Reflection for the Homily of 14^th SUNDAY IN ORDINARY TIME (07-07-19) By Br. Jameson Munis

सामन्य काळातील चौदावा रविवार

दिनांक – ७/७/२०१९

पहिले वाचन – यशया ६६:१०-१४

दुसरे वाचन - गळतीकारस पत्र ६:१४-१८

शुभवर्तमान – लुक १०:१-१२, १७-२०

प्रस्तावना:

          ख्रिस्ताठायी जमलेल्या माझ्या प्रिय भाविकांनो, आज आपण सामान्य काळातील चौदावा रविवार साजरा करीत आहोत.  आजची उपासना आपल्याला देवाचे मिशन कार्यया विषयावर मनन चिंतन करण्यास बोलावत आहे.

पहिल्या वाचनात यशया संदेष्टा  लोकांना येरुस्लेम बरोबर आनंद उत्सव व उल्हास करण्यासाठी प्रोत्साहन देत आहे; कारण परमेश्वराचा वरदहस्त नेहमी त्यांच्या सेवकावर आहे  असा संदेश आजचे पहिले वाचन देत आहे.

दुसऱ्या वाचनात म्हणजे गलतीकरांस  लिहिलेल्या पत्रास संत पौल, त्याची देवावरची इच्छा व्यक्त करतो. तसेच, जे कोणी ख्रिस्तामध्ये असलेली नवी उत्पत्ती यावर विश्वास ठेवतात, अशांनाच  शांती व द्या प्राप्त होते असे म्हणतो.

तसेच आजच्या शुभवर्तमानात संत लुक येशू ख्रिस्ताच्या बहात्तर शिष्याची कामगिरी व त्यांचे पुनरागमन व त्यांनी केलेले मिशन व सुवार्ता कार्य या विषयी सांगत आहे. प्रिय बंधू आणि भगिनीनो येशू ख्रिस्ताने व त्यांच्या शिष्यांनी देवाचे मिशन कार्य करून शांतीचा व सेवेचा संदेश पसरून लोकांच्या विश्वासात वाढ केली. म्हणून मिस्साबालीदानाद्वारे आपण सुद्धा देवाच्या कार्याचे अनुयायी बनू, यासाठी लागणारी कृपा व सामर्थ ह्या पवित्र  मिस्साबालीदानाद्वारे मागुया.

सम्यक विवरण:

पहिले वाचन – यशया ६६:१०-१४

          पहिल्या वाचनात यशया संदेष्टा लोकांना येरुस्लेम बरोबर आनंद उत्सव व उल्हास करण्यासाठी प्रोत्साहन देत आहे. कारण, परमेश्वर म्हणतो, पाहा नदीप्रमाणे शांती व पाण्याच्या पुरा प्रमाणे राष्ट्राचे वैभव मी तिजकडे वाहवितो. तसेच जशी एखादयाची आई त्याचे सांत्वन करिते तसे मी तुमचे सांत्वन करीन. म्हणजे यशयाने केलेली भविष्यवाणी हि ख्रिस्ताद्वारे पूर्ण झाली आहे. ती वाणी म्हणजे, जी  देऊळमाता  ख्रिस्ताने स्थापन केली आहे, ती  आता पृथ्वीवर नवीन येरुसलेम झाले आहे. आता सर्व ख्रिस्ती लोक ह्या नवीन येरुसालेमचा आनंद व उल्हास करू शकतात. ते  स्वर्गीय येरुसलेम सर्वांची वाट पाहात आहे. परमेश्वराचा हात व आशीर्वाद नेहमी त्याच्या सेवकांवर राहील असा संदेश आजचे पहिले वाचन देत आहे.

दुसरे वाचन: गलतीकरांस पत्र:  ६:१४-१८

          आजच्या दुसऱ्या वाचनात म्हणजे गलतीकरांस लिहिलेल्या पत्रात संत पौल, त्याची देवावरील इच्छा व्यक्त करतो, ती म्हणजे, प्रभू येशू ख्रिस्ताच्या वधस्तंभाचा पौलाला मोठा अभिमान वाटत आहे. कारण ख्रिस्ताने वधस्तंभावरील प्रायश्चीताचे कार्य परिपूर्ण केले. जगाला पौल वधस्तंभावर खिळलेला वाटत होता व पौलाला जग वधस्तंभावर खिळलेले वाटत होते. अशाप्रकारे त्याचा व जगाचा संबंध तुटला होता. पौलाला ख्रिस्तामधील नवी उत्पत्ती असणे हेच गरजेचे होते. अशांनाच शांती व द्या प्राप्त होते असे सांगत आहे.

शुभवर्तमान: लुक: १०:१-१२,१७-२०

          आजचे शुभवर्तमान आपल्याला बहात्तर शिष्यांची कामगिरी व त्यांचे पुनरागमन या विषयी सांगत आहे. तसेच आजच्या शुभवर्तमानामध्ये येशू ख्रिस्त बारा शिष्या व्यतिरिक्त आणखी बहात्तर शिष्यांची निवड करतो व त्यांना मिशन कार्यासाठी व सुवार्ता घोषित करण्यासाठी, प्यलेस्टाईन देशाच्या इतर भागांकडे पाठवीतो. जेणेकरून ते येशुख्रिस्ताच्या येण्याची तयारी करतील.

तसेच पिक फार आहे, परंतु कामगार किवा कामकरी फार थोडे आहेत, त्यामुळे आपल्याला प्रार्थना करण्याची फार गरज आहे. जेणेकरून आपल्याला कामकरी  भेटतील व देवाचे राज्य पुढे नेता येईल. येशू ख्रिस्ताने शिष्यांना सांगितले होते कि त्यांनी लोकांच्या घरी जाऊन त्यांना देवाची शांती व आशिर्वाद प्रदान करावा. परंतु ते रहिवासी योग्य नसतील तर तो आशिर्वाद पुन्हा तुमच्याकडे परत येईल. जे कुटुंब तुमचा स्वीकार करतील त्यांच्या घरी तुमचे कार्य पूर्ण करा. येशूचे शिष्य मोठ्या आनंदाने परत आले. त्यांचा संदेश एकूण अनेकांनी पश्चाताप केला. अनेक जन भुतांच्या सत्तेतून मुक्त झाले होते. म्हणून देवाच्या सेवेतील यशाचे श्रेय पूर्णपणे  देवाला द्यावे असे संत लुक आजच्या शुभवर्तमानाद्वारे सांगत आहे.

मनन चिंतन:

          आजच्या काळात जगाच्या भलेपनासाठी व कल्याणासाठी जर कुठल्या गोष्टीची गरज असेल तर ती गरज देवाच्या मिशन कार्याची आहे. देवाचा संदेश म्हणजे आनंदाची बातमी. देवाचा संदेश म्हणजे आशेची बातमी, सुखदायी बातमी तसेच मनाला प्रफुल्लीत करणारी बातमी, मात्र दुदैवाची गोष्ट अशी कि आपल्याला आनंदायी वार्ता ऐकन्यामध्ये, पाहन्यामध्ये व पसरविण्यामध्ये फारसा काही रस नाही. कारण आपल्याला हवी असते वार्ता दु:खाची, अपघाताची, दुर्घटनेची, शिव्यागाळीची, व लढाईची. परंतु आजच्या उपासने मध्ये आपण सर्वांनी सेवा कार्याचे मिशन ह्या विषयी ऐकले. जेव्हा येशू ख्रिस्ताचे शिष्य, सोपविलेले मिशनकार्य पूर्ण करून आल्यावर ते सर्वजण फार आनंदित होते. त्यांनी स्व:ताला मोठे न करता ख्रिस्ताची सुवार्ता पसरवून ख्रिस्ताला उंचावले  केले. जगाला ख्रिस्त देणे हाच त्याचा ध्येय  होता, हे त्यांनी त्यांच्या कृत्याद्वारे सिद्ध केले. त्यांनी येशू ख्रिस्ताच्या नावाद्वारे लोकांना बरे केले, त्यांच्यातून भूते देखील बाहेर काढली, त्यांना प्रार्थना शिकविली, त्यांना शांतीचे जीवन जगण्यास मार्गदर्शन केले व त्यांच्या श्रद्धेत वाढ केली. म्हणून आजची उपासना आपल्याला पुढील तीन मुद्यावर मनन चिंतन करण्यासाठी बोलावत आहे. ते मुद्दे म्हणजे

(१) सेवामय जीवन

(२) चमत्कारी नाव

(३) शांतीचा संदेश

हे तिन्ही मुद्दे चांगले आहेत ते आपल्या सर्वांच्या जीवनात आनंद आणत असतात.

1)       सेवामय जीवन

ज्या प्रमाणे येशू ख्रिस्त सेवा करून घ्यावयास नाही, तर सेवा करावयास ह्या भूतलावर आला, त्याचप्रमाणे येशूख्रिस्ताने त्याच्या शिष्यांना सुवार्ता व सेवामय जीवन जगण्यास पाठविले. त्यांनी येशूच्या आदेशानुसार लोकांना देवाची वाणी सांगितली. लोकांना बरे केले, त्यांनी लोकांच्या घरात राहून त्यांच्या समस्या सोडविल्या त्यांना प्रार्थना करायला शिकविले. त्यांनी येशूची प्रीती दुसऱ्यापर्यंत पोहचविली. हे कार्य करीत असताना ते सर्वजण आनंदित होते.

२) चमत्कारी नाव

येशू ख्रिस्ताच्या नावामध्ये शक्ती व सामर्थ्य आहे. येशूचे नाव चमत्कारी नाव आहे. जेव्हा येशू ख्रिस्ताचे बहात्तर शिष्य, त्यांच्या मिशन कार्यावरून परत आले, तेव्हा ते फार आनंदित आणि उत्साहित होते. ते येशू ख्रिस्ताला सांगत होते कि प्रभू तुमच्या नावामध्ये फार पावित्रता आहे. तुमच्या नावाने आम्ही लोकांना त्यांच्या आजारातून बरे केले व लोकांच्या जीवनात चमत्कार केले.

३) शांतीचा संदेश

शांतीच्या मार्गावर चालणे म्हणजे लोकांना जवळ आणणे व त्याच्याबरोबर आदराने वागणे. आपल्या प्रत्येकाच्या हृदयात एक भावना असते व त्या भावनेला एक तहान लागलेली असते, ती म्हणजे शांतीची. आपल्याला वाटते कि, आपल्या प्रत्येकाच्या जीवनात, कुंटुंबात, गावात व देशात शांतता असावी. म्हणून येशुख्रिस्ताने त्याच्या शिष्यांना शांतीचा संदेश व सुवार्ता पसरविण्यासाठी वेगवेगळ्या गावात व शहरात पाठविले. ज्या प्रमाणे येशू ख्रिस्ताने त्याच्या शिष्यांना शांतीचा संदेश देण्यासाठी पाठवले त्याच प्रमाणे ख्रिस्ताने संपूर्ण देऊळ मातेची निवड केली आहे, जेणे करून आपण सर्वजण शांतीचा व प्रेमाचा संदेश दुसऱ्याकडे पोहचवण्याचे साधन बनू. येशू ख्रिस्ताने व त्याच्या शिष्याने सत्याचा, आशेचा, शांतीचा, तारणाचा व पुनरुस्थानाचा संदेश पसरविला. म्हणून आपण सर्वांनी देखील आजपासून सुखदायी, आनंदमय, आशादायी शुभवार्ता घोषविण्याचा निर्धार केला पाहिजे.

विश्वासू लोकांच्या प्रार्थना:  

प्रतिसाद: हे प्रभो आम्हाला सेवामय जीवन जगण्यास सहाय्य कर.

१. आपले पोप, कार्डीनल्स, बिशप्स, फादर्स, सिस्टर्स ह्यांना अखिल ख्रिस्त सभेची धुरा सांभाळण्यास व प्रभूच्या प्रेमाचा व सेवेचा संदेश जगभर पसरविण्यास सामर्थ मिळावे म्हणून आपण प्रार्थना करूया. 

२. सर्व आजारी गरीब,अनाथ व अपंग ह्यांना मानसिक स्वास्थ व आरोग्य प्राप्त व्हावे म्हणून आपण प्रार्थना करूया.

३. ख्रिस्त आपल्या प्रत्येक कुटुंबाचा केंद्रबिंदू बनावा, कौटूंबिक प्रार्थनेद्वारे आपले नाते ख्रिस्ताशी अधिक जवळचे व्हावे म्हणून आपण प्रार्थना करूया.

४. ह्या वर्षी अधिका अधिक पाऊस पडावा, व आपल्या शेतांची, पिकांची, मासळीची चांगली वाढ व्हावी. तसेच वातावरण शुद्ध राहावे म्हणून आपण प्रार्थना करूया.

५. आपण आता, आपल्या सामाजिक, कौटूंबिक व व्ययक्तिक हेतूसाठी प्रार्थना करूया.