Reflections for the homily of THE MOST
HOLY BODY AND BLOOD OF CHRIST (07-06-2026) by Fr. Glen
Fernandes
येशूच्या अतिपवित्र शरीर व रक्ताचा सोहळा
दिनांक: ०७/०६/२०२६
पहिले वाचन: अनुवाद
८:२-३, १४-१६
दुसरे वाचन: करिंथकरास
पहिले पत्र १०:१६-१७
शुभवर्तमान: योहान
६:५१-५८
प्रस्तावना:
प्रिय बंधू-भगिनींनो, आज आपण
प्रभू येशू ख्रिस्ताच्या अतिपवित्र शरीर आणि रक्ताचा सण (Corpus Christi) साजरा करत
आहोत. हा महत्वाचा सण आपल्याला प्रभू येशू ख्रिस्ताच्या पवित्र मिस्साबलिदानातील
असीम प्रेमाची आठवण करून देतो, ज्याने स्वतःला आपल्यासाठी अन्न आणि पेय
बनवले, ज्याने
स्वतःला पूर्णपणे आपल्यासाठी अर्पण केले. आजच्या या दिवशी पवित्र मिस्सामध्ये आपण
भाकर आणि द्राक्षरस जे आपल्या प्रभू येशू
ख्रिस्ताच्या शरीर आणि रक्तात रूपांतरित होतात ह्या रहस्यावर चिंतन करूया या. ह्या
रहस्याद्वारे प्रभू येशू ख्रिस्त आपल्यात राहतो आणि आपण त्याच्यात राहतो. तो आपला
आध्यात्मिक अन्न आहे,
आपला मार्ग, सत्य आणि जीवन आहे.
आजची पवित्र उपासना आपल्याला प्रभू
येशू ख्रिस्ताच्या शरीरा व रक्त ह्यांचा
सन्मान करायला, पवित्र
मिस्समधील त्याच्या उपस्थितीत विश्वास
ठेवायला, आणि ह्या
जगात त्याचे साक्षीदार बनायला आमंत्रित
करत आहे. आणि म्हणून आपण मनापासून, एकाग्रतेने आणि आनंदाने या पवित्र
मिस्सामध्ये भाग घेऊया.
मनन चिंतन:
प्रिय बंधू आणि भगिनींनो,
आज आपण प्रभू येशूच्या अतिपवित्र शरीर व
रक्ताच्या रहस्याचा सण साजरा करत आहोत. हे रहस्य आपल्या विश्वासाचे सार आहे कारण
आपला प्रभू येशू ख्रिस्त स्वतः आपल्यात खरोखर उपस्थित असतो. भाकर आणि
द्राक्षरसच्या रूपातील परिवर्तन होऊन तो आपल्याला आपले शरीर आणि रक्त देतो. “हे
माझे शरीर आहे... हे माझे रक्त आहे,” असे त्याने शेवटच्या रात्री म्हटले आणि
आजही प्रत्येक पवित्र मिस्सामध्ये ते शब्द जिवंत होतात. प्रभू येशूची ही उपस्थिती
केवळ आठवण नाही, तर खरी, वास्तविक आणि पूर्ण आहे. जसे अन्न आपल्या
शरीराला जीवन देते, तसेच पवित्र
मिस्सा आपल्या आत्म्याला शाश्वत जीवन देते. संत अगस्तीन म्हणत जे आपण ग्रहण करतो, त्याच्यासारखे आपण बनतो. पवित्र
मिस्सामध्ये आपण येशूचे हात, त्याचे पाय आणि त्याचे प्रेम या जगात
कार्य करण्यासाठी त्याचे शरीर बनतो.
आजच्या पवित्र दिवशी आपण पवित्र मिस्सेचे
गूढ रहस्य समजून घेतले पाहिजे. पवित्र मिस्सा ही स्वर्ग आणि पृथ्वीची भेट आहे.
येथे प्रभू येशू आपल्या ख्रुसावरील बलिदानाला पुन्हा सादर करतो, जेणेकरून आपण त्यात सक्रियपणे भाग घेऊ
शकू. पवित्र मिस्सा म्हणजे फक्त एक समारंभ नाही, तर एक छोट्या पवित्र भाकरीमध्ये
सामावलेली प्रेमाची सर्वात मोठी कथा आहे. पवित्र मिस्सामध्ये प्रभू येशू आपल्याला
म्हणतो, “मी
तुमच्यासाठी स्वतःला पूर्णपणे दिले आहे. आता तुम्ही माझ्यासाठी स्वतःला जगाला द्या.” जसे अनेक गव्हाचे दाणे एकत्र होऊन एक
भाकर बनतात, तसेच आपण
सर्व ख्रिस्ताच्या एका शरीराचे सदस्य बनतो. पवित्र मिस्सा आपल्याला एकत्र करते, आपल्या मतभेदांना दूर करते आणि आपल्याला
एक कुटुंब बनवते. जेव्हा आपण येशूला ग्रहण करतो, तेव्हा आपण त्याच्यात विलीन होतो आणि तो
आपल्यात राहतो. ही खरी “सहभागिता” आहे – येशूशी आणि एकमेकांशी.
आपल्या ख्रिस्ती जीवनात पवित्र मिस्साचे
अमौल्य असे महत्त्व आहे. पवित्र मिस्सा ही आपली शक्तीची ज्योत आहे. पवित्र मिस्सा
आपल्याला जगाच्या अंधारात प्रकाश देण्यासाठी तयार करते. ज्याप्रमाणे एखादा माणूस
प्रार्थनेच्या शक्तीने आपले जीवन बदलतो, त्याप्रमाणे पवित्र मिस्सा आपल्याला
प्रेम, क्षमा आणि
सेवेची शक्ती देते. मिस्सानंतर येशू आपल्याला म्हणतो, “जा, तुम्ही माझे शरीर आहात. जगात माझे प्रेम
पसरवा.”
जेव्हा आपण पवित्र साक्रामेंताच्या
आराधनेमध्ये वेळ घालवतो तेव्हा आपण ख्रिस्ताचे शरीर आणि रक्त यांच्यातील
ख्रिस्ताच्या गूढ शरीराशी योग्य संबंध जोडतो, जो आजही जगात विद्यमान आणि सक्रिय आहे.
खरंतर ,जेव्हा आपण
पवित्र मिस्साबलिदानात पवित्र ख्रिस्तशरीर स्वीकार करतो तेव्हा आपल्यातील
ख्रिस्ताची खरी आणि वास्तविक उपस्थिती जगामध्ये घेऊन जाण्याची कल्पना असते. पवित्र
मिस्साबलिदान म्हणजे आपण स्वतःला वाचवण्यासाठी आणि आपल्यातील वैयक्तिक पावित्र्य
जिवंत करण्यासाठी केलेली केवळ एक खाजगी
भक्ती नाही. होय, आम्ही
तसे करतो पण आपल्या स्वर्गीय बापाचे ध्येय
पूर्ण करण्याच्या मोठ्या उद्देशाने. त्याने आपल्या पुत्राला जगात पाठवले ते दोषी
ठरवण्यासाठी नव्हे तर मानवानेचे तारण करण्यासाठी. ख्रिस्ताचे ध्येय हे आपणा
सर्वांचे ध्येय आहे. पवित्र
मिस्साबलिदानाची भक्ती त्या प्रभूच्या मिशनमध्ये अगदी मध्यवर्ती आहे, एक मिशन जे सक्रिय आहे, निष्क्रिय नाही, जगात आहे, आणि त्यापासून वेगळे नाही.
प्रिय मित्रांनो, आज आपण आपल्या हृदयात येशूची उपस्थिती
अधिक खोलवर ओळखूया. पवित्र मिस्साला फक्त रविवारी येण्यापेक्षा, वारंवार येण्याचा प्रयत्न करू. पवित्र
ख्रिस्तशरीराचा स्वीकार केल्यानंतर काही क्षण थांबून त्याचे आभार मानू. आपले जीवन, आपले संघर्ष आणि आपला आनंद प्रभू येशूला
अर्पण करू. प्रभू येशू आजही आपल्यासोबत आहे. तो आपल्या हृदयात राहतो आणि आपल्याला
शाश्वत जीवन देतो. या सणात आपण त्याच्या प्रेमाने भरून जाऊ आणि त्याचे शरीर बनून
जगात त्याचे प्रेम दाखवू. आमेन.
विश्वासू लोकांच्या प्रार्थना
प्रतिसाद: हे प्रभो तुझ्या शरीर व रक्ताद्वारे आमचा विश्वास दृढ
कर.
१. ख्रिस्तसभेची धुरा वाहणारे पोप लियो, कार्डिनल्स, बिशप्स, सिस्टर
ब्रदर व इतर प्रापंचिक या सर्वावर देवाचा विशेष आशीर्वाद यावा व त्यांना त्यांच्या
पवित्र कार्यात प्रभूचे मार्गदर्शन व कृपा मिळावी म्हणून आपण प्रार्थना करू या.
२. आपल्या देशातील सर्व नेत्यांवर
व अधिका-यांवर परमेश्वराचा आशिर्वाद असावा, त्यांना सत्याने
आणि न्यायाने राज्यकारभार करण्यास परमेश्वराने मदत करावी तसेच सर्व वाईट
वृत्तींपासून त्यांना दूर ठेवून चांगल्या मार्गावर चालण्यास सहकार्य लाभावे
म्हणून आपण प्रार्थना करू या.
३. आपल्या समाज्यातील असंख्य
बेरोजगार तरुण आणि तरुणी ह्याना नोकरी मिळावी, जे भरकटलेले आहेत त्यांना सन्मार्गास लावावे तसेच जे
वासना आणि व्यासानांच्या आहारी गेलेले आहेत अश्यांची सुटका करावी म्हणून
त्यांच्यासाठी प्रार्थना करू या.
४. जे निराश होऊन देवापासूनदूर गेलेले आहेत, त्यांना प्रभूने स्पर्श करावा व त्यांच्या जीवनात परिवर्तन घडून यावे व
त्यांनी परत एकदा प्रभूने दाखविलेल्या मार्गावर चालावे आणि जीवनाचे सार्थक करावे
म्हणून आपण पुनरुत्थित ख्रिस्ताकडे प्रार्थना करूया.
५.आमच्या धर्मग्रामातील, आमच्या कुटुंबातील मरण पावलेल्या सर्व व्यक्तींना तुझ्या स्वर्गराज्यात चिरंतन शांती दे आणि अनंत तेजाने त्यांना प्रकाशित कर.
६. थोडावेळ शांत राहून आपण आपल्या
सामाजिक, कौटुंबिक व वयक्तिक
हेतूंसाठी प्रार्थना करू या.
