Reflection for THE SOLEMNITY OF MARY, MOTHER OF GOD AND NEW YEAR 2023 (01/01/2023) By Bro. Elias Itur.

मरिया देवाची माता – नवीन वर्ष

पहिले वाचन: गणना ६:२२-२७.

दुसरे वाचन: गलतीकरांस पत्र ४:४-७.

शुभवर्तमान: लुक २:१६-२१.

नव्या स्वप्नाची नवी लाट, नवा आरंभ, नवा विश्वास, नव्या वर्षाची हीच तर खरी सुरुवात…

प्रस्तावना

आज आपण नवीन वर्षाला सुरुवात करत असताना, आज आपली देवूळमाता हर्ष्याने, आनंदाने व उत्साहाने " मरिया देवाची आई" ह्या विषयावर चिंतन करत नवीन वर्षात पदार्पण करीत आहेत. मरिया जरी साधी व भोळी स्त्री असली तरी ख्रिस्तसभेचे तिचे स्थान महत्वाचे आहे.

आजची उपासना आपल्याला देवाने दिलेल्या आशीर्वादा विषयी सांगत आहे. आजच्या पहिल्या वाचनात परमेश्वर इस्राएली लोकांना म्हणजेच; निवडलेल्या प्रजेला त्याचा भव्य - दिव्य आशीर्वाद देतो. तसेच आजच्या दुसऱ्या वाचनात आपण ऐकतो कि, आपल्याला देवाला अब्बा, बाप या नावाने हाक मारायला हक्क प्रभू येशू द्वारे मिळाला आहे. त्याच प्रमाणे आजच्या शुभवर्तमानात आपल्याला संत लूक प्रभु येशूचे पहिले साक्षीदार व सुवार्तिक; म्हणजेच 'पवित्र मरिया, संत योसेफ, व मेंढपाळ' ह्यांच्या सुवार्तिक कार्याविषयी सांगत आहे.

आजच्या  मिसाबलिदान सहभागी होत असताना, आपण प्रभूकडे प्रार्थना करूया की, हे नवीन वर्ष त्याच्या मातेच्या मध्यस्थीने सुख - समाधानाचे, समृद्धीचे, आनंदाचे आणि एकमेकांवर परमेश्वराची दया, प्रेम,आणि स्नेह दाखविण्याचे जावो.

बोधकथा :  

प्रसिद्ध फ्रेंच लेखक व्हिक्टर ह्यूगो यांनी ही कथा सांगितली आहे.

इ.स १७०० मध्ये फ्रेंच राज्यक्रांती झाली. एक आई आणि तिच्या दोन मुलांना त्यांच्या घरातून हाकलण्यात आले होते. म्हणून ती आई आपल्या मुलांना घेवून दिवसभर जंगलात आणि शेतात भटकत होती. तिसऱ्या दिवशी सकाळी ते काही झुडपात लपले होते परंतु दोन सैनिकांनी त्यांना शोधून बाहेर काढले. अधिकाऱ्याने पाहिले की ते उपाशी आहेत, म्हणून त्याने त्यांना फ्रेंच ब्रेडची एक लांब भाकरी दिली. आईने ते भुकेल्या प्राण्यासारखे पकडले, त्याचे दोन तुकडे केले आणि प्रत्येक मुलाला एक एक पावाचा तुकडा तोडून त्यांच्या हाताशी दिला. एका अधिकाऱ्याने ते पाहिले आणि दुसऱ्याला विचारले, "त्या आईला भूक लागली नाही का?"

“नाही,” अधिकाऱ्याने उत्तर दिले, “कारण ती आई आहे.”

मनन चिंतन

       ख्रिस्ताठायी जमलेल्या माझ्या प्रीतीच्याभाविकांनो, आपल्या सर्वाना ठाऊक आहे कि मरिया माता ही येशूची आई, आपली आई आणि ती देऊळमातेची आई आहे. मरिया माता जगावेगळी माता आहे व ती आपल्या जीवनात काम करत असते. ती आपल्या आईप्रमाणे मार्गदर्शन करते, आपले हात धरते आणि पवित्र आत्म्याच्या सामर्थ्याने आपली विनती नेहमी येशू आणि पित्याकडे घेवून जाते. आपण  नवीन वर्षाच्या सुरुवातीला आलेलो आहोत. आणि हे नवीन वर्ष सुरुवात करण्यासाठी आपल्या प्रत्येक जणांना एक सुंदर  वेळ भेटलेली आहे. गेलेल्या वर्षातील दु:ख, चुका, विसरून नवीन वर्षेला नवीन वाट देवून, आशा देवून ह्या नवीन वर्षाला सुरुवात करूया. कदाचित आपल्यापैकी बरेच जण फटाक्यांच्या स्फोटाने किंवा जोर जोरात वाजवून वर्षाची सुरुवात करत असाल? परंतु धन्य व्हर्जिन मेरीने आम्हाला नवीन वर्षाची सुरुवात या प्रार्थनेने करण्यास सुचावत आहे, “…. मरीयेने या सर्व गोष्टी आपल्या हृदयात ठेवल्या आहेत.”

आजच्या पहिल्या वाचनात परमेश्वराच्या सांगण्यावरून आशिर्वादाची प्रार्थना आहारोन व त्याचे पुत्र लोकांना देतात. कारण ते देवाने निवडलेले लोक होते; म्हणून देवाची पवित्र कृपा त्यांच्यावर होती. हीच प्रार्थना आज ख्रिस्तसभा आपल्या सर्वांना करण्यास प्रेरित करत आहे, तसेच संत पौल स्पष्ट करतो कि, आपल्या सर्वांना नवजीवन मिळाले आहे. म्हणूनच आपण आतापासून गुलाम नाही, देवाचे फक्त पुत्र नाही तर देवाद्वारे वारस ही आहोत. कारण देवाला अब्बा, बापा अशी हाक मारणाऱ्या आपल्या पुत्राच्या आत्म्याला तुमच्या आमच्या अंतःकरणात पाठविले आहे. आजच्या शुभवर्तमानात देवदुताने पवित्र मरीयेला कशाप्रकारे संदेश दिला व मेंढपाळांनी येशू ख्रिस्ताला कशी भेट दिली ह्याविषयी आपण ऐकतो. ह्या संपूर्ण अध्यायामध्ये आपण विश्वासाचे अनेक गुण पाहत आहोत, ज्यामध्ये पवित्र मरीयेच्या विश्वासाला उत्तम स्थान प्राप्त होते; म्हणूनच आज ख्रिस्तसभेमध्ये पवित्र मरीयेला उत्तम स्थान दिले आहे.

ख्रिस्ती धर्मसभेचा श्रद्धाग्रंथ (CCC ५०१) ह्यावर आपल्याला सुंदर अशी शिकवण देते क, देवाने मरिया मातेचे मातृत्व हे जगात देलेली सुंदर बक्षीस आहे तो भेट आपण सगळ्यांना दिली पाहिजे. मरिया माता एक नैसर्गिक आई म्हणून, येशू हा तिचा एकुलता एक पुत्र आहे, तिच्या आध्यात्मिक मातृत्वात तिचा पुत्र येशू ज्यांना वाचवण्यासाठी आला ते सर्व लोक तिची मुले बनले आहेत. दुसऱ्या शब्दांत, मरीया ही केवळ येशूची आईच नाही तर आपली आई देखील आहे.

आज आपण देखील या नवीन वर्षेच्या सुरवातीला  निश्चय करूया की मरिया मातेच्या पावलावर पावूल टाकून तिचे अध्यात्मिक गुण आपल्या मध्ये घेवूया. या मिस्सा बलिदानात भाग घेत असताना आपण नेहमी विश्वासाने मारीया मातेच्या हाकेला प्रतिसाद देवूया...

 

विश्वासू लोकांच्या प्रार्थना:

प्रतिसाद: हे पवित्र देवामाते, आम्हासाठी विनंती कर.

१. ख्रिस्त सभेचे पोप महाशय, सर्व बिशप्स, धर्मगुरू व व्रतस्थ जे ख्रिस्ताच्या मळ्यात कार्य करत आहेत त्यांची श्रद्धा बळकट व्हावी व इतरांची श्रद्धा त्यांनी बळकट करावी म्हणून आपण प्रार्थना करूया.

२. हे नवीन वर्ष २०२३ आपल्या सर्वांना सुखा-समाधानाचे, आनंदाचे, भरभराटीचे व चागल्या आरोग्याचे जावो म्हणून आपण मारिया मातेसह प्रभूकडे प्रार्थना करूया.

३. ह्या वर्षी आपल्या सर्वांना चांगले हवामान मिळावे व सर्व शेतीबागा पिकांनी व फळा-फुलांनी बहरून याव्यात म्हणून आपण प्रार्थना करूया.

४. सर्व स्थानिक कार्यकर्त्यांनी शांतता व न्यायासाठी एकत्र यावे तसेच संपूर्ण जगात शांतता पसरविण्यासाठी प्रयत्न करावेत म्हणून आपण प्रार्थना करूया.

५. थोडा वेळ शांत राहून आपल्या वैयक्तिक आणि कौटुंबिक गरजा प्रभूचरणी मांडूया.

 

                               Reflection for the Homily of Christmas Day (25/12/2022) By: Br. Jordan Dinis.                      नाताळ सण (सकाळ)

दिनांक: २५/१२/२०२२

पहिले वाचन: यशया ६२:११-१२

दुसरे वाचन: टायटसला पत्र ३:४-७

शुभवर्तमान: लुक २:१५-२०

प्रस्तावना:

गाईच्या गोठ्यात ख्रिस्त जन्मला पूर्वीच्या चांदण्यात तारा उगवला. आजचा दिवस ख्रिस्ती लोकांसाठी हर्षाचा आणि आनंदाचा आहे. आज अखिल विश्व व ख्रिस्त सभा नाताळ म्हणजे येशू ख्रिस्ताचा जन्मदिवस साजरा करत आहे. आजची उपासना आपल्याला आनंद घोष, जल्लोष करण्यास आमंत्रण देत आहे. देवाचा पुत्र येशू जगाचा तारणारा जगात अवतरला आहे. आज तिन्ही वचने याची पुष्टि करतात. शब्द मानव झाला आणि आम्हा मध्ये राहिला. तो मानवाला पापापासून सोडवण्यास व जगाच्या सर्व वाईट शक्तीपासून मुक्त करण्यास जन्माला आला आहे. आज देवाच्या आपल्यावर असलेल्या अपार प्रेमाबद्दल आभार मानूया. प्रभू येशूला माझे जीवन, माझे कुटुंब यांचा तारणारा म्हणून स्वीकारण्यास तसेच त्याच्या जन्माने जो आनंद /हर्ष आपल्याला दिला आहे तो इतरांना देण्यास देवाची विशेष कृपा आणि आशीर्वाद लाभावा म्हणून आपण प्रार्थना करूया.

मनन चिंतन:

ख्रिस्त जयंती साजरा करण्यासाठी जमलेल्या माझ्या प्रिय बंधू भगिनींनो, प्रत्येक वर्षी 25 डिसेंबरला मोठ्या आनंदाने आणि थाटामाटाने आपण येशू ख्रिस्ताचा जन्मदिवस साजरा करतो. या सणानिमित्ताने आपण शुभेच्छा पाठवतो नाताळ गीते गातो व गोड गोड पदार्थांचा आस्वाद घेतो. त्याचप्रमाणे एकामेकांना मोठ्या प्रेमाने आलिंगन देतो आणि नाताळच्या शुभेच्छा त्यांना देत असतो.

बोधकथा:

एक तरुण मुलगा मध्यरात्री जागा होतो कारण त्याच्या घराबाहेर ट्रेन त्याची वाट पहाते. तो ट्रेनमध्ये बसतो आणि इतर मुलांना त्या ट्रेनमध्ये पाहून आश्चर्यचकित होतो. ट्रेन त्यांना उत्तर टोकावर घेऊन जाते. तिथे ते नाताळ वृक्ष पाहतात आणि सांता क्लॉजला भेटतात. मुलाला सांता क्लॉज कडून त्याची पहिली ख्रिसमस भेट मिळते. मुलगा सांता क्लॉजला विनंती करतो कि मला हरिणी वरचा घंटा पाहिजे. सांता क्लॉज त्याला तो घंटा देतो पण, जेव्हा तो घरी जायला निघतो तो घंटा त्याच्याकडून हरवतो. ती घंटा सर्व ठिकाणी शोधतो पण त्याला तो घंटा सापडत नाही. नाताळच्या मध्यरात्री त्याच्या बहिणीला ती घंटा सापडते आणि त्याचा आदल्या दिवशी त्याची बहीण ती घंटा त्याला भेट म्हणून देते. घंटा पाहून तो खूप आनंदित होतो.

माझ्या प्रिय बंधू भगिनींनो नाताळ हा आनंदाचा क्षण आहे. जर आपल्याला कळले की नाताळ येत आहे तेव्हा आपण भेटवस्तूंची वाट पाहत असतो. त्या तरुण मुलाप्रमाणे मुलगा भेटवस्तूमध्ये खूप मग्न झाला होता. परंतु त्याला त्याची भेट वस्तु परत मिळाली. या भूतलावरती 2000 वर्षापूर्वी प्रभू येशूने जन्म घेतला. त्याचा जन्म घेण्याचे कारण एक होते ते म्हणजे, संपूर्ण मानव जातीला पापांपासून मुक्त करावे. तो देव होता परंतु आपल्या प्रेमासाठी त्याने या भूतलावर जन्म घेतला.

आजची तिन्ही वचने येशूच्या जन्माचा प्रसार करत आहेत. यशया संदेष्ट्याच्या वाचनात आपल्याला ऐकायला मिळते की सियोनेच्या कन्येला म्हणा, पहा तुझे तारण येत आहे पाहा वेतन त्याचपाशी आहे व पारिपत्य त्याचसमोर आहे.

आजच्या शुभवर्तमानात प्रभू येशूला पाहण्यासाठी मेंढपाळ खूप दूरचा प्रवास करून येतात कारण त्यांना जगाचा मालक प्रभू येशूला पहावयाची इच्छा होते. जेव्हा ते प्रभू येशूला पाहतात तेव्हा ते खूप आनंदी होतात. जेव्हा ते त्याच्या घराण्याला परत जाता, तेव्हा ते प्रभू येशूची स्तुती सर्व गावो-गावी पसरत जातात.

आज संत पौल तीमतीस लिहिलेल्या पहिल्या पत्रामध्ये आपणा सर्वांना प्रश्न विचारत आहे ज्याला आपल्या घरची अवस्था चांगली ठेवता येत नाही, तो देवाच्या मंडळीचा सांभाळ कसा करील? देवाच्या मंडळीचा सांभाळ करण्यासाठी देवाच्या आज्ञे प्रमाणे वागावें लागते. त्याच्या तत्वावर आपण आपले पाऊल टाकले पाहिजे. देवाच्या तत्वावर पाऊल टाकणे सोपे नाही. देवाच्या तत्वावर पाऊल टाकणे म्हणजे दुःखाला आमंत्रण देणे.

2000 वर्षापूर्वी प्रभू या भूतलावरती आपल्या प्रेमाचा संदेश घेऊन आला. त्याने प्रेम काय आहे याची शिकवण त्याने आपल्याला त्याच्या जीवनातून दाखवून दिली आहे, जेणेकरून आपण सुद्धा तेच प्रेम दुसऱ्यांना देऊ. ख्रिस्ती म्हणून नाताळ साजरा करायचे मुख्य कारण म्हणजे मौजमजा नाही तर आपले प्रेम दुसऱ्यांना द्यायचे हाच ख्रिस्ताचा मुख्य संदेश आहे.

विश्वासू लोकांच्या प्रार्थना

प्रतिसाद : हे देहधारी ख्रिस्ता, आमची प्रार्थना ऐक.

1. पोप फ्रान्सिस, सर्व कार्डीनल्स, बिशप्स, धर्मगुरु, धर्मभगिनी ह्यांनी आपले सर्व आयुष्य प्रभूसेवेसाठी अर्पण केले आहे. त्यांना देवाची  कृपा व आशिर्वाद मिळावा व देवाची सुवार्ता जगाच्या कानाकोपऱ्यात पसरविण्यासाठी त्यांना सामर्थ्य लाभावे म्हणून आपण प्रार्थना करूया.

2. जे युवक व युवती देवापासून दूर गेलेले आहेत व त्यांच्या जीवनामध्ये काही धैर्य नाही, अशा सर्व युवक व युवतींना देवाच्या प्रेमाचा स्पर्श व्हावा व ते देवाच्या जवळ यावेत म्हणून आपण प्रार्थना करुया.

3. आज येशू ख्रिस्त आपल्यामध्ये जन्मलेला आहे. ख्रिस्ताने शांतीचा व प्रेमाचा संदेश आपल्याला दिलेला आहे. हाच संदेश आपण इतरांना द्यावा व इतरांचे जीवन आनंदमय व शांतीमय बनावे म्हणून आपण प्रार्थना करु या.

4. हे प्रेमळ ख्रिस्ता, सर्व बालकांना विशेष करून जी मुले अनाथ-आश्रमांमध्ये आहेत व ज्या मुलांच्या आई-वडिलांनी त्यांना सोडून दिलेले आहे. हे प्रभो तू त्यांचा सांभाळ कर, त्यांची काळजी घे व त्यांना चांगला मार्ग दाखव. इतरांनी त्यांच्यासाठी मदतीचा हात पुढे करावा म्हणून आपण प्रार्थना करुया.

5. आता आपण थोडा वेळ शांत राहून आपल्या वैयक्तिक, कौटुंबिक व सामाजिक हेतूं प्रभूचरणी ठेऊया.

 

Reflection for the Homily of Christmas Vigil Mass (25/12/2022) By: Br. Jeoff Patil

ख्रिस्त जयंती – नाताळ  (मध्यरात्रीची मिस्सा)

दिनांक: २५/१२/२०२२

पहिले वाचन: यशया ९:१-६

दुसरे वाचन: तीमतीला पत्र २:११-१४

शुभवर्तमान: लुक २:१-१४

तुमच्यासाठी आज दाविदाच्या गावात तारणारा जन्मला आहे (लुक २:११)

प्रस्तावना:

आज संपूर्ण पृथ्वी आनंद आणि हर्ष करीत आहे. कारण तिला तिचा तारणारा लाभलेला आहे. संदेष्ट्यानी केलेल्या भविष्यवाणीची पूर्तता आज झाली आहे. देवाने आपला एकुलता एक पुत्र मानव जातीच्या प्रीती करीता या भूतलावर पाठवून, प्रीतीचा कळस गाठला आहे.

आजच्या पहिल्या वाचनात आपण ऐकतो की यशया संदेष्टा म्हणतो, “अंधारात व मृत्यु शाळेत चालणाऱ्या लोकांनी दिव्य तारा पाहिला आहे”. दुसऱ्या वाचनात संत पौल येशू ख्रिस्ताविषयी साक्ष लोकांना देत आहे. ख्रिस्ताप्रमाणे झपाटलेला हा प्रेषित सर्व माणसांना तारण देणारी देवाची कृपा प्रकट झाली आहे असे सांगत आहे.

पाहुणा आला हो माझ्या दारी, हे गीत गात असताना शुभवर्तामानात देवदूत मेंढपाळा प्रमाणे आपल्यासाठी सांगत आहे की तुमच्यासाठी आज दविदाच्या गावात तारणारा जन्मला आहे. तो ख्रिस्ता प्रभु आहे. आज ह्या मिस्साबलीदानात सहभागी होत असताना बाळ येशूने आपल्याला आशीर्वादित करून आपल्या अंतकरणात जन्म घ्यावा म्हणून आपण प्रार्थना करूया.

मनन चिंतन:

प्रेम हा शब्द फक्त दोन अक्षराचा. नुसता ऐकला तरी हर्ष होतो आणि उच्चारला तर दोन ओठांमध्ये स्पर्श होतो. प्रभू येशू ख्रिस्ताचा संदेश हा प्रेमाचा होता. त्याची भाषा प्रेमाची होती आणि म्हणूनच त्याने संपूर्ण जगाला फक्त प्रेम व शांतीचा संदेश दिला.

आज आपण नाताळचा सण साजरा करत आहोत. नाताळचा सण हा हौसेचा आणि आनंदाचा सण आहे. आजच्या दिवशी देवाने मानव रूप घेऊन आपल्याला दाखवून दिले आहे की, देव आपल्यावर प्रेम करत आहे. असे म्हणतात जेव्हा जेव्हा या पृथ्वीवर नवीन बाळ जन्माला येते ते आपल्याला देवाच्या प्रेमाची जाणीव करून देते. संत आगोस्तीन म्हणतात “देव मनुष्य झाला जेणेकरून मनुष्य दैवी होऊ शकेल”. ख्रिस्त या भूतलावर येण्याचा मुख्य हेतू हाच की पाप्याचें व सर्व मानवजातीचे तारण व्हावे.

नाताळाच्या दिवशी आपल्याला दिसून येते की देव जो सर्व सामर्थ्य आहे तो आपल्या प्रेमा करीता या गव्हाणीमध्ये जन्म घेतो. ह्या कृतीने तो आपल्याला नम्रतेचा धडा देतो. येशू या गाईच्या गव्हाण्यात जन्माला आला व आपल्याला तो नम्रतेचे जीवन जगण्याचे आव्हान करत आहे.

देव मनुष्य का झाला आहे? देव कबूल करतो कि “मी नग्न जन्मला आहे, जेणेकरून तुम्ही स्वतःला कसे बनवायचे ते शिकू शकाल.

मी गरीब जन्मला आहे, जेणेकरून तुम्ही मला तुमचे धन म्हणून घेऊ शकता.

मी प्रेमासाठी जन्माला आलो आहे, जेणेकरून तुम्ही माझं तुमच्यावरील प्रेमावर काही शंका घेऊ नये.

मी रात्री जन्माला आलो, जेणेकरून मी माझ्या प्रकाशाने सर्व वास्तविकता स्पष्ट करू शकतो.

मी साधेपणात जन्मला आहे, जेणेकरून तुम्ही गुंतागुंतीचे होऊ नये.

मी तुमच्या जीवनात जन्मलो आहे, जेणेकरून तुम्हाला सर्वांना मी पित्याच्या घरी नेण्यासाठी.

होय माझ्या प्रिय भाविकांनो या कारणासाठी आपला देव आपल्याला या नाताळच्या सणाच्या दिवशी आपल्या सर्वांसाठी जन्मला आहे.

आई तिच्या बाळाला दूध पाजते त्यापेक्षा अधिक पवित्र काही ही घडू शकत नाही. हा मानवतेचा पहिला ख्रिस्त बलिदान आहे. जो येशूच्या आईने आपल्या मुलांसाठी अर्पण केला आहे. आपणही या नाताळच्या दिवशी देवाचे प्रेम व त्याची शांती इतरांना द्यावी व इतरांबरोबर प्रेमाने व शांतीने वागावे असा संदेश आपल्याला देत आहे.

 दुर्दैवाने आजच्या आधुनिक जगात असंख्य लोक आज क्षणिक सुखाच्याकडे जास्त आकर्षित होतात व देवाच्या प्रेमा पासून दूर जात आहेत. आपल्या मनाची शांती गमावून बसले आहे. आज या नाताळचा सण साजरा करताना आपण देवाच्या प्रेमाचा व शांतीचा संदेश दुसऱ्या द्यावा व इतरांनी नाताळचा आनंद द्यावा व आपला आनंद द्विगुणीत व्हावा म्हणून आपण प्रार्थना करू या.

विश्वासू लोकांच्या प्रार्थना

प्रतिसाद : हे प्रभू तुझ्या प्रेमाने आम्हाला भरून टाक.

१. आज आपण पवित्र ख्रिस्त महासभेचे सर्व ख्रिस्ती बंधू-भगिनी साठी प्रार्थना करूया की जसे बाळ येशू आज शांती व प्रेमाचा  संदेश घेऊन जन्माला आला आहे  तसेच आपणही त्याच्या  प्रेमाचा व शांतीचा संदेश जगात पसरावा म्हणून आपण प्रार्थना करूया.

२. आज आपण विशेष करून सर्व राष्ट्रांसाठी प्रार्थना करूया ज्या राष्ट्रांमध्ये युद्ध व अशांती आहे तेथील सर्व अधिकारी व पुढारी लोकांनी येशूच्या शांतीचा अनुभव घेऊन सतत शांती साठी झटावे म्हणून आपण प्रार्थना करूया.

३. आज आपण सर्व कुटुंबांसाठी प्रार्थना करू या विशेष करून,  जे कुटुंब काही कारणास्तव विभक्त झाले आहेत अशा कुटुंबानी पवित्र कुटुंबाचा आदर्श घेऊन घरात शांतीचे वातावरण निर्माण करावे म्हणून आपण  प्रार्थना करूया.

४. जे कोणी जीवनात निराश आहेत, अशांती व अंधकारात आहेत त्यांनाही  बाळ येशूच्या प्रेमाचा व शांतीचा अनुभव यावा व  त्यांचे जीवन आनंदाने भरावे तसेच त्यांच्या जीवनात बद्दल घडून यावा म्हणून आपण प्रार्थना करूया.

५. आज आपल्या सर्वाना इथे जमले असताना बाळ येशूच्या प्रेमाचा व शांतीचा अनुभव यावा व आपले जीवन संपन्न व्हावे म्हणून आपण प्रार्थना करूया.