Reflection for the Homily of 13^th SUNDAY IN ORDINARY TIME (30-06-19) By Br. David Godinho

सामान्य  काळातील  तेरावा रविवार

दिनांक: ३०/ ६/ २०१९

पहिले वाचन : १ राजे १९:१६,१९-२१

दुसरे वाचन :  गलतिकारास पत्र ५: १,१३-१८

शुभवर्तमान : लूक ९: ५१-६२

माझ्या मागे या

प्रस्तावना :

आज देऊळमाता सामान्य काळातील तेरावा रविवार साजरा करीत आहे आणि आजची उपासना शिष्यत्व (DISCIPLESHIP) ह्या विषयावर मनन चिंतन करण्यास आपणांस पाचारण करीत आहे.

 राज्याच्या पहिल्या पुस्तकातुन घेतलेल्या पहिल्या वाचनात अलिशाला झालेल्या पाचरणाविषयी आपणांस ऐकावयास मिळते. गलतिकरास लिहिलेल्या पत्रात संत पौल आपणांस सांगत आहे कि, जर आपण पवित्र आत्म्याच्या प्रेरणेने आणि मार्गदर्शनाने चाललो, तर आपण खरोखर प्रभू ख्रिस्ताचे खरे शिष्य बनू शकतो. तर शुभवर्तमानात   प्रभू येशू ख्रिस्त आपणांस त्याचे शिष्य  होण्यास पाचारण करीत आहे. परंतु ख्रिस्ताचे एकनिष्ठ शिष्य होणे तेवढे सोपे नाही, त्यासाठी विनाअट आणि दृढ निश्चयाची नितांत गरज आहे.

ख्रिस्ताने दिलेल्या हाकेस स्वखुशीने आणि दृढ निश्चयाने होकार देण्यास पवित्र आत्म्याची कृपा आपण ह्या पवित्र मिस्साबलिदाना मध्ये आपण मागुया.

सम्यक विवरण:

पहिले वाचन : १ राजे १९: १६,१९-२१

अलिशाला झालेल्या पाचारण विषयी आपण १ राजे ह्या पुस्तकातून घेतलेल्या  उताऱ्यात आपणांस ऐकावयास मिळते. अलिशाला खरोखरी अभिषेक केला नसला तरी, एलियाचा झगा आपल्याला मिळेल हेच त्याच्यामागे जाण्याचे निमंत्रण आहे असे समजून अलिशाने घरच्या लोकांचा निरोप घेण्यासाठी थोडा अवधी मागून घेतला. त्यावर एलियाने थोडक्यात गूढ उत्तर दिले. पण त्यांतून त्याची विनंती मान्य केल्याचे दिसते. अशा प्रकारे एलियानंतर परमेश्वराचा शिष्य होण्यास  अलिशाला झालेले  पाचारण ह्या उताऱ्यात मुद्रित केले आहे.

दुसरे वाचन:  गलतिकारास पत्र ५: १,१३-१८

          पौलाचे गल्तीकरांस लिहिलेले पत्र त्याच्या स्वतंत्र्याची आठवण करून देत आहे. तो म्हणतो, “तुम्हांला स्वायत्तता करीता पाचारण झाले” आणि म्हणून गुलाम गिरित पडू नका असा इशारा संत पौल गलतीकरांस करीत आहे. देहस्वभावाच्या ताब्यात राहू नका. ख्रिस्तामधील स्वातंत्र्य म्हणजे मनास येईल तसे वागण्यास मोकळीक असे नसून; एकमेकांची प्रीतीने सेवा करणे होय. कारण देहस्वभाव हा अत्यंत स्वार्थी व विध्वंसक आहे आणि ह्या स्वभावाने वागणे म्हणजे मंडळीचा नाशच आहे असे होय.

म्हणून आपले रोजचे जीवन जगत असताना पवित्र आत्म्याच्या मार्गदर्शनावर आणि सामर्थ्यावर अवलंबून राहिल्या खेरीज पवित्र आत्मा आपणास चालवीत नाही. जो मनुष्य पवित्र आत्म्याच्या नियंत्रणाचा आपल्या इच्छेने स्वीकार करतो तो देह्वासनेने चालणारच नाही. म्हणून या नियंत्रणाचा दररोज व क्षणोक्षणी स्वीकार करीत राहण्याची गरज आहे.  

शुभवर्तमान : लूक ९: ५१-६२

          वधस्तंभावरचे लज्जास्पद दुःखसहन व मरण यासाठीच ख्रिस्त येशू या जगात आला होता. हि त्याच्या पित्याची इच्छा होती. त्याप्रमाणे करण्याचा त्याने दृठ निश्चय केला व यरुशलेमेच्या दिशेने आपल्या शिष्यांसह तो प्रवासाला निघाला. लुकचा अध्याय ९:५१ ते १९:४४ हा भाग यरुशलेमेच्याकडे वाटचाल ह्या शीर्षकाने ओळखला जातो. ह्या भागात दोन महत्वाचे मोठे विषय आहेत.

१)    येशु आणि धार्मिक अधिकारी ह्याच्या मधील ताणतणावाचे वातावरण

२)    येशूला त्याच्या शिष्यांना त्याच्या (येशूच्या) मरणासाठी तयार करण्याची आवश्यकता.

  येशू येरुश्लेमच्या दिशेने म्हणजेच त्याच्या क्रूसावरील मरणाच्या दिशेने वाटचाल करीत असताना त्याच्या शिष्यांना कशाप्रकारे खरे शिष्य ते होऊ शकतात ह्या विषयी मार्ग दर्शन करतो. येशूचा खरा शिष्य होण्यासाठी स्वतःला रिक्त केले पाहिजे.  स्वतःच्या इच्छा-आकांक्षा बाजूला सारून ख्रिस्ताने शिकविलेल्या मूल्यावर चालणे गरजेचे आहे व हे करताना आपल्याला कितीतरी समस्यांना सामोरे जावे लागेल हे मात्र निश्चित आहे.

बोधकथा:

          युनायटेड स्टेटच्या civil war (नागरी उद्धाला) सुरु होते तेंव्हा अब्राह्म लिंकन ने काही नेत्यांना प्रार्थनेसाठी आणि तदनंतर नाश्त्यासाठी बोलावले होते. लिंकन हे जरी चर्चमध्ये प्रार्थनेला जात नसत तरी सुद्धा ते एक अंधश्र्दावंत ख्रिस्ती व्यक्ती होता. त्याचा देवावर दृढ विश्वास होता. जेव्हा अब्राह्म लिंकन ने प्रार्थनेला सुरुवात केली तेव्हा त्यातल्या एका नेत्याने मध्येच लिंकनला म्हटले, “राष्ट्रपती, परमेश्वर आपल्या बाजूला असावा म्हणून आपण प्रार्थना करूया.” एवढ्यात राष्ट्रपती लिंकन ने त्या नेत्याला प्रतिसाद देत म्हटले, “नाही, आपण तशी प्रार्थना न करता, आपण देवाच्या बाजूने असावे अशी प्रार्थना  करूया.”

          प्रार्थना झाल्यानंतर जमलेल्या नेत्यांना सल्ला देत असताना लिंकन म्हणाले, ‘ धर्म हे असे साधन नाही कि ज्याद्वारे देव आपल्या इच्छेप्रमाणे सर्व काही करतो; परंतु आपणास देवाच्या इच्छेप्रमाणे वागण्यास आणि जगण्यासाठी एक आमंत्रण आहे. त्याचप्रमाणे ख्रिस्ताचे खरे अनुयायी होण्यासाठी ख्रिस्ताच्या मूल्याप्रमाणे जगण्यास आणि वागण्यास आपण शिकलो पाहिजे.      

मनन चिंतन :

“आम्ही शिष्य प्रभूचे

एक शरीरी, एकच आत्मा

त्याच्याच प्रती प्रतीछायेचे”

सुंदर अशा गीताच्या ह्या काही ओवी आहेत आणि ह्या ओवी शिष्त्वा बद्दल भरपूर अस काही आपणांस शिकवतात किवा बोध करतात. ख्रिस्ताचे शिष्य होण्यासाठी म्हणजेस प्रतीख्रिस्त होण्यास आमंत्रण करतात. ख्रिस्ताचे शरीर आणि त्याचा आत्मा होणे म्हणजे जणू ख्रिस्तालाच धारण करणे होय.

आजची वाचणे आपणास शिष्यत्वा किवा अनुयाया विषयी बोलत आहेत. येशू ख्रिस्ताला अनुसरणे म्हणजे नक्की काय? असा प्रश्न बऱ्याच वेळा आपल्या मनात घर करून बसतो. कदाचित आपल्यापैकी काही लोकांना ख्रिस्ताच्या मार्गावरून चालणे  किवा शिष्य होणे म्हणजे ख्रिस्तसभेचे नियम पाळणे किवा पाप न करण्याची दक्षता घेणे होय. जरी नियम पाळणे किवा पाप करण्याच्या संधी टाळणे हे ख्रिस्ताचा मार्ग अवलंब करण्याचे किवा शिष्य होण्याचे एकमेव साधन आहे असे आपण खात्रीपूर्वक सांगू शकत नाही.

नवीन करारात आपणांस पुन्हा पुन्हा सागण्यात आलेले आहे कि, आपण ख्रिस्ताशी एकरूप झालो पाहिजे त्याच्याशी सलग्न असलो पाहिजे. कारण तो आपल्याशी एकरूप आहे. अनेक वेळा विशेष करून ख्रिस्ताच्या स्नानसंस्कारा वेळी आणि त्याच्या रूपांतरावेळी आकाशातून पित्याची वाणी ऐकण्यास त्याचा संदेश आपल्या जीवनात अवगत करण्यास, त्याने दिलेल्या शिकवणुकीचा कित्ता आपण गिरवण्यास आपणांस आजची उपासना जागृत आहे. ख्रिस्ता बरोबर चालण्यास, त्याचे ऐकण्यास त्याच्या वाणीनुसार आमचे जीवन घडविण्यास आपणास आमंत्रित  केले आहे. ख्रिस्ताचा शिष्य बनणे किवा त्याचा मार्ग अनुसरणे म्हणजे ख्रिस्ताला आपल्या जीवनात प्रत्येक गोष्टीत म्हणजेच आपले विचार, शब्द, किंबहुना आपले संपूर्ण जीवन ख्रिस्ताच्या सारखे झाले पाहिजे ह्या साठी आपण प्रयत्नशील राहिलो पाहिजे.

ख्रिस्ताला अनुसरणे इतके सोपे नाही. अनेक वेळा आपण ख्रिस्ती आहोत किवा ख्रिस्ताचे शिष्य आहोत म्हणून आपल्याला नाकारले जाईल. हे प्रभू ख्रिस्त स्वत: आपणास सांगत आहे. ख्रिस्ताचा शिष्य होण्यास किवा त्याचा पाठलाग करण्यासाठी आपल्या समोर काही अटि ठेवण्यात आलेल्या आहेत.

१. पहिली अट: लुक ९:५७ -५८

वाटेने जात असता एक मनुष्य येशूला म्हणाला, “आपण जाता तेथे मी आपल्या मागे येईन” येशूचे उत्तर सरळ आणि स्पष्ट होते. जो मनुष्य येशूच्या मागे जाऊ इच्छितो त्याने एक गोष्ट लक्षात ठेवायला पाहिजे, ती म्हणजे ऐश्वर्यात जगणे नव्हे तर गरिबीत जगणे म्हणजेच जीवनात देवावर अवलंबून राहणे होय.

२. दुसरी अट: लुक ९:५९-६०

दुसऱ्या एकाला तो म्हणाला, “माझ्या मागे ये” हेच शब्द ख्रिस्ताने त्याच्या पहिल्या शिष्यासाठी उद्गारले होते (मार्क: १:१७,२०; २:१४). ह्या आमंत्रणाला त्या वक्तीचा प्रतिसाद सकारात्मक होता. परंतु तो म्हणतो, “प्रभुजी अगोदर माझ्या वडिलांचं मृत देह दफन कारायला मला जाऊ दया”. परंतु येशूचे उत्तर थोडे कठोर आहे. तो म्हणतो, “जे स्वतः मेलेल्यांत जमा आहेत अशांनी मेलेल्यांना पुरावे. तू मात्र देवराज्याची घोषणा करू लाग. ह्याचा अर्थ असा कि, प्रभू येशूचा शिष्य होण्याचा निर्णय हा ठाम असला पाहिजे. त्याने पुन्हा मागे वळून पाहता कामा नये.

३.तिसरी अट:लुक ९:६१-६२

मग आणखी एकजण म्हणाला, “मी आपला अनुयायी होतो पण प्रथम मला घरच्यांचा निरोप घेऊ दया” आणि पुन्हा एकदा येशूचा प्रतिसाद हा स्पष्ट व सरळ आहे. तो म्हणजे “एकदा नांगर हातात धरल्यावर मागे पाहत राहणारा देवराज्याच्या उपयोगाचा नाही. येथे हा एलिया प्रवकत्या पेक्षा खूपच आव्हानात्मक आहे हे आपणांस दिसून येते.

ख्रिस्ताच्या मागे जाणे म्हणजे स्वतःला विनाअट, येशूच्या कार्यात झोकावून देणे. ह्या जगातील कोणत्याही भौतिक गोष्टी पेक्षा प्रभू येशूला सर्वात प्रथम स्थान देणे. त्याच्या हाकेला जीवनातील प्रत्येक प्रसंगी (चांगल्या किवा वाईट) होकार देणे व प्राधान्य देणे होय. 

विश्वासु लोकांच्या प्रार्थना:

प्रतिसाद: हे प्रभू, आम्हाला तुझे शिष्य बनव.

१. आपल्या ख्रिस्तसभेचे अधिकारी पोप फ्रान्सीस, सर्व बिशप्स, धर्मगुरू आणि व्रतस्थ बंधू-भगिनी ह्यांनी येशू ख्रिस्त हा खरा गुरु आहे आणि आपण सर्वजण त्याचे शिष्य आहोत ह्याची जाणीव लोकांना करून द्यावी म्हणून आपण प्रार्थना करूया.

२. अनेक तरुण-तरुणींनी ख्रिस्ताची “माझ्या मागे या” हि हाक एकूण त्याचा शिष्य होण्यास स्व:खुशीने पुढे यावे व ह्या त्याच्या निर्णयाला आई-वडिलांनी प्रोत्साहन दयावे म्हणून आपण प्रार्थना करूया.

३. जी मुलं शाळेत आणि कॉलेजात शिकत आहेत अशांना त्यांच्या अभ्यासात प्रभूने सहाय्य करावे आणि चांगले नागरिक होण्यास त्यांना योग्य ती कृपाशक्ती लाभावी म्हणून आपण प्रार्थना करूया.

४. जी तरुण पीडी आपल्या भावी आयुष्याची तैयारी करीत आहेत, त्यांनी आपल्या कलागुणा व क्षमते नुसार योग्य त्या करियरची निवड करावी जेणेकरून ते जीवनात सुखी-समाधानी राहू शकतील म्हणून आपण प्रार्थना करूया.

५. आपणास ह्या वर्षी चांगला पाउस मिळावा व आपल्या प्राथमिक गरजा भागवल्या जाव्यात म्हणून आपण विशेष प्रार्थना करूया.

६. येथे जमलेल्या आपणा प्रत्येकाला येशूचे खरे व विश्वासू शिष्य होण्यासाठी आपणांस प्रेरणा मिळावी म्हणून आपण परमेश्वराकडे प्रार्थना करूया.

७. थोडा वेळ शांत राहून आपल्या व्यक्तीक आणि सामाजिक गरजा ख्रिस्ता समोर मांडूया.   

  

Reflection for the Feast of Body and Blood of Christ (23-06-2019) By Br. Julius Rodrigues 

ख्रिस्ताच्या अतिपवित्र शरीर व रक्ताचा सोहळा

दिनांक: २९-५-२०१६

पहिले वाचन: उत्पत्ती १४: १८-२०

दुसरे वाचन: १ करिंथ ११:२३-२६

शुभवर्तमान: लुक ९:११-१७

 प्रस्तावना:

“घ्यानी खा देह माझा छीन्न विछीन्न तुमच्यासाठी

घ्यानी प्या रक्त माझे भळभळ वाहे तुमच्यासाठी”

आज देऊळमाता मोठ्या आनंदाने प्रभू येशू ख्रिस्ताच्या अतिपवित्र शरीर आणि रक्ताचा सोहळा साजरा करत असताना प्रभू येशूच्या महान त्यागाची व प्रेमाची आठवण करून देत आहे.   

आजच्या तिन्ही पवित्र वाचनात प्रभू येशूच्या स्वर्गीय भोजन ह्या वर प्रकाश झोत टाकत आहे. आजच्या वाचनात आम्हांला जो भोजना विषयी आविष्कार केला आहे ते भोजन सर्व साधारण भोजन नसून शाररीक व आत्मिक भोजन आहे. कि ज्या द्वारे मनुष्य आपल्या मानवी जीवनात काल क्रमण करू शकतो.   

मानवी शरीराच्या पोषणासाठी जशी भाकरीची नितांत गरज असते त्याच प्रमाणे आपल्या आध्यात्मिक पोषणासाठी, तारणसाठी व सार्वकाळीक जीवनासाठी आपल्याला प्रभू ख्रिस्ताची गरज आहे व त्याच्या भोजनात सहभागी होण्यास आगत्याचे आहे. ख्रिस्ताने क्रुसावर आपले शरीर व रक्त सांडून आपल्याला पापांच्या बंधनातून मुक्त केले व स्वतः आम्हासाठी त्याची आठवण म्हणून वेदीवर बळी बनला व आम्हांसाठी त्याच्या देहाच दान करून आम्हांमध्ये भाकरीच्या व द्राक्षरसाच्या रूपाने आम्हांमध्ये वस्ती केली आणि आमचं दररोज आध्यात्मिक पोषण करत आहे.

आज तोच ख्रिस्त आमच्या विश्वासाच द्दोतक आहे. म्हणून आजच्या सणाच्या दिवशी मोठ्या भक्ती भावाने श्रध्येने ह्या मिसात सहभागी होवू यां व आपल अंतःकरण ख्रिताच वस्तीस्थान करूया.

सम्यक विवरण:

पहिले वाचन: उत्पत्ती १४: १८-२०

उत्त्पतीच्या पुस्तकात भाकर व द्राक्षारसाचा उल्लेख केला आहे. अब्राहामने कदार्लार्गोमर आणि त्याच्याबरोबरचे राजे यांस सामोरे जाऊन त्यांच्या वर विजय मिळविला. ह्या कर्तुत्वाबद्दल शालेमाचा राजा मलकीसदेक जो देवाचा याजक होता, त्याने भाकर व द्राक्षरस घेऊन अब्राहाकडे  गेला आणि त्याला आशीर्वाद दिला. 

दुसरे वाचन: १ करिंथ ११:२३-२६

 संत पौल, प्रभू भोजनाचे महत्व व गांभीर्य करिंथ येथील मंडळीच्या निदर्शनास आणत आहे. वल्हांडणाचे भोजन चालू असता, ख्रिस्ताने मेजावरील बेखमीर भाकर घेतली. ही बेखमीर भाकर ख्रिस्ताचे दैवी व्यक्तिमत्व व जीवन दर्शविते. ख्रिस्ताने स्वतः भाकर होऊन स्वतःचे अर्पण केले. रक्त सांडल्याशिवाय  क्षमा मिळत नाही (इब्री ९:२२). ख्रिस्ताच्या रक्ताद्वारे देवाने पापक्षमेचा नवा आविष्कार केला आहे. प्रभू भोजन ख्रिस्ताच्या मरणाची,  तारणाच्या महान योजनेची आणि ख्रिस्ताच्या पुनरागमनाची घोषणा आहे,  असे संत पौल या वाचनात सांगत आहे.

शुभवर्तमान: लुक ९:११-१७

बारा जण आपली कामगिरी संपवून परत माघारी आले आहेत, येथे प्रभू येशूची इच्छा होती कि शिष्यांना घेऊन एकांतस्थळी विसाव्यासाठी जावे. पण लोकांच्या गर्दीमुळे ते अशक्य झाले. म्हणून येशूने ही संधी साधून लोकांना शिक्षण देऊ लागला. दिवसभर येशू शिकवण देत होता. जेव्हा सायंकाळच्या सुमारास शिष्यांना लोकांच्या भोजनाची काळजी वाटू लागली. कारण त्यांच्याकडे पुरेसी शिदोरी नव्हती व अन्न विकत घेण्यास पैसेही नव्हते.

त्यांच्या जेवणाचा प्रश्न गहणच होता. तुम्ही त्यांच्या जेवणाची व्यवस्था करा असे येशु ख्रिस्ताने म्हणताच, ते पेचात पडले. आमच्याजवळ असलेल्या पाच भाकरी व दोन मासे एवढ्याने आम्ही काय करणार अशी त्यांना खंत वाटू लागली. तेवढे कारण प्रभू येशूने म्हणतो जे आहे तेवढ़ पुरे आहे. नंतर प्रभू येशूने भाकर व माश्यांना आशीर्वाद देऊन लोकांना वाढ़ण्यास सांगतो.

मनन चिंतन:

“मी भाकर जीवनाची, स्वर्गीय भाकर मी”

    आज आपण ख्रिस्ताच्या अतिपवित्र शरीर आणि रक्ताचा सोहळा साजरा करीत आहोत. आज आपण जर समाज्यात पाहिले तर आपणास आढळून येईल की प्रत्येक जण भुकेला आहे, कोणी पैशाचा, कोणी संपतीचा, कोणी शरीराला, कोणी नावलौकिकपणाचा तर कोणी आध्यात्मिकतेचा अश्या अनेक प्रकारच्या भुका मानवास लागल्या आहेत आणि अश्या ह्या परस्थितीमध्ये आपण अडकून पडलो आहोत. भूक लागणे सहाजीकच आहे परंतु ती भागवण्यासाठी मी कोणते मार्ग अनुसरतो ते देखील तितकेच महत्वाचे आहे स्व:ताचे शरीर व रक्त देणे म्हणजे सर्वस्वाचा त्याग करणे होय आणि हा त्याग आपल्या प्रभू ख्रिस्ताने केला.

भूक लागणे हा मानवी जीवनाचा अविभाज्य घटक आहे आणि जर आपण आजूबाजूला पहिले तर आपणांस आढळून येईल की प्रत्येक व्यक्ती हा कोणत्या ना कोणत्या भुकेने ग्रासलेला आहे. आपल्यातील प्रत्येक व्यक्ती भुकेला आहे. कोणी पैशाचा भुकेला तर कोणी संपतीचा तर कोणी मान-सन्मानाचा तर कोणी नावलौकीक्ता तर कोणी पोटाचा. प्रत्येक जन हि भूक भागवण्याचा अतोनात प्रयत्न करत आहे. स्वताःचा विकास, स्वताचे सरंक्षण आणि स्वतःला सर्वात जास्त फायदा कसा होईल ह्याकडे प्रत्येकाचा कल लागला आहे ( परंतु आज आपण ख्रिस्तामध्ये काहीतरी वेगळेपणा पाहणार आहोत) त्यासाठी कोणत्याही स्थंरालाजाऊन किंवा कोणतेही मार्ग अनुक्रमून तो आपली खळगी भरण्याचा प्रयत्न आज मानव करत आहे. जो ख्रिस्त  तुमच्या आणि माझ्यासारखा आहे तो स्वताःहाचे शरीर आणि रक्त देत आहे. तो त्याच्या सर्वस्वाचा त्याग करत आहे. आपला प्राण तो क्रुसावर देऊन आपले शरीर आणि रक्त आपल्या पोषणासाठी तो आपणांस प्रदान करीत आहे. दुसऱ्याची भूक भागवण्यासाठी खुद्द ख्रिस्त आपले शरीर व रक्त आम्हांस खादय व पेय म्हणून देत आहे.

जिवंत देवाची भाकर म्हणजे ख्रिस्ताचे शरीर व रक्त हे आपणांस सार्वकालिक जीवनासाठी आवश्यक आहे. शाररीक अन्न आपणांस जीवन देते फक्त मरणा पर्यंत परंतु जे अन्न ख्रिस्त देतोय ते अन्न आपल्याला अनंत काळाचे जीवन देत आहे, आपल्याला पुन्हा कधीही भूक लागणार नाही.

     आजच्या तिन्ही वाचनात आपण भाकरी विषयी ऐकले आहे आणि जी भाकर ख्रिस्त आपणास देतोय ती वेगळी भाकर आहे ती म्हणजे स्वतःचे शरीर व स्वतःचे रक्त.

आजच्या शुभवार्तमानात आपण भाकरीचा चमत्कार ह्या विषयी ऐकले आहे ई ख्रिस्त लोकांसोबत खात, पित आहे, त्यांच्यासोबत वावरत आहे. ख्रिस्ताला लोकांची काळजी होती आणि त्यांच्या गरजा त्याला ठाऊक होत्या. ते भुकेले होते आणि तो त्यांस अन्न देतो, तो त्याच्या उदारपणात महानता आहे. तो फक्त त्यांची भूक भागवत नाही तर तो त्यांस महान धडा शिकवितो. तो त्यांस शिकवितो तो त्यांस आमंत्रित करतो आणि तो त्यास बरे करतो. त्यांच प्रमाणे तो आज आपणा सर्वांना देखिल आमंत्रण करत आहे. जेंव्हा आपण मिस्साबली साजरी करतो, तो आपणांस बोलावतो. आपले स्वागत करतो, आपल्याशी बोलतो. त्यांच्या स्वतःच्या शरीराद्वारे व रक्ताद्वारे आणि अश्या प्रकारे आपल्याला तृप्त करतो आणि आरोग्य, सुख, शांती व प्रेम देतो.

मिस्साबलीदान हे देवाकडून मिळालेले एक महान भेट आहे. आज आपण हा सण साजरा करीत असताना आपण आठवण ठेवीली पाहिजे की आपण ख्रिस्ताचे शरीर आहोत. ( १ करिंथ १२: २७) 

संत अगस्तीन म्हणतात “जे स्वीकारता त्याच्या सारखे व्हा”जर आपण मिस्सा बलिदान एकमेकांसोबात साजरे करतो आणि ख्रिस्ताचे शरीर आणि रक्त सेवन करतो मग आपण सगळे ख्रिस्ताचा श्वास म्हणून ओळखले गेले पाहिजे. ख्रिस्त जो जिवंत देव आहे तो आपल्यात असला पाहिजे

    आज जर आपण पाहिले तर लोकांचा त्या जिवंत भाकरीवरील विश्वास कमी झालेला आहे, आणि ख्रिस्तशरीराला पुरेसा सन्मान मिळल नाही. असे म्हटले जाते ज्याने त्याला अनुभवले त्याने सर्वस्व जिंकले. आज हा सण साजरा करीत असताना आपण प्रत्येकाने ख्रिस्ताच्या शरीराचा व रक्ताचा अनुभव घ्यावा व जगाला प्रेम अर्पावे म्हणून आपण प्रार्थना करूया. 

   

विश्वासू लोकांच्या प्रार्थना

आपला प्रतिसाद : परमेश्वरा तुझ्या रक्ताने आम्हाला शुद्ध कर

१) आमचे परमगुरु, महागुरू, धर्मगुरू, धर्मभगिनी व व्रतस्त या सर्वांना तुझ्या पवित्र शरीराने व रक्ताने व्यापून टाक जेणे करून तू दिलेले कार्य त्यांच्या कडून सरळीत घडून येईल.

२) प्रत्येक ख्रिस्ती व्यक्तीने एकमेकांच्या सुख-दु:खात सहभागी होऊन एकमेकांस सहाय्य करावे व प्रभू ख्रिस्ताच्या प्रेमाचा, दयेचा आणि क्षमेचा संदेश आपल्या आचरणात आणावा म्हणून प्रार्थना करूया.

३) आपल्या परिश मधील जे लोक आजारी आहेत, अश्या सर्व लोकांस परमेश्वराच्या शरीराचा व रक्ताचा गुणकारी स्पर्श व्हावा व त्यांना चांगले आरोग्य मिळावे म्हणून आपण प्रार्थना करूया.

४) आज आपण हा सन साजरा करीत असताना अश्या लोकासाठी विशेष प्रार्थना करूया, की ज्यांचा पर्मेश्वरावरून विश्वास कमी झाला आहे. परमेश्वराने त्यांना विश्वासाच्या दानाने भरून काढावे म्हणून आपण प्रार्थना करूया.

 ५) आपण आपल्या वैयक्तिक, कौटुंबिक आणि सामाजिक हेतूंसाठी थोडावेळ शांत राहून प्रार्थना करूया.