Reflections for the homily of Fourth Sunday of Easter (26/04/2026) by Br. Saurav Patil

पुनरुत्थान काळातील चौथा रविवार 

दिनांक: २६/०४/२०२३

पहिले वाचन: प्रेषितांची कृत्ये २:१४,३६-४२..

दुसरे वाचन: १ पेत्र २:२०-२५..

शुभवर्तमान: योहान १०:१-१०.

प्रस्तावना:

प्रिय बंधूंनो आणि भघीनींनो, आजच्या पवित्र वचनांमधून देव आपल्याशी अतिशय जवळून आणि प्रेमाने संवाद साधत आहे. आपल्या जीवनात अनेक आवाज, अनेक मार्ग आणि अनेक आकर्षणे आपल्याला वेगवेगळ्या दिशांना खेचत असतात, पण या गोंधळात देव आपल्याला थांबून विचार करायला बोलावतो आपण कोणाचा आवाज ऐकत आहोत आणि कोणत्या मार्गावर चालत आहोत? आजची वाचने आपल्याला आपल्या जीवनाकडे नव्या दृष्टीने पाहण्यास आमंत्रण देतात. ती आपल्याला पश्चात्तापाची गरज, ख्रिस्ताच्या दु:खातून मिळणारा आदर्श आणि येशू या खऱ्या मेंढपाळावर विश्वास ठेवण्याचे महत्त्व शिकवतात. चला, या वचनांद्वारे देव आपल्याला काय सांगू इच्छितो, ते मनापासून ऐकूया आणि आपल्या जीवनात त्याची अंमलबजावणी करण्याचा प्रयत्न करूया

मनन चिंतन

प्रिय बंधूंनो आणि भगिनींनो, आजच्या वाचनांमध्ये आपल्याला एक अत्यंत सुंदर आणि आध्यात्मिक सत्य दिसते. येशू ख्रिस्त हा आपला खरा मेंढपाळ आहे, जो आपल्याला पापातून मुक्त करतो, आपल्या जखमा भरून काढतो आणि आपल्याला खरे जीवन देतो. प्रेषितांची कृत्ये या पहिल्या वाचनात संत पेत्र लोकांसमोर उभा राहून धाडसाने सांगतो की ज्याला त्यांनी क्रूसावर खिळले, त्यालाच देवाने प्रभू आणि ख्रिस्त केले आहे. हे ऐकून लोकांच्या अंतःकरणाला टोचणी लागते आणि ते विचारतात, “आता आम्ही काय करावे?” या प्रश्नातच त्यांच्या परिवर्तनाची सुरुवात दिसते. पेत्र त्यांना सांगतो पश्चात्ताप करा, बाप्तिस्मा घ्या आणि पापांची क्षमा मिळवा. यामध्ये आपल्यासाठीही एक स्पष्ट संदेश आहे की देव आपल्याला नेहमी नवीन सुरुवात करण्याची संधी देतो; आपण कितीही चुकलो तरी त्याचे प्रेम आणि दया आपल्यासाठी खुलीच असते.

दुसऱ्या वाचनात संत पेत्र आपल्याला येशूच्या दु:खाचा अर्थ समजावून सांगतो. येशूने कोणतेही पाप केले नाही, तरी त्याने अपमान, अन्याय आणि वेदना सहन केल्या, पण त्याने कधीही सूड घेतला नाही. उलट, त्याने सर्व काही देवाच्या हाती सोपवले. या माध्यमातून तो आपल्याला शिकवतो की खरे ख्रिस्ती जीवन म्हणजे फक्त सुखात देवावर विश्वास ठेवणे नव्हे, तर दु:खातही विश्वास टिकवणे होय. “तुम्ही मेंढरांसारखे भरकटले होते, पण आता तुम्ही तुमच्या आत्म्याच्या मेंढपाळाकडे परत आला आहात,” या वाक्यातून आपल्याला जाणवते की येशू आपल्याला हरवलेल्या अवस्थेतून पुन्हा आपल्या जवळ आणतो आणि आपल्या जखमा भरून काढतो.

आजच्या शुभावार्तमानामध्ये येशू स्वतःला “मेंढपाळ” आणि “द्वार” म्हणून ओळख करून देतो. तो सांगतो की खरा मेंढपाळ आपल्या मेंढरांना नावाने ओळखतो, त्यांना सुरक्षित ठेवतो आणि त्यांच्यासाठी आपले जीवन अर्पण करतो. तो पुढे म्हणतो, “मी आलो आहे की त्यांना जीवन मिळावे आणि ते परिपूर्णपणे मिळावे.” याचा अर्थ असा की येशू फक्त आपल्याला पापातून वाचवण्यासाठी नाही, तर आपले जीवन समृद्ध, अर्थपूर्ण आणि पूर्ण करण्यासाठी आला आहे. या तिन्ही वाचनांमध्ये एक स्पष्ट आध्यात्मिक प्रवास दिसतो. पश्चात्तापातून जागृती, ख्रिस्ताच्या उदाहरणातून जीवन आणि शेवटी मेंढपाळाच्या मार्गावर चालणे.

आजच्या जगात हा संदेश अत्यंत महत्त्वाचा आहे, कारण आपण अनेक “खोट्या मेंढपाळांच्या आवाजात हरवून जातो. जसे की पैसा, प्रतिष्ठा, सोशल मीडियाचे आकर्षण, आणि तात्पुरता आनंद. हे सर्व आपल्याला काही काळासाठी सुख देतात, पण शेवटी रिकामेपण आणि असंतोष निर्माण करतात. येशू मात्र आपल्याला खरे आणि शाश्वत जीवन देतो. म्हणूनच आज आपल्याला स्वतःला विचारण्याची गरज आहे. आपण कोणाचा आवाज ऐकतो? देवाचा की जगाचा? संत पेत्राची हाक आजही आपल्यासाठी आहे, पश्चात्ताप करा, देवाकडे वळा आणि नवे जीवन सुरू करा. तसेच, जीवनातील अडचणी, ताणतणाव आणि अन्याय यामध्येही आपण ख्रिस्तावर विश्वास ठेवायला शिकलो पाहिजे, कारण तोच आपल्याला मार्ग दाखवतो आणि शेवटी विजयाकडे नेतो.

म्हणून, प्रिय बंधूंनो-भगिनींनो, आपण आज या वचनातून प्रेरणा घेऊया, आपल्या चुका ओळखून देवाकडे परत वळूया, ख्रिस्ताचे  प्रेम आणि सहनशीलतेचे अनुकरण करूया, आणि आपल्या खऱ्या मेंढपाळाच्या आवाजावर विश्वास ठेवून त्याच्या मार्गावर चालूया. कारण त्याच्यामध्येच आपल्याला खरे जीवन, शांती आणि आनंद सापडतो. आमेन.

विश्वासू लोकांच्या प्रार्थना

प्रतिसाद: “हे परमेश्वर दया कर आणि तुझ्या कळपाची प्रार्थना ऎक”

१) ज्या तरुण तरुणींना परमेश्वर आपल्या मळ्यात कार्य करण्यासाठी पाचारण देत आहे त्यांनी परमेश्वरी हाकेला योग्य प्रतिसाद देऊन परमेश्वर दाखवत आहे त्या मार्गाने आपलं जीवन जगण्यासाठी त्यांना प्रेरणा आणि शक्ती मिळावी म्हणून आपण प्रार्थना करूया.

२) जी लोक हरवलेल्या मेंढरांप्रमाणे ख्रिस्तसभेपासून दुरावलेली आहेत आणि जिवंत देवापासून दूर गेलेली आहेत, अशांना आपल्या जीवनात परमेश्वराचा प्रकाश दिसावा आणि प्रभू येशू ख्रिस्त हाच आपल्या जीवनाचा उत्तम मेंढपाळ म्हणून ओळख आणि जाणीव व्हावी म्हणून आपण प्रार्थना करू या.

३) आपल्या ख्रिस्तसभेची आणि आपल्या समाजाची धुरा वाहणाऱ्या सर्व नेत्यांनी ख्रिस्तासारखा निस्वार्थी सेवेचा, त्यागाचा आणि प्रेमाचा ध्यास घेऊन सदैव लोककल्याणासाठी स्वतःला वाहून घ्यावे म्हणून आपण प्रार्थना करूया.

४) आपल्या सर्व आजारी व्यक्तींना परमेश्वरी कृपेचा गुणकारी स्पर्श व्हावा आणि त्यांना उत्तम मेंढपाळाकडून नवजीवन लाभावे म्हणून आपण प्रार्थना करूया.

५) आपल्या कुटुंबातील आणि धर्मग्रामातील सर्व मृत बंधू-भगिनींना परमेश्वराच्या स्वर्गीय नंदनवनात सार्वकालिक सुखाचा शांतीचा उपभोग घेता यावा म्हणून आपण प्रार्थना करूया.