाचन: प्रेषितांची कृत्ये १५:१-२, २२-२९

दुसरे वाचन: प्रकटीकरण २१:१०-१४, २२-२३

शुभवर्तमान: योहान १४:२३-२९

“पवित्र आत्मा तुम्हांस सर्व शिकवील”

प्रस्तावना:

          आज आपण पुनरुत्थित काळातील सहावा रविवार साजरा करीत आहोत. आजच्या उपासनेतून आपल्याला ख्रिस्ताच्या प्रीतीची महती ऐकावयास मिळत आहे. ख्रिस्त हा जगाचा तारणारा आहे, असे आपल्याला आजच्या उपासनेतून कळून येते.

          आजचे पहिले वाचन प्रेषितांची कृत्ये ह्या पुस्तकातून घेतलेले असून ह्या वाचनात आपण ऐकणार आहोत की, यहुदिया प्रांतातून काही माणसे अंत्युखियास आली व शिक्षण देऊ लागले व शिक्षण देत असता ते म्हणाले की, तुमची सुंता झालेली नसेल, तर तुमचे तारण होणार नाही. प्रकटीकरणातून घेतलेल्या दुसऱ्या वाचनात आपणास – प्रेषित योहान आत्म्याने भरून जातो तेव्हा देवदूत त्याला उंच पर्वतावर घेऊन जातो व पवित्र नगर यरुसलेम, स्वर्गातून देवापासून खाली उतरताना त्याला दिसले व ते नगर देवाच्या गौरवाने झळकत होत – ह्याविषयी ऐकावयास मिळते. योहानलिखित शुभवर्तमानात येशू सांगतो की, जो कोणी माझ्यावर प्रीती करतो, तो माझी शिकवण पाळील व माझा पिता त्याच्यावर प्रीती करील आणि पवित्र आत्मा जो सहाय्यकर्ता  आहे तो मी पाठविन असे आश्वासन प्रभू येशू आपणास देत आहे.

          आजच्या मिस्साबालीदानात सहभाग घेत असताना आपण एकमेकांवर येशूप्रमाणे प्रीती करण्यास आपणास पवित्र आत्म्याचे वरदान लाभावे म्हणून आपण प्रार्थना करूया.  

  

बोधकथा:

          एक कुटुंब होत, या कुटुंबात वडील नेहमी दारू पिऊन घरातील मुलांना व बोयकोला मारीत असे, व नेहमी घरात भाडण होत असे. घरात अशांतीचे वातावरण निर्माण झाले होते. घरातील सर्व माणसे खूप कंटाळून गेली होती. काय करायचे, हे घरातील माणसाना समजत नसे. मग घरातील माणसे धर्मगुरू कडे गेली व धर्मगुरूना सर्व घरातील हकीकत सागितली. तेव्हा धर्मगुरूनी घरातील माणसांना पवित्र आत्म्याकडे प्रार्थना करायला सागितली. घरातील माणसानी त्या दिवसापासून घरी येऊन पवित्र आत्म्याकडे प्रार्थना करायला सुरवात केली. थोड्या दिवसानंतर ह्या वडिलामध्ये बदल घडून आला. या व्यक्तीमध्ये बदल झाला. हळूहळू वडीलसुध्दा प्रार्थनेसाठी बसू लागला आणि त्याने दारू प्यायची सोडून दिली. त्याला जाणीव झाली की, दारूमुळे त्यांच्या घरात खूप अडचणी येत होत्या. आणि घरातील शांती हरवलेली होती. प्रार्थनेमुळे आता ह्या माणसाच्या जीवनात परिवर्तन झाले होते. घरातील सर्व माणसे पुन्हा एकदा आनंदात जीवन जगू लागली.

मनन चिंतन:

          आजच्या उपासनेतून आपणाला कळून येते की, ख्रिस्त आपणाला पवित्र आत्मा पाठवणार आहे. पवित्र आत्मा आपल्याला ज्ञान, समजूतदारपणा व देवाच्या वाचनावर मनन चिंतन करायला आमंत्रण देणार आहे. जेव्हा ख्रिस्ताचा पृथ्वीवरील सेवेचा अंत जवळ येत होता, तेव्हा ख्रिस्ताने पवित्र आत्मा पाठवण्याचे वचन दिले. पवित्र आत्मा आम्हाला प्रबुद्ध करणारे तेजस्वी गौरव आहे. जर आपण त्याच्याशी निष्ठावान राहिलो, तर तो या जगाद्वारे आपल्या सर्व निर्णयांमध्ये आणि मार्गांनी मार्गदर्शन करेल आणि आपल्या जीवनात चांगल्या प्रकारचे पवित्र असे जीवन जगण्यास आपणास मदत करील. प्रेषितांची कृत्ये ह्या वाचनामध्ये आपणाला समजते की, प्रेषितांनी पवित्र आत्म्याचा सल्ला घेऊन निर्णय घेतले. तसेच, पवित्र आत्म्याशिवाय ते कोणतेही गंभीर कार्य करू शकले नाहीत. त्यांच्या वाटयाला खूप अडचणी, दुःख व नैराश्य आले हे सर्व सहन करण्याची ताकद त्यांना पवित्र आत्माकडून मिळाली. जर आपणाला दुःखावर मात करयाची असेल, तर पवित्र आत्म्याच्या सानिध्यात राहिलो पाहिजे. तसेच दुसऱ्या वाचनात आपण एकले की, योहान जर काही पाहू शकला, तर ते फक्त पवित्र आत्म्याचा योगाने. “आत्म्याने मला प्रचंड पर्वताच्या शिखरावर नेले” अर्थात, पवित्र आत्म्याच्या मदतीने योहान हे सर्व काही पाहू शकत होता.

          शुभवर्तमानामध्ये, ख्रिस्त त्याच्या पित्याकडे परत जात असताना त्याने आपल्या शिष्याकडे पवित्र आत्मा पाठविण्याचे वचन दिले. पवित्र आत्मा ही येशूची शक्ती आहे आणि तरी ही, त्रैक्यामधील एक व्यक्ती आहे. तथापि, याचा अर्थ असा नाही की त्याचे युग संपत आले आहे, कारण तो सर्वकाळ प्रभु आहे. त्याऐवजी, याचा अर्थ असा की, आम्हाला अनाथ सोडत नाही. या रविवारी, येशू आपल्याला आश्वासन देतो की, पवित्र आत्मा आपल्याला शिकवेल आणि त्याने आम्हाला जे काही शिकवले होते त्याविषयी आठवण करून देईल. जर आपण आपल्या संकटांपासून वाचले पाहिजे, तर आपण पवित्र आत्म्याचे भागीदार बनले पाहिजे. जेव्हा देवाचा पवित्र आत्मा आपल्यावर असतो, तेव्हाच आपण दाविदाप्रमाणे गाऊ आणि नाचू शकतो. केवळ पवित्र आत्म्याच्या मदतीने आम्ही प्रेषितांप्रमाणेच सुवार्ता सांगू शकतो. याचे कारण असे आहे की, “पवित्र आत्म्याच्या सामर्थ्याशिवाय कोणीही येशू प्रभु आहे असे म्हणू शकत नाही.” केवळ पवित्र आत्म्याच्या मार्गदर्शनाद्वारेच आपण या जीवनातील संघर्षांना तोंड देऊ शकतो आणि आपल्या मिशनरी कार्यामध्ये यशस्वी होऊ शकतो. म्हणूनच, जर आपण त्याला पुढाकार घेण्याची परवानगी दिली, तर आपण चांगले जीवन जगू शकतो. जर आपण त्याला आपल्याला जीवनात राहण्यास आमंत्रण दिले, तर आपण चांगले जीवन जगू शकू. जर आपण त्याला आपल्याला शिकवण्याची परवानगी दिली, तर आपल्याला चांगले समजेल; आणि जर आपण त्याला प्रेरित करण्यास परवानगी दिली, तर आपण आपले ध्येय आपण साध्य करू.

          जो माझ्यावर प्रेम करतो, तो माझा शब्द पाळील. जर आपण येशूचे अनुकरण करू इच्छितो, तर आपण प्रभूवचन आपल्या शब्दांद्वारे आणि कृतीद्वारे आपल्या जीवनात जगणे आवश्यक आहे.

विश्वासू लोकांच्या प्रार्थना:

प्रतिसाद: पुनरुत्थित ख्रिस्ता, आमची प्रार्थना ऐक.

१. पुनरुत्थित ख्रिस्ताच्या प्रीतीची व शांतीची सुवार्ता अखंडितपणे पोहचविणारे आपले परमगुरुस्वामी, महागुरूस्वामी व सर्व धार्मिक अधिकाऱ्यांनी ह्या सर्वांना निरोगी स्वास्थ आरोग्य मिळून पुनरुत्थित त्यांनी ख्रिस्ताची सुवार्ता सर्वांना विशेष करून जे अज्ञात आहेत त्यांच्यापर्यंत पोहोचवावी म्हणून आपण पुनरुत्थित ख्रिस्ताकडे प्रार्थना करूया.

२. पुनरुत्थित ख्रिस्ताची प्रीती प्रत्येकाच्या कुटुंबात येवून कुटुंबात मंगलमय वातावरण निर्माण होवून, एक दुसऱ्यांना समजून घेवून दुरावलेले व तुटलेली कुटुंबातील नाती पुनरुत्थित ख्रिस्ताने पुन्हा एकदा एकत्रित करावीत म्हणून आपण प्रार्थना करूया.

३. जे लोक अतिशय आजारी आहेत अशा सर्वांना पुनरुत्थित ख्रिस्ताचा स्पर्श होवून त्यांची आजारातून मुक्तता व्हावी म्हणून आपण प्रार्थना करूया.

४. आपणा प्रत्येकाला प्रेमाची गरज आहे. कितीतरी लोक प्रेमासाठी आतुरलेले आहेत अशा सर्वांना पुनरुत्थित ख्रिस्ताच्या प्रेमाचा अनुभव यावा म्हणून आपण प्रार्थना करूया.

५. यंदाच्या वर्षी चांगला व योग्य पाऊस पडावा व शेतकऱ्यांना चांगले उत्पन्न मिळावे व सर्व आपत्ती व रोगराई पासून मानवजातीचे संरक्षण व्हावे म्हणून आपण पुनरुत्थित ख्रिस्ताकडे प्रार्थना करूया.

६. थोडा वेळ शांत राहून आपण आपल्या वैयक्तिक व सामाजिक गरजा प्रभूचरणी ठेवूया.

Reflections for the homily for 5^th Sunday of Easter 

(19-05-2019) by Br. Godfrey Rodriques 

पुनरुत्थान काळातील पाचवा रविवार

दिनांक: १९/०५/२०१९

पहिले वाचन: प्रेषितांची कृत्ये  १४:२१-२७

दुसरे वाचन: प्रकटीकरण २१:१-५

शुभवर्तमान: योहान १३:३१-३५

“जशी मी प्रीती केली तुम्हांवर, तशी प्रीती बरसात करा”

प्रस्तावना:

          आजच्या पुनरुत्थान काळातील पाचव्या रविवारी आपली देऊळमाता आपणा सर्वंना एकमेकांवर प्रेम करण्यास व देवाशी विश्वासू राहण्यास बोलावीत आहे.

          आजच्या पहिल्या वाचनात संत पौल व बर्नबा, हे त्यांच्या मंडळीबरोबर आपणा प्रत्येकाला सुध्दा संबोधून सांगत आहेत की, देवाच्या विश्वासात टिकून राहा. तर दुसऱ्या वाचनात संत योहान म्हणतो की, परमेश्वर आपल्या प्रत्येकाला नवीन आशेचा किरण दाखवत आहे. नवीन आकाश व नवीन पृथ्वी तो निर्माण करणार आहे. त्याचबरोबर आजच्या योहानलिखित शुभवर्तमानात प्रभू येशू ख्रिस्त त्याच्या शिष्यासोबत आपणा प्रत्येकाला सुद्धा बजावून सांगत आहे की, “जसे मी तुम्हांवर प्रेम केले, तसे तुम्ही ही एकमेकांवर प्रेम करा.”

          स्वतःवरच किंवा स्वार्थीवृत्तीचे प्रेम नव्हे, तर दुसऱ्यावर निस्वार्थी प्रेम करण्याचे आव्हान देव आपणास देत आहे. ह्या त्याच्या आव्हानाला न नाकारता गरजवंत व गरीब ह्यांच्यावर प्रेम करून त्यांच्या मदतीला धावून जाण्यास व देवाच्या प्रेमाची ज्योत सर्वत्र पसरविण्यास आपण पात्र ठरावे म्हणून ह्या पवित्र मिस्साबलीदानात प्रभूकडे विशेष प्रार्थना करूया.

सम्यक विवरण:

पहिले वाचन: प्रेषितांची कृत्ये  १४:२१-२७

          संत पौल व बर्नबा ह्यांनी अंत्युखिया व इकुन्या येथील ख्रिस्ती मंडळीला ख्रिस्ताची सुवार्ता सांगितली व बोधपर उपदेश केला. तेथे त्यांनी संपूर्ण घडलेला इतिहास त्यांना सांगितला होता व ख्रिस्ताला तारणदायी सुवार्ता घेवून पाठविले होते हे त्यांस त्यांनी पटवून दिले .

          संत पौल व बर्नबा ह्यांनी केलेल्या उपदेशावर ख्रिस्ती मंडळीनी विश्वास ठेवला. परंतु विरोधकांनी संत पौलावर दगडमार करून, तो मेला असे समजून त्यास नगराबाहेर काढतात. ह्या नगरात त्यांनी त्यांच्या उपदेशामार्फत  खूप शिष्य मिळविले होते. जेव्हा ते अंत्युखिया येथे पोहचतात, तेव्हा मंडळीस जमवून त्यांस देवाने केलेल्या सत्कृत्याची जाणीव करून देतात व परराष्टीय ह्यांना विश्वासाचे दार कसे उघडले हे कथन करतात.

दुसरे वाचन: प्रकटीकरण २१:१-५

          ख्रिस्ताने सर्व गोष्टी नवीन केल्या आहेत असे योहान म्हणत आहे. सर्वकाही बदललेले आहे, नवीन आकाश व नवीन पृथ्वी तो पाहत आहे. देवाने निर्माण केलेली पृथ्वी आणि आकाश ह्यात नुतानिकरण घडून येत आहे आणि ते ख्रिस्ताच्या पुनरुत्थानाने घडले आहे असे योहान प्रकट करत आहे. योहान पुढे म्हणतो की, देव  आपली वस्ती त्याच्याबरोबर करील. लोकांच्या डोळ्यातील अश्रू तो  पुसून  टाकील, ह्यापुढे मरण नाही, शोक, रडणे व कष्टही नाहीत, कारण ख्रिस्ताच्या पुनरुत्थानाने सर्वकाही नव्याने निर्माण झाले आहे.

शुभवर्तमान: योहान १३:३१-३५

          परमेश्वर इस्रायल लोकांस आज्ञा करतो की, तू आपला देव परमेश्वर ह्याच्यावर पूर्ण मनाने, पूर्ण जीवाने व पूर्ण शक्तीने प्रीती कर. ह्याच आज्ञेला ख्रिस्त नवीन अर्थ प्राप्त करून देतो. ख्रिस्त म्हणतो की, तू आपल्या देव परमेश्वर ह्याच्यावर पूर्ण मनाने, पूर्ण जीवाने व पूर्ण शक्तीने प्रीती कर व तशीच प्रीती आपल्या शेजाऱ्यावर कर.

मनन चिंतन:

          देवाने जगावर एवढी प्रीती केली की, त्याने आपल्या एकुलत्या एका पुत्राला ह्या जगात पाठविले, अशासाठी की, जो कोणी त्याच्यावर विश्वास ठेवतो त्याचा नाश होऊ नये, तर त्याला सार्वकालिक जीवन प्राप्त व्हावे. ख्रिस्त त्याच्या शिष्यांना म्हणतो की, मी तुम्हांस नवीन आज्ञा देतो, तुम्ही एकमेकांवर प्रीती करा. जशी मी तुम्हांवर प्रीती केली तशी तुम्ही ही एकामेकावर प्रीती करा.

          प्रभू ख्रिस्ताची प्रीती ही सर्वश्रेष्ठ आहे. कारण त्याने मरणापर्यंत प्रीती केली. आपल्या मित्रांकरिता आपला प्राण द्यावा ह्यापेक्षा कोणतीही मोठी प्रीती नाही. हे ख्रिस्ताने आपल्या मरणाद्वारे दाखवून दिले. आज ख्रिस्त आपणांस आपल्या देवावर, स्वतःवर आणि जसे स्वतःवर तसेच आपल्या शेजाऱ्यावर प्रेम करण्यास बोलवत आहे. इतकेच नव्हे, तर प्रेमासाठी आपण आपल्या प्राणाची आहुती देण्यास तयार असलो पाहिजे ह्याची आठवण आपणास करून देत आहे.

          एका शास्त्र्याने विचारलेल्या प्रश्नाला उत्तर देत ख्रिस्त म्हणतो, तू आपला देव परमेश्वर ह्याच्या वर पूर्ण मनाने, पूर्ण जीवानेआणि पूर्ण शक्तीने प्रीती कर. ही पहिली आणि सर्वात मोठी आज्ञा आहे. हिच्या सारखी दुसरी प्रीती कर. ख्रिस्त अतिशय हुशारगिने ‘शेजारी’ ह्या शब्दाचा वापर करतो. कारण स्वतःच्या नात्यात प्रेम व्यक्त करणे हे कोणालाही शक्य होऊ शकते, परंतु आपल्या नात्यात नसलेल्या माणसावर प्रेम करणे म्हणजे एक आव्हानच ठरते. ह्या आव्हानाला सामोरे जाण्यास व प्रेमाची ध्वजा सर्वत्र फडकविण्यास आज देऊळमाता पुन्हा एकदा आपणास बोलावत आहे.

          प्रेमाविषयी खूप अशी व्याख्याने व प्रवचने आपण ऐकली आहेत. खूप प्रेम ह्या विषयावर आपण मनन चिंतन केलेले आहे. परंतु खरच ते प्रेम कधी वास्तव्यात आणण्याचा प्रयत्न केला आहे का? हा प्रश्न मात्र आपण स्वतःने स्वतःला विचारायला हवा आणि जर उत्तर सकारात्मक असेल, तर उत्तम आणि नकारात्मक असेल, तर आजच तारणाचा दिवस आहे असे समजून एकमेकांवर प्रेम करण्यास आपण तत्पर असलो पाहिजे. लक्षात ठेवा की, ज्या देवाने केवळ प्रेमा खातर ह्या जगाची निर्मिती केली व प्रेमा खातर त्याच्या एकुलत्या एका पुत्राला ह्या भूतलावर पाठवले. तो देव आपले तारण त्या प्रेमाच्याच मापाने करणार आहे.       

विश्वासू लोकांच्या प्रार्थना:

प्रतिसाद: हे प्रभो, एकमेकांवर प्रेम करण्यास आम्हाला शिकव.

१. आपले परमगुरुस्वामी, महागुरूस्वामी व सर्व धार्मिक अधिकाऱ्यांनी त्यांच्या जीवनाद्वारे व कार्याद्वारे प्रभूचा अनुभव प्रत्येक भाविकापर्यंत पोहचवावा व सर्वांना ख्रिस्ताच्या प्रेमाचा अनुभव घेण्यास मदत करावी म्हणून आपण पुनरुत्थित ख्रिस्ताकडे प्रार्थना करूया.

२. जे निराश होऊन देवापासूनदूर गेलेले आहेत, त्यांना प्रभूने स्पर्श करावा व त्यांच्या जीवनात परिवर्तन घडून यावे व त्यांनी परत एकदा प्रभूने दाखविलेल्या मार्गावर चालावे आणि जीवनाचे सार्थक करावे म्हणून आपण पुनरुत्थित ख्रिस्ताकडे प्रार्थना करूया.

३. आपणा प्रत्येकाला प्रेमाची गरज आहे. प्रेम ही काळाची गरज आहे. म्हणून आपली प्रीती सर्वांचे हित साधणारी असावी. त्यात स्वार्थ व दुजाभाव नसावा. सर्वाबरोबर समेट, शांती व सलोखा असावा म्हणून आपण पुनरुत्थित ख्रिस्ताकडे प्रार्थना करूया.

४. आपल्या सर्व मिशनरी बंधू-भगिनींना त्यांचे कार्य जोमाने सुरु ठेवून प्रभूची सुवार्ता जगाच्या काना कोपऱ्यात पसरविण्यास सामर्थ्य व कृपा लाभावी म्हणून आपण पुनरुत्थित ख्रिस्ताकडे प्रार्थना करूया.

५. थोडा वेळ शांत राहून आपण आपल्या वैयक्तिक व सामाजिक गरजा प्रभूचरणी ठेवूया.

Reflections for the homily for 4^th Sunday of Easter

(12-05-2019) by Br. Isidore Patil

पुनरुत्थान काळातील चौथा रविवार

दिनांक: १२/०५/२०१९

पहिले वाचन: प्रेषितांची कृत्ये १३: १४, ४३-५२

दुसरे वाचन: प्रकटीकरण ७:९, १४ – १७

शुभवर्तमान: योहान १०:२७-३०

“परमेश्वर माझा मेंढपाळ आहे.”

प्रस्तावना:

         आज आपण पुनरुत्थान काळातील चौथा रविवार साजरा करीत आहोत. आजची उपासना आपल्याला ‘परमेश्वर आपला मेंढपाळ आहे आणि आपण त्याची मेंढरे आहोत’ ह्या विषयावर मनन चिंतन करण्यास आमंत्रण देत आहेत.

       आजच्या पहिल्या वाचनामध्ये संत पौल आणि बर्नबा ह्यांनी यहुदी आणि यहुदी मतानुसार चालणारे इतर धार्मिक लोक ह्यांना देवाच्या कृपेत टिकून राहण्यास कळकळीची विनंती केली आणि त्यासाठी देवाचे वचन ऐकण्यास त्यांस प्रोत्साहन केले. प्रकटीकरण ह्या पुस्तकातून घेतलेल्या दुसऱ्या वाचनात आपण सिंहासनाच्या मध्यभागी असलेल्या कोकराविषयी ऐकतो जो त्यांचा मेंढपाळ आहे. आणि शुभवर्तमानात ह्याच कोकराविषयी सांगितलेले आहे, हा मेंढपाळ दुसरा कोणी नसून आपला प्रभू येशू ख्रिस्त जो आपणा सर्वांचा उत्तम मेंढपाळ आहे व आपण त्याची मेंढरे आहोत ह्याची जाणीव आपणास आजची वाचने करून देत आहे.

         आजच्या प्रभू भोजनात सहभाग घेत असताना प्रभू येशूला आपला उत्तम मेंढपाळ म्हणून स्वीकारायला आणि त्याच्या कळपात राहायला लागणारी कृपा व सामर्थ्य ह्या पवित्र मिस्साबलिदानात मागूया. 

सम्यक विवरण:

पहिले वाचन: प्रेषितांची कृत्ये १३: १४, ४३-५२

          पौल व बर्नबा हे पिर्गापासून अंत्युखियास गेले व तेथे त्यांनी लोकांना परमेश्वराचे वाचन सांगितले. जेव्हा पौल व बर्नाबा तेथून जाऊ लागले, तेव्हा तिथल्या लोकांनी त्यांना आणखी परमेश्वराचे वचन सांगण्याचा त्यांना आग्रह केला. तेव्हा ते थांबून त्यांना परमेश्वरा विषयीच्या गोष्टी सांगू लागले. हे सर्व बघून तिथले काही यहुदी कुरकुर करू लागले. त्या यहुद्यांना त्याचा मत्सर वाटू लागला. त्यावर पौल व बर्नबा यांनी निर्भयपणे त्यांना म्हटले की, देवाचा संदेश तुम्हा यहुद्यांना प्रथम सांगितलाच पाहिजे, पण तुम्ही ऐकण्यास नकार देता. त्यामुळे तुम्ही तुमचे स्वतःचेच नुकसान करून घेता. पुढे पौल व बर्नबा सांगतात की, प्रभुने आम्हाला हे करण्यास सांगितले कारण प्रभू म्हणाला दुसऱ्या देशासाठी मी तुम्हांस प्रकाश असे केले यासाठी की, तुम्ही पृथ्वीवरील सर्व लोकांना तारणाचा मार्ग दाखवून शकाल. हे ऐकून त्या लोकांपैकी पुष्कळ लोकांनी संदेशावर विश्वास ठेवला.

दुसरे वाचन: प्रकटीकरण ७:९, १४ – १७

          ह्या दुसऱ्या वाचनात आपण पाहतो की सर्व राष्ट्रांचे, वंशाचे व सर्व प्रकारचे लोक सिंहासनावर बसलेल्या कोकरा सभोवती जमलेले आहेत. त्यांनी सर्वांनी त्यांची वस्त्रे कोकराच्या रक्ताने धुवून घेतलेली आहेत. त्यांना कुठलीही तहान किंवा भूक लागणार नाही. त्यांना त्रास होणार नाही सिंहासनाच्या मध्यभागी असलेले कोकरू त्यांचा मेंढपाळ आहे. तो त्यांच्या डोळ्यातील प्रत्येक अश्रू पुसून काढील. काळाच्या शेवटी सर्व प्रकारच्या दुखःचा पूर्णपणे नाश होऊन सुखाचा मार्ग तयार होईल हे सुचवले आहे.

शुभवर्तमान: योहान १०:२७-३०

          आपण परमेश्वराची मेंढरे आहोत. जे मेंढरू परमेश्वराची म्हणजेच प्रभू येशू जो उत्तम मेंढपाळ आहे त्याची वाणी ऐकून त्याप्रमाणे आपले जीवन जगण्याचा प्रयत्न करेल, त्यास सार्वकालिक जीवनाची देणगी परमेश्वर बहाल करील आणि तेच खरे विश्वासू मेंढरू आहे. आजच्या शुभवर्तमानात परमेश्वर सांगतो की, जो येशू ख्रिस्तावर विश्वास ठेवतो त्याला परमेश्वराकडून कोणीच दूर करू शकत नाही. येशू आणि पिता एक आहे, म्हणून जो ख्रिस्तावर विश्वास ठेवतो, तो पित्यावर विश्वास ठेवतो आणि जो येशूला ऐकतो तो देव पित्याला ऐकतो.

मनन चिंतन:

“मेंढपाळ तू माझा, प्रभूवर मेंढपाळ तू माझा”

          जुन्या करारातील स्त्रोत्रसंहितातील स्त्रोत्र २३ हे दाविदाचे स्तोत्र आहे की जेथे दावीद म्हणतो, “परमेश्वर माझा मेंढपाळ आहे.” येशू ख्रिस्त हा उत्तम मेंढपाळ आहे, हे आपण आजच्या शुभवर्तमानात ऐकले आहे ह्यावरून आपल्याला असे दिसून येते की, सर्व मानव जातीची काळजी घेण्यासाठी, योग्य तो मार्ग दाखवण्यासाठी खुद्द देवाने मेंढपाळाची भूमिका केली आहे. ज्या देवाने संपूर्ण सृष्टीची, चराचराची निर्मिती केली, तो देव त्याच्या लेकरांच्या मदतीला धावतो त्यांचा बचाव करतो व गरज पडल्यास आपल्या लोकांसाठी किंवा लेकरांसाठी प्राण देण्यास तयार होतो.

          परंतु आजच्या युगात आपण पाहतो दूरदर्शन (T.V.) व मोबाईलच आपले मेंढपाळ झालेले आहेत. जे शब्द पवित्र शुभवर्तमानात येशू हा मेंढपाळ याच्याविषयी आहेत तसेच शब्द आपण मोबाईलला किंवा T.V. ला दिले तर... T.V. किंवा मोबाईल माझा मेंढपाळ आहे, याच्या व्यतिरिक्त मला काही नको. परंतु आपले शब्द मोबाईल किंवा T.V. विरुद्ध असले पाहिजेत. मोबाईल किंवा T.V. माझा मेंढपाळ नाही. कारण ते मला परमेश्वरापासून दूर नेतात. आज कित्येक कुटुंब मोबाईल आणि T.V. ह्यात गुंतलेली आहेत आणि त्यामुळे त्यांना प्रार्थनेसाठी वेळ नाही.

          परमेश्वर देवाने जरी सर्व मानव जात चांगल्या प्रकारे उत्त्पन्न केली, तरी मानव देवाच्या आज्ञेत व देवाच्या वचनाशी प्रामाणिक राहिला नाही. उलट तो देवाच्या विरुद्ध गेला अविश्वासूपणाचे, आज्ञाभंगाचे जीवन जगला तरीसुद्धा देवाने अनेक अशा संध्या दिल्या. परमेश्वर मेंढपाळ म्हणून आपल्या बरोबर राहिला किंवा राहतो तरीपण आपल्याला जाणीव होत नाही. देवाने स्वतःचा पुत्र येशू उत्तम मेंढपाळ म्हणून आपणा साठी पाठवला जेणेकरून त्याच्याद्वारे आपले तारण व्हावे. येशू ख्रिस्त उत्तम मेंढपाळ म्हणून उत्तम अशी जबाबदारी त्याने पार पडली व आजही तो कार्य करतो. जे कोणी दुरावलेले आहेत त्यांना शोधून काढून आपल्या कळपात योग्य जागा देतो व आजच्याशुभवार्तमानात सांगितल्याप्रमाणे तो त्याच्या मेंढरांना अनंतकाळचे जीवन देतो. त्याच्या मेंढरांना कोणीच त्याच्याकडून हिस्कावून घेणार नाहीत. कारण पित्याने ही मेंढरे त्याला दिलेली आहेत आणि तो त्यांचा सांभाळ करील.

          जर आपल्याला येशू हा आपला मेंढपाळ म्हणून स्वीकारायचे असेल, तर त्याच्या वर लक्ष देऊन चांगल्या मेंढऱ्याप्रमाणे चांगले जीवन जगूया. कारण तो आपले तारण करतो व आपल्याला सांभाळतो.

विश्वासू लोकांच्या प्रार्थना:

प्रतिसाद: हे उत्तम मेंढपाळा आमची प्रार्थना ऐकून घे.

१. आपल्या ख्रिस्तसभेने येशू ख्रिस्त जो उत्तम मेंढपाळ आहे त्याच्या प्रेमाचा, दयेचा व क्षमेचा संदेश जगजाहीर करावा म्हणून आपण प्रार्थना करूया.

२. आपल्या देशातील अन्याय, अत्याचार आणि भ्रष्टाचाराचे निर्मुलन व्हावे व आपल्या देशात शांती-प्रेमाचे वातावरण पसरावे म्हणून आपण प्रार्थना करूया.

३. आपल्या कुटुंबातील गैरसमज दूर सारून आपण एकमेकांना प्रेमाने समजून घ्यावे व प्रत्येकाचा आदर राखावा व त्याद्वारे एका चांगल्या ख्रिस्ती कुटुंबाची साक्ष समाजाला द्यावी म्हणून आपण प्रार्थना करूया.

५. आपण आपल्या जीवनात स्व-मार्गाने बहकून न जाता नेहमी उत्तम मेंढपाळाच्या सानिध्यात रहावे व त्याची प्रेमळ वाणी सतत ऐकावी म्हणून आपण प्रार्थना करूया.

६. आता थोडा वेळ शांत राहून आपण आपल्या वैयक्तिक, कौटुंबिक तसेच सामाजिक गरजांसाठी प्रार्थना करूया. 

Reflections for the homily for 3^rd Sunday of Easter

(05-05-2019) by Br. Amit D’Britto

पुनरुत्थान काळातील तिसरा रविवार

दिनांक: ०५/०५/२०१९

पहिले वाचन: प्रेषितांची कृत्ये ५:२७-३२, ४०-४१

दुसरे वाचन: प्रकटीकरण ५:११-१४

शुभवर्तमान: योहान २१:१-१९

“तू माझ्यावर प्रीती करतोस काय?”

प्रस्तावना:

          आज देऊळमाता पुनरुत्थान काळातील तिसऱ्या आठवड्यात पदार्पण करत आहे. प्रेषितांची कृत्ये ह्या पुस्तकातून घेतलेल्या आजच्या पहिल्या वाचनात आपल्या लक्षात येते की, प्रेषितांना येशूची सुवार्ता पसरविण्यासाठी बंदी घालण्यात येते, परंतु म्हणतो की, आम्हाला मनुष्यापेक्षा देवाची आज्ञा प्रिय आहे. प्रकटीकरण ह्या पुस्तकातून घेतलेल्या दुसऱ्या वाचनात योहानाने असे पहिले की, स्वर्गात आणि पृथ्वीवरील सर्व प्राणी राजासनावर असलेल्या व कोकराला युगानयुग धन्यवाद, गौरव व सन्मान करतात.

          आजच्या योहानलिखित शुभवर्तमानात येशू आपल्या शिष्यांना दर्शन देतो व पेत्राची मुख्य मेंढपाळ म्हणून नेमणूक करतो. शिष्यांना येशूच्या अनुपस्थितीत मासे मिळत नाहीत, परंतु जेव्हा येशूचे आगमन होते, तेव्हा ते एकशे त्रेपन्न मासे पकडतात.

          आपल्या जीवनात प्रभू येशू उपस्थित आहे का? आपल्या जीवनात बदल घडविण्यासाठी व प्रभूचे आपल्या जीवनात महत्त्व जाणण्यासाठी आनंदाने ह्या मिस्साबलीदानात सहभाग घेऊया. 

सम्यक विवरण:

पहिले वाचन: प्रेषितांची कृत्ये ५:२७-३२, ४०-४१

          प्रेषितांना मारहाण करण्यात आली आणि येशूच्या नावाने बोलू नका अशी ताकीद देऊन त्यांना सोडून दिले. ही वस्तूस्थिती पाहता, न्यायसभेने या प्रश्नातून एक पळवाट काढली. जमाव्यात खळबळ माजवल्याचा धोका व भय टाळले असेच दिसते. अटक झालेल्या प्रेषितांची तुरुंगातून अदभूत प्रकारे सुटका होते. हे पाहून प्रेषित गोंधळून जाणे साहजिकच होते, पण तसे झाले नाही. ते डगमगले नाहीत; उलट येशूच्या नावासाठी आपण अपमानास पात्र ठरलो म्हणून त्यांनी आनंद केला. वधस्तंभावर येशूला ठार मारण्यात ज्याचा हात होता, अशांना दोषी ठरवण्यावर येथे भर दिलेला आहे. येशूच्या बाबबीत माणसांनी केलेला न्यायनिवाडा देवाने फिरवला हे पुन्हा ठामपणे येथे सांगितले आहे.

दुसरे वाचन: प्रकटीकरण ५:११-१४.

          येथे देवदूतांच्या प्रचंड मोठया समुदायाने उच्चस्वराने कोकऱ्याच्या स्तुतीचे वर्णन गीत गाण्यास आरंभ केला. या ईशस्तुतीवर गीतामध्ये ख्रिस्ताच्या राजवटीच्या प्रारंभी असलेले आशीर्वाद आणि सामर्थ्य याचा उल्लेख आहे. हे गीत देवाला उद्देशून गायिलेल्या गीतासारखे आहे. स्वर्ग, पुर्थ्वी, पृथ्वीच्याखाली आणि समुद्रावर असलेला प्रत्येक जीव व वस्तुजात अखेर देवदूतांच्या व आद्य देवदूताच्या सुरात आपलाही सूर मिसळून हे गीत गाऊ लागले. स्वर्गात चाललेल्या स्तुतीमधून कोकऱ्याने तारणाच्या राज्याचा आरंभ केल्याचा उत्सव साजरा होत आहे. तथापि संपूर्ण विश्वाकडून देवाची आणि कोकऱ्याची उपासना होते.

शुभवर्तमान: योहान २१:१-१९

          येशु समुद्राकाठी आपल्या शिष्यांना दर्शन देतो. येथे फक्त ७ शिष्यांचा उल्लेख केलेला आहे. परंतू यात काही प्रतीकात्मक अर्थ आहे असे म्हणण्याचे काहीच कारण नाही. जब्दीच्या पुत्राचा नावाने उल्लेख नाही, त्यामुळे त्यांच्यापैकी एकजण योहान या शुभवर्तमानाचा लेखक असल्याच्या मताला पुष्टीच मिळते हे लक्षात घ्यावे. मासे धरण्याचा हा प्रसंग व लूक ५:१-११ मधील, असाच प्रसंग या दोघांमध्ये काही मार्मिक साम्य समारात आहे. त्यांनी रात्रभर कष्ट केले पण पदरी जाळ्यात काहीच पडले नाही असे योहान सांगतो यात काही प्रतीकात्मक अर्थ असावा. तथापी, हा तपशील प्रत्यक्ष पाहणाऱ्याने स्मरणातून दिला असल्याची शक्यता अधिक आहे. परंतू तेथे एक आध्यात्मिक तत्व दिसून येते. येशूच्या उपस्थितीमुळे ही परिस्थिती समर्थ पालटली.

          या वृत्तामध्ये प्रत्यक्ष पाहणाऱ्यांनी सांगावे, तसे अनेक स्पष्ट चित्रदर्शी तपशील आहेत. विशेषतः जाळ्यात सापडलेल्या माशांचा मोठा घोळका, किनाऱ्यापासून मचवा होता तेथपर्यतचे अंतर, कोळशाचा विस्तव, त्यावर भाजत असलेली मासळी आणि आणखी काही मासे आणा, हे येशूचे सांगणे इत्यादी. तसेच मिळालेले मासे मोजले, तेव्हा ते पाहून लक्षात ठेवणारे कोणी तेथे होते म्हणूनच हा तपशील दिला आहे.

     पेत्रावर सोपवलेल्या तीन जबाबदाऱ्या मध्येही वेगळेपण आहेच. यामध्ये मेंढरे पाळणे, राखणे या संबंधातील सर्वच कर्तव्याचा, जबाबदाऱ्याचा समावेश केला आहे. 

मनन चिंतन:

          आजच्या शुभवर्तमानात येशू आपल्या शिष्यांना दर्शन देतो. शिष्यांनी येशूने सांगितलेल्या जागी जाले टाकल्यावर त्यांना पुष्कळ मासे मिळतात. तदनंतर ते येशू सोबत भाकरी व मासे घेऊन न्याहारी करतात.

          न्याहारी झाल्यावर येशू शिमोन पेत्राला, “तू माझ्यावर प्रेम करतोस का?” असा तीन वेळा प्रश्न विचारतो. पेत्र तिन्ही वेळा होकारार्थी उत्तर देतो. तेव्हा प्रभू येशू, “माझी कोकरे चार”, “माझी मेंढरे पाळ” व माझी मेंढरे चार” अशी जबाबदारी देतो.

          प्रभू येशूने ज्याप्रमाणे आपला प्राण देईपर्यंत आपल्यावर प्रेम केले, तसे प्रेम करण्यास येशू आपल्याला बोलावीत आहे. आजच्या शुभवर्तमानात प्रभू येशू एकमेकांवर प्रेम करून ‘प्रभूमध्ये राहण्यास’ सांगत आहे. योहानाच्या शुभवर्तमानात येशू म्हणतो, “जशी पित्याने माजावर प्रीती केली आहे, तशी मी ही तुमच्यावर प्रीती केली आहे. माझ्या प्रीतीत राहा. (योहान १५:९) तसेच प्रभू येशू म्हणतो, “मी तुम्हाला नवीन आज्ञा देतो की, तुम्ही एकमेकांवर प्रीती करावी; जशी मी तुम्हावर प्रीती केली.” (योहान १३:३४) आजच्या शुभवर्तमानातील येशूने पेत्राला प्रेमाविषयी केलेल्या प्रश्नांची पडताळणी करून आपल्याला परस्पर-प्रेमी, समूह-प्रेमी आणि सार्वत्रिक प्रेमी जीवन जगण्यास प्रेरणा घेऊया.

          सर्वप्रथम येशू पेत्राला म्हणतो, “माझी कोकरे चार.” कोकरू हे नाजूक व दुसऱ्यावर अवलंबून असते. त्याची काळजी घ्यावी लागते व त्याला दूध, अन्न, चारा द्यावा लागतो. म्हणजेच येशू आपल्याला आपल्या मुलांची, पालकांची, शेजाऱ्यांची काळजी घेण्यास व त्यांच्यावर प्रेम व क्षमा करण्यास सांगत आहे. हे झाले परस्परातील प्रेम. आपण परस्परावर दया दाखवून हिंसा न करता जीवन जगले पाहिजे.

          दुसऱ्या वेळी येशू म्हणतो, “माझी मेंढरे पाळ.” जेव्हा कोकरू मोठे होते, तेव्हा ते मेंढरू बनते आणि मग ते स्वतः अन्न, पाला चारू शकते. मेंढपाळाला फक्त मेंढरांची राखण करावी लागते. तसेच मेंढरू कळपापासून दूर न जाण्यासाठी त्याला एकत्र ठेवावे लागते. यावरून आपल्या लक्षात येते की, येशू आपल्याला समूह-प्रेम दृढ होण्यास मार्गदर्शन करत आहे. परस्पर-प्रेम आपल्याला समूह प्रेमाकडे वाटचाल करण्यास मदत करते. आपल्या धर्मग्रामामधील, गावातील, कंपनीतील समुहावर आपण प्रेम केले पाहिजे. त्यांच्या मदतीला हातभार लावून विकासाकडे वाटचाल केली पाहिजे. भांडण-तंटे दूर करून पवित्र समाज बनविले पाहिजे. संत इग्नेशियास लोयोला ह्यांनी लिहिले आहे की, “प्रेम हे शब्दापेक्षा कृतीमधून दाखविले पाहिजे.” म्हणजेच आपले प्रेम हे खरे खुरे असले पाहिजे.     

          शेवटी येशू म्हणतो, “माझी मेंढरे चार.” मेंढरू हे नेहमी तरुण राहत नाही, तर ते वृद्ध आणि अशक्त होत असते. शेवटी त्याला निरोगी ठेवणे गरजेचे असते. म्हणजेच प्रभू येशू आपल्याला समूह-प्रेमापासून सार्वजनिक प्रेमाकडे वाटचाल करण्यास सुचवित आहे. ज्याप्रमाणे येशूने सर्वावर समानतेने प्रेम केले तसेच आपणही करावे. कोणताही भेदभाव न करता सर्व जातीतील मानवावर प्रेम केले पाहिजे. आपले प्रेम निसर्गावर व निसर्गातील सर्व प्राणीमात्रावर सुध्दा असले पाहिजे.

          पेत्राप्रामाणे आपणही प्रभूवरील प्रेम प्रकट करून सार्वत्रिक प्रेमाकडे वाटचाल करण्यासाठी ह्या मिसाबलीत विशेष प्रार्थना करूया.    

विश्वासू लोकांच्या प्रार्थना:

प्रतिसाद: दयावंत देवा, तुझ्या लोकांची प्रार्थना ऐक. 

१. ख्रिस्तसभेची धुरा वाहणारे आपले पोप, कार्डीनल्स, फादर्स, सिस्टर्स, ब्रदर्स व सर्व प्रापंचिक लोकांना देव राज्याची सुवार्ता पसरविण्यास कृपा व शक्ती मिळावी म्हणून आपण प्रार्थना करूया.

२. आपल्या सर्व मिशनरी बंधुभगीनींवर व त्यांच्या कार्यावर देवाचा आशीर्वाद असावा तसेच ज्यांना छळाला सामोरे जावे लागत आहे त्यांना देवाच्या मदतीचा हात मिळून मिशन कार्य चांगल्या प्रकारे पार पडावे म्हणून आपण प्रार्थना करूया.

३. आपल्या सर्व राज्यकर्त्यांनी आपला स्वार्थ, भ्रष्टाचार व इतर सर्व वाईट मार्ग बाजूला ठेवून लोकांची निस्वार्थपणे सेवा करावी म्हणून आपण प्रार्थना करूया.

४. जे लोक देवापासून दूर गेले आहेत, जे अन्य धर्माकडे वळले आहेत व ज्यांचा देवावर विश्वास नाही, अशा लोकांवर पुनरुत्थित प्रभू येशूची कृपा यावी व त्यांनी पुनरुत्थित येशूवर विश्वास ठेवावा म्हणून आपण प्रार्थना करूया.

५. जे लोक आजारी, दु:खी, कष्टी व निराश आहेत. तसेच जे बेकार तरुण-तरुणी आहेत अश्या सर्वांना पुनरुत्थित प्रभू येशूने त्यांच्या अडचणीत सहाय्य करावे म्हणून आपण प्रार्थना करूया.

६. थोडा वेळ शांत राहून आपल्या सामाजिक, कौटुंबिक आणि वैयक्तिक हेतूंसाठी आपण प्रार्थना करूया.