Reflections for the 16^th Sunday in Ordinary Time (19/07/2020) by Br Brijal Lopes 

सामान्य काळातील सोळावा रविवार

दिनांक: १९/०७/२०२०

पहिले वाचन: ज्ञान ग्रंथ १२:१३,१६-१९

दुसरे वाचन: रोमकरांस पत्र ८:२६-२७

शुभवर्तमान: मत्तय १३:२४-४३

“स्वर्गाचे राज्य हे शेतात चांगले बी पेरण्यासारखे आहे.”

प्रस्तावना:

आज देऊळ माता सामान्य काळातील सोळावा रविवार साजरा करीत आहे. आजची उपासना आपणा सर्वांना ख्रिस्तामध्ये नम्रता, सहनशीलता, न्याय व विश्वासू वृत्तीने व निष्ठेने जीवन जगण्यास आमंत्रण देत आहे. आजची तिन्ही वाचने आपणास ख्रिस्ती जीवन व त्याची असलेली उद्दिष्ट ह्यावर मनन चिंतन करत आहे. जीवन हे परमेश्वराने मानवजातीला बहाल केलेले फार मोठी देणगी आहे व या जीवनात परमेश्वर आपल्याला भरपूर संधी देत असतो, परंतु या संधीचा वापर हा त्याच्या (देवाच्या) इच्छेनुसार आपण केल्या पाहिजे; कारण आपला निर्माता हा देव आहे व आपण त्याची लेकरे आहोत. देवाचे सामर्थ्य, कृपा, शक्ती, दया, क्षमाशीलता व सहनशीलता ही देवाच्या न्यायाची साधने आहेत. ती मानवाच्या विनाशासाठी नसून त्यांना शाश्वत जीवन देण्यासाठी आहेत. मानवाने देवाकडे यावे व स्वर्गीय जीवनाचा आनंद घ्यावा ही देवाची इच्छा आहे; परंतु आपली इच्छा कोणती शाश्वत जीवनाची की विनाशी हे आपण पडताळून पाहावयाचे आहे यासाठी आपण या मिसा बलिदान प्रार्थना करूया.

सम्यक विवरण:

पहिले वाचन: ज्ञान ग्रंथ १२:१३,१६-१९

पहिल्या वाचनात आपणास परमेश्वराचे पावित्र्य व शुद्ध जीवन याविषयी सांगितलेले आहे, न्यायाने, क्षमेने, नम्रतेने, दयेने व सहनशीलतेने राहुन लोकांस जवळ करतो व त्यांना देवाच्या स्वभावाची ओळख करून देतो.

दुसरे वाचन: रोमकरांस पत्र ८:२६-२७

रोमकरांस पाठवलेल्या पत्रात संत पौल सांगत आहे की, ख्रिस्ती जीवन जगण्यासाठी व त्याचे पालन करण्यासाठी लागणारी शक्ती व कृपा हा पवित्र आत्मा आपणास देतो. मानवी दुर्बलतेतून त्यांना सक्षम बनवतो व देवाकडे घेऊन जाण्यास मार्गदर्शन करतो.

शुभवर्तमान: मत्तय १३:२४-४३

प्रभू येशू ख्रिस्ताने निरनिराळ्या प्रकारचे उदाहरण देऊन स्वर्ग राज्याची तुलना केली आहे. विश्वास कसा असावा व त्याद्वारे ख्रिस्ती जीवन कसे जगावे याविषयी येशू ख्रिस्त आपणास सांगत आहे. वाईट जीवन जगून नुकसान करून घेण्यापेक्षा, चांगले जीवन जगून शाश्वत जीवनात प्रवेश करण्याबाबत सांगत आहे. जगाचा न्यायनिवाडा व पवित्र जीवन कसे जगावे ह्या विषयी आपणास येशू ख्रिस्त सांगत आहे.

मनन चिंतन:

प्रत्येक दाखल्याची सुरुवात ही देव शब्दाने होते. येशू ख्रिस्त प्रत्येक दाखला लोकांच्या समुदाया समोर अशासाठी बोलत आहे की, त्यांना स्वर्ग राज्याची रहस्य जी जगाच्या स्थापनेपासून गुपीत ठेवण्यात आलेली आहेत ती प्रकट व्हावी म्हणून. आजच्या शुभवर्तमानात येशू ख्रिस्ताने सांगितल्याप्रमाणे गहू आणि निंदण ह्यांच्या वेगळे करण म्हणजे स्वर्ग राज्यात स्वीकार व नाकार ह्या रहस्याविषयी सांगितलेले आहे. जे लोक हा दाखला ऐकतात, त्यांना सांगण्यात येत आहे की अंतिम न्यायाच्या दिवशी प्रकाशाची मुले व अंधकाराची मुले अशे विभाग केले जातील ह्या विषयी ख्रिस्त आपणास जाणीव करून देत आहे.

परमेश्वर माणसाच्या अंत:करणात शब्द ठेवतो, परंतु सैतान गुप्तपणे वाईट शब्द किंवा विचार ठेवतो निंदणाबरोबर चांगले गहू सुद्धा निघेल, म्हणून मालक आपल्या सेवकांना निंदण काढण्यासाठी मनाई करतो व ज्याप्रमाणे वेळेनुसार निंदण व गहू वेगळे केले जातात, त्याचप्रमाणे चांगली व वाईट माणसे देखील वेगळे करण्यात येतील अशे सांगण्यात येत आहे. आजचा विषय स्वर्गराज्यसाठी निवडली जाणारी व नाकारली जाणारी प्रजा ह्याचे विश्लेषण निसर्गाच्या दृष्टिकोणातून गहू व निंदण ह्या दाखल्याद्वारे करण्यात आलेले आहे. निसर्गाच्या नियमानुसार, निंदण गहू बनूशकत नाही तसेच गहू निंदण बनू शकत नाही, परंतु देवाने मानवाला पापापासून मुक्त होऊन पवित्र जीवन जगण्यासाठी पाचारण केले आहे. माणसाने त्याच्या पापात मारावे अशी देवाची इच्छा नाही, तर त्याने पापावर पश्चाताप करावा व पवित्र जीवन जगावे अशी देवाची इच्छा आहे. गहूबरोबर निंदणसुद्धा वाढावे याचाच अर्थ मानवी स्वभाव हा कितीही दृष्ट पणाचा असला, तरी त्याचे परिवर्तन होऊ शकते. वाईट मार्गाचा तिरस्कार करून नवजीवन जगण्यास किंवा पवित्र जीवन जगण्याचा ध्यास धरण्यास हा दाखला आपणासमोर एक आव्हान ठेवत आहे. परमेश्वर हा दयाळू, क्षमाशील व मंदक्रोध आहे तो प्रत्येक व्यक्तीला सुधारण्याची संधी देत असतो, त्यासाठी तो वेळही  देत असतो. काही व्यक्ती स्वतःमध्ये सुधारणा घडवून आणतात व परिवर्तन करतात, ते केवळ ख्रिस्ताच्या क्षमेमुळे व त्याच्या प्रेमामुळे; परंतु काही व्यक्ती ज्यांना संधी मिळून सुद्धा आपलं परिवर्तन करीत नाहीत किंबहुना सुधारणा घडवून आणत नाहीत, अशा व्यक्ती त्याच्या चुकीमुळे स्वर्गीय सुखासाठी व त्याच्या राज्यासाठी अपात्र ठरतात.

ख्रिस्त सभा आज आपणासमोर प्रभू शब्दाविषयी व त्याच्या स्वर्गीय राज्याविषयीची महती आपणास पटवून देत आहेत. प्रत्येक व्यक्ती जगासमोर कशी असली, तरी देवासमोर आपण समान आहोत. परमेश्वर आपणावर न्याय दृष्टीनी व  क्षमेने पाहत असतो. त्या परमेश्वराचे राज्य आपणात यावे व त्याद्वारे आपण देवासमोर पात्र ठरावेत म्हणून आपण या मिसा बलिदानात विशेष प्रार्थना करू या.

विश्वासू लोकांच्या प्रार्थना

प्रतिसाद: हे प्रभू आमची प्रार्थना ऐक.

१. विश्वव्यापी ख्रिस्त सभेची धुरा वाहणारे आपले परमचार्य पोप फ्रान्सिस सर्व व कार्डिनल, बिशप्स धर्मगुरु, धर्म-भगिनी यांना चांगले स्वास्थ्य लाभावे व परमेश्वराचा शब्द लोकांपर्यंत पोहोचविण्यासाठी व त्याद्वारे परमेश्‍वराचे राज्य प्रस्थापित व्हावे म्हणून प्रार्थना करूया.

२. कोरोना सारख्या जीवघेण्या आजाराने खूप जणांनी आपला जीव गमावला आहे त्या सर्वांना चिरकाळ शांती लाभावी, तसेच जे या आजाराने ग्रासलेले आहेत अशा सर्वांना परमेश्वराने बरे करावे व त्यांना निरोगी स्वास्थ्य मिळावे म्हणून प्रार्थना करूया.

३. आपल्याला या वर्षी भरपूर प्रमाणात पाऊस मिळावा व आपल्या शेतकरी बांधवांना चांगले पीक मिळावे आणि आपल्या दैनंदिन गरजा पूर्ण व्हाव्यात म्हणून आपण प्रार्थना करूया.

४. जे लोक निस्वार्थीपणे देवाची सेवा करत आहेत व जे लोक या जीवघेण्या आजारात लोकांना अत्यावश्यक सेवांचा पुरवठा करत आहेत, त्याचप्रमाणे सर्व डॉक्टर्स, नर्सेस, शासकीय कर्मचारी यामध्ये सहभागी असलेली इतर सर्व लोक यांना परमेश्वराचे मार्गदर्शन लाभावे, तसेच त्यांना निरोगी स्वास्थ्य लाभावे म्हणून प्रार्थना करूया.

५. जे लोक बेघर आहेत अन्न-पाण्याविना जीवन जगत आहेत. जे आजारी आहेत अशा सर्वांना योग्य वेळी मदत मिळावी व त्यांच्या ही गरज पूर्ण व्हाव्यात म्हणून आपण प्रार्थना करूया.

६. थोडा वेळ शांत राहून आपल्या वैयक्तिक घरासाठी प्रार्थना करूया.