Reflections for the homily of the Fifth Sunday in the Holy Season of Lent (26/03/2023) by Br. Jostin Pereira.

प्रायश्चित काळातील पाचवा रविवार

दिनांक: २६/०३/२०२३

पहिले वाचन: यहेज्केल ३७:१२-१४.

दुसरे वाचन: रोमकरांस पत्र ८:८-११.

शुभवर्तमान: योहान ११:१-४५.

विषय: “पुनरुत्थान व जीवन मीच आहे जो माझ्यावर विश्वास ठेवतो तो मेला तरी जगेल” (योहान ११: २५).

प्रस्तावना:

आज आपण प्रायश्चित काळाततील पाचवा रविवार साजरा करीत आहोत. येशू ख्रिस्त म्हणतो, “पुनरुत्थान व जीवन मीच आहे”. त्याच्या शब्दांवर आपल्याला विश्वास ठेवणे गरजेचे आहे. त्याने हे विश्वासाचे रहस्य आपल्यासाठी उलगडून ठेवले आहे. येशूने मृत लाजरस भोवती गुंडाळलेली मृत्युरूपी वस्त्रे सोडून त्याला मुक्ती दिली. त्याच प्रकारे आमच्या जे काही विचार व ज्या पापवृत्ती आम्हाला परमेश्वराकडे जाण्यास अडखळे निर्माण करतात, त्या गोष्टीपासून आपली सुटका व्हावी, आपणास प्रभुमध्ये पुनरुत्थान व नवजीवनाचा अनुभव यावा, आपण नवनिर्मिती बनावे म्हणून या मिसाबलिदान आज परमेश्वराकडे प्रार्थना करूया.

मनन चिंतन:

आजचा रविवार आपणास पवित्र आठवड्याचा जवळून अनुभव घेण्यास आव्हान करीत आहे. आजची उपासना, पुनरुत्थान व जीवन या ख्रिस्ती जीवनातील अत्यंत महत्त्वाच्या गोष्टींवर भर देत आहे. जीवन, मृत्यु आणि पुनरुत्थान हे एक रहस्य आहे. आपण सर्वजण या जगात जन्म घेत असतो. आपल्या सर्वांना देवाने जीवनाचे वरदान बहाल केले आहे. काही दिवसानी आपणही हे जग सोडून जाणार आहोत. परंतु हे जग सोडून आपण कुठे जातो हे महत्त्वाचे आहे.

आज प्रभू परमेश्वर आपल्याला आठवण करून देत आहे कि, “पुनरुत्थान व जीवन मीच आहे जो माझ्यावर विश्वास ठेवतो तो मेला तरी जगेल” (योहान ११: २५). आपण देवाकडून आलो आहोत आणि आपल्याला देवाकडे परत जायचे आहे. देवाच्या योजनेप्रमाणे आपण या जगात येत असतो आणि त्याच्याच योजनेप्रमाणे आपण हे जग सोडून जात असतो. पण आपण, आपले जीवन कसे जगतो हे महत्त्वाचे आहे. स्वर्गात जावे हे सर्वांचे स्वप्न आहे. पण प्रश्न उभा राहतो आपण स्वर्गात कसे जाणार? हा महत्त्वाचा प्रश्न आहे. स्वर्गात जाण्याची तयारी आम्ही सर्वांनीच केली पाहिजे. यासाठी आजच्या उपासनेत आपल्याला जीवन, मरण आणि पुनरुत्थान यांवर मनन-चिंतन करण्यास ख्रिस्तसभा आपणास बोलावित आहे.

आजच्या पहिल्या वाचनात येहेज्केल संदेष्टा बाबिलोनच्या हद्दपारीत खितपत पडलेल्या इस्रायली लोकांमध्ये नवजीवनाची आशा उत्पन्न करतो. तो म्हणतो, “परमेश्वर त्यांची थडगी उघडून त्यांना नवजीवन देईल”.  दुसऱ्या वाचनात संत पौल रोमकरास आवाहन करतो कि, केवळ शारीरिक पातळीवर जीवन न जगता त्यांनी आध्यात्मिक नवजीवनाची वाट स्वीकारावी. आजच्या शुभवर्तमानात चार टप्प्यामध्ये हा प्रवास सादर करण्यात आलेला आहे.

१. देवाच्या गौरवासाठी दुःख

लाजरसच्या मृत्युमुळे दु:खी झालेल्या बहिणींचे सांत्वन करण्यासाठी येशू बेथानी येथे जातो. त्याच्या थडग्याजवळ येशूने सांडलेले अश्रू दुखी बहिणीना दिलासा देणारे होते.

२. मी पुनरुत्थान आहे

“प्रभुजी, आपण इथे असता तर माझा भाऊ मेला नसता.” या शब्दात मार्था व मारिया यांची ईश्वरावरील गाढ श्रद्धा दिसून येते. येशू त्यांना सांगतो की, लाजरस फक्त शेवटच्या दिवशी नव्हे तर आता पुन्हा उठवला जाणार आहे. हे येशूचे आत्मप्रकटीकरण करणारे शब्द आहेत: ‘पुनरुत्थान व जीवन मीच आहे.’

३. विश्वास ठेवशील तर देवाचे गौरव पाहशील

धोंडा बाजूला सारा, ह्या येशूच्या आदेशामुळे उपस्थितांमध्ये क्षणभर चुळबूळ उडाली. लाजरसच्या बहिणींना भावनावेग आवरेनासा झाला. येशु मात्र लाजरसला अंधारातून प्रकाशाकडे, मरणातून जीवनाकडे आणि बंधनातून मुक्तीकडे घेऊन जाण्याच्या हेतूने त्याला साद घालतो. ‘लाजरस बाहेर ये.’

४. येशूच्या नवजीवनाचा अनुभव

मेलेला लाजरस जीवंत होतो. प्रभू येशू त्याला जीवन देतो. येशू आपल्यालासुद्धा नवीन जीवन देण्यासाठी आलेला आहे. पुनरुत्थानाचे जीवन, हे अनंतकाळचे जीवन आपल्या सर्वांना येशू देण्यासाठी आलेला आहे. पुनरुत्थान फक्त शारीरिक मृत्यूनंतर नसून तर आयुष्यातील प्रत्येक परिस्थितीत अनुभवण्यास आजची उपासना आपणास सांगते. आपण स्वतःला प्रश्न विचारायला हवा कि, माझ्या जीवनातील कोणकोणत्या गोष्टी मला मृत्यूकडे घेऊन जात आहेत? व कोणकोणत्या गोष्टी मला नावाजीवनाकडे घेऊन जाणार आहेत व त्यासाठी मी काय केले पाहिजे? मरणाचा अनुभव आणणाऱ्या गोष्टी म्हणजे दु:ख, ताटातूट, बेरोजगारी, आजार व आपणावर होणारे अत्याचार इत्यादी आहेत. ह्या सर्व संकटांवर ख्रिस्ताच्या सहायाने आपण जेव्हा मात करतो, तो खरा पुनरुत्थानाचा अनुभव होय.

 आपल्या सर्वांसाठी येशू ख्रिस्त या जगात आला आणि आपल्या पापांकरीता तो क्रुसावर मरण पावला. हा प्रायश्चितकाळ अधिक अर्थपूर्ण होण्यासाठी आपले सर्वस्व देवाला अर्पण करूया व पापी जीवनाचा त्याग करून, प्रभू येशू ख्रिस्ताचा दु:ख सहन आणि पुनरुत्थानाचा सोहळा पाहण्यासाठी आपण तयार असूया.

विश्वासू लोकांच्या प्रार्थना

प्रतिसाद: “हे दयावंत प्रभू आमची प्रार्थना ऐक.”

१. पवित्र ख्रिस्तसभेचे अधिकारी पोप फ्रान्सिस, सर्व बिशप्स, धर्मगुरू, व व्रतस्थ जे येशूच्या मळ्यात कार्य करत असताना त्यांनी श्रद्धावंतांची पुनरुत्थानावरील श्रद्धा बळकट करण्यासाठी सतत कार्यरत राहण्यास पवित्र  आत्म्याची कृपा त्यास लाभावी म्हणून आपण प्रार्थना करूया.

२. सरकारी पुढाऱ्यांनी जनतेच्या फायद्यासाठी कार्य करण्यास व शांतीचे, नीतीचे, एकोप्याचे राज्य बांधण्यासाठी  झटण्यास लागणारी कृपा त्यांस मिळावी म्हणून आपण प्रार्थना करूया.

३. जे कोणी देवापासून दुरावलेले आहेत; त्यांना ह्या प्रायश्चित काळात देवाने स्पर्श करावा व त्यांनी देवाच्या   प्रेमाचा अनुभव घेऊन देवाजवळ परत यावे म्हणून आपण प्रार्थना करूया.

४. जेव्हा-जेव्हा आपल्या जीवनात कष्ट, दु:ख येते आणि आपले सर्व प्रयत्न व्यर्थ होतात, सर्व आशा-निराशा होतात, तेव्हा प्रभूवरील विश्वास आणि श्रद्धा भक्कम करण्यासाठी त्याच्या योजनेला प्राधान्य देण्यास  लागणारी कृपा आपण परमेश्वराजवळ मागुया.

५. आता थोडा वेळ शांत राहून आपण आपल्या सामाजिक, कौटुंबिक व व्ययक्तिक हेतूसाठी प्रार्थना करूया.