Reflections for the homily of Ascension of Our Lord (17/05/2026) by Fr. Pravin Bandya

प्रभूच्या स्वर्गारोहणाचा सोहळा

दिनांक: १७/०५/२०२६

पहिले वाचन: प्रेषितांची कृत्ये १:१-११

दुसरे वाचन: इफिसकरांस पत्र १:१७-२३

शुभवर्तमान: मत्तय २८:१६-२०.

प्रस्तावना:

प्रिय बंधूंनो आणि भगिनींनो,

आज आपण आनंदाने प्रभू येशूच्या स्वर्गारोहणाचा सण साजरा करीत आहोत. पुनरुत्थानानंतर चाळीस दिवस शिष्यांबरोबर राहून प्रभू येशू आज गौरवाने पित्याकडे जातो; पण शिष्यांना एकटे सोडत नाही; परंतु तो वचन देतो, “मी सदासर्वकाळ तुमच्याबरोबर आहे.”

आजच्या पहिल्या वाचनात आपण वाचतो की येशू वर स्वर्गात जातो आणि शिष्यांना सुवार्ता कार्याची जबाबदारी देतो. दुसऱ्या वाचनात आपण वाचतो की संत पौल ख्रिस्ताच्या गौरवशाली राज्याची आठवण करून देतो. शुभवर्तमानात येशू ख्रिस्त आपणास एक महान आज्ञा देतो, “जा, सर्व राष्ट्रांना माझे शिष्य करा.”

स्वर्गारोहण म्हणजे येशूचा निरोप नाही, तर आपल्या सुवार्ता कार्याची सुरुवात आहे. आज प्रभू आपल्यालाही विश्वासात दृढ राहून जगात त्याचे साक्षीदार होण्यासाठी बोलावत आहे. या पवित्र मिस्सामध्ये आपण आपली मने उघडी करून प्रभूचे वचन ऐकूया.

मनन चिंतन:

प्रिय भाविकांनो, आजचा स्वर्गारोहणाचा सण आपल्याला एक सुंदर सत्य शिकवतो; येशू दूर गेला नाही, तर अधिक जवळ आला आहे. तो स्वर्गात गेला, पण आपल्या लोकांना सोडून नाही. उलट, तो आपल्याला मिशन देऊन, आशा देऊन आणि पवित्र आत्म्याचे वचन देऊन गेला.

शिष्यांसाठी हा प्रसंग कदाचित विरहाचा वाटला असेल. ज्याच्याबरोबर ते चालले, त्यांनी खाल्ले, व शिकले, तो प्रभू आता त्यांच्या डोळ्यांसमोर स्वर्गात जातो. पण देवदूत त्यांना विचारतात: “तुम्ही आकाशाकडे का पाहत उभे आहात?” हा प्रश्न आज आपल्यालाही विचारला जातो. फक्त आकाशाकडे पाहत बसायचे नाही, तर पृथ्वीवर प्रभूचे कार्य करायचे आहे.

शुभवर्तमानात ख्रिस्त म्हणतो: “जा आणि सर्व राष्ट्रांना माझे शिष्य करा.” ही आज्ञा केवळ धर्मगुरूंसाठी किंवा धर्मभगिनीसाठी नाही; तर प्रत्येक ख्रिस्ती व्यक्तीसाठी आहे. प्रत्येक बाप्तिस्मा घेतलेला माणूस मिशनरी आहे. आपल्या शब्दांनी, वर्तनाने, प्रेमाने, क्षमेद्वारे आपण येशूची साक्ष देऊ शकतो.

स्वर्गारोहण आपल्याला वर पाहायला शिकवते, पण पाय जमिनीवर ठेवून जगायला देखील शिकवते. आपले ध्येय स्वर्गीय आहे, पण काम पृथ्वीवर आहे. कुटुंबात प्रेम पसरवणे, दुःखी लोकांना आधार देणे, अन्यायाविरुद्ध उभे राहणे, गरिबांची सेवा करणे; हेच आजच्या काळातील सुवार्ता प्रचार आहे.

संत पौल आजच्या दुसऱ्या वाचनात सांगतो की ख्रिस्त गौरवात राज्य करतो. याचा अर्थ आपल्या जीवनावर अंधार, पाप, मृत्यू किंवा निराशा यांचा शेवटचा शब्द नाही. शेवटचा शब्द ख्रिस्ताचा आहे. म्हणून ख्रिस्ती जीवन हे आशेचे जीवन आहे.

येशू स्वर्गात गेला, पण जाण्यापूर्वी एक महान वचन त्याने आपणास दिले: “मी सदासर्वकाळ तुमच्याबरोबर आहे.” किती सुंदर आश्वासन! आपण एकटे नाही. संघर्षात, सेवेत, प्रार्थनेत, अश्रूंमध्ये आणि आनंदात प्रभू आपल्याबरोबर आहे.

आपण स्वतःस प्रश्न विचारूया: मी फक्त आकाशाकडे पाहणारा शिष्य आहे, की जगात पाठवलेला साक्षीदार?

मी ख्रिस्ताच्या मिशन कार्यात सहभाग घेतो का?

माझे जीवन सुवार्तेचे प्रतिबिंब आहे का?

स्वर्गारोहण म्हणजे समाप्ती नाही तर ती नवीन सुरुवात आहे. प्रभू वर गेला, जेणेकरून आपण वरच्या गोष्टींची आशा धरू; पण त्याचबरोबर पृथ्वीवर प्रेम आणि सत्याचे राज्य उभे करू.

आज आपण प्रभूला विनंती करूया: “प्रभू येशू, तुझ्या स्वर्गारोहणाच्या आनंदात आम्हालाही सहभागी कर. आमच्या जीवनाला तुझ्या सुवार्तेचे साक्ष बनव. आम्हाला भीती नको, धैर्य दे; निष्क्रियता नको, मिशनरी उत्साह दे; आणि तू सदैव आमच्याबरोबर आहेस या विश्वासात आम्हाला दृढ कर. आमेन.”

विश्वासू लोकांच्या प्रार्थना

प्रतिसाद: “हे प्रभू, स्वर्गीय सुख प्राप्त करण्यास आम्हांस साहाय्य कर.”

१. ख्रिस्तसभेचे अधिकारी पोप महाशय, बिशप्स, धर्मगुरू, धर्मभगिनी व सर्व प्रापंचिक ह्या सर्वांना पुनरूत्थित प्रभू येशू ख्रिस्ताने चांगले आरोग्य बहाल करावे व त्यांच्या कार्यावर प्रभूचा आर्शिवाद असावा, म्हणून आपण प्रभूकडे प्रार्थना करूया.

२. हे प्रभू येशू ख्रिस्ता तुझी कृपा दृष्टी आमच्या देशांच्या सर्व नेत्यांवर आणि अधिकाऱ्यांवर असू दे. त्यांना सत्याने आणि न्यायाने राज्यकारभार करण्यास मदत कर व त्यांना सर्व वाईट वृत्तीपासून दूर ठेव व चांगल्या मार्गांवर चालण्यास मदत कर, म्हणून आपण प्रभूकडे प्रार्थना करू या.

३. आपणा सर्वाना पवित्र आत्म्याचे दान लाभावे व देवास अनुरूप असे जीवन आपण जगावे व ख्रिस्ताची साक्ष इतरांस आपण आपल्या वर्तणुकीतून द्यावी म्हणून आपण प्रार्थना करूया.

४. हे प्रभू परमेश्वरा आज आम्ही विशेष करून सर्व आजारी माणसांसाठी प्रार्थना करितो, त्यांच्या कुटुंबावर तुझा आर्शिवाद असू दे व सर्व सकंटानां सामोरे जाण्यास त्यांना शक्ती दे. पुनरूत्थित प्रभू येशू ख्रिस्ताने त्यांना चांगले आरोग्य द्यावे व सर्व आजारातून त्यांची सुटका करावी, म्हणून आपण प्रभूकडे प्रार्थना करू या.

५. थोडावेळ शांत राहून आपण आपल्या सामाजिक, कौटुंबिक व वयक्तिक हेतूंसाठी प्रार्थना करू या.