Reflections for the homily of First Sunday of Advent 

(27-11-2022) by: Br Reon Andrades

आगमन काळातील पहिला रविवार

“तुम्हीदेखील तैयारीत रहा, कारण तुम्हाला कल्पना नाही अश्या वेळी मानवपुत्र येईल!” (मतय २४:४४)

 

दिनांक: २७/११/२०२२

पहिले वाचन: यशया २:१-५

दुसरे वाचन: रोमकरांस पत्र १३: ११-१४

शुभवर्तमान:  मतय  २४: ३७-४४

प्रस्तावना:

आज आपण आगमन काळात प्रवेश करीत आहोत. आगमन काळ हा तैयारीचा काळ व जागृत राहण्याचा काळ आहे. आजच्या पहिल्या वाचनात यशया संदेष्टा म्हणतो कि, ख्रिस्त हा जगाचा प्रकश आहे व आपण त्यच्या प्रकाश्यामध्ये वाटचाल करायला हवी. जगाच प्रकाश ख्रिस्त आपणामध्ये येण्यास आतुर आहे. आपल्याला अंधारात राहण्याची इतकी सवाई झाली आहे कि, आपल्याला प्रकाश्याकडे वाटचाल करायला संकोच होत असतो. म्हणून संत पौल आजच्या दुसऱ्या वाचनात आपल्याला अंधारातली कार्ये सोडण्यास व ख्रिस्ताच्या प्रकाश्याला परिधान करण्यास सांगत आहे. आजच्या शुभवर्तमानात प्रभू येशू ख्रिस्त आपणास जागृत व तैयारीत राहण्याचे आव्हान करीत आहे. आगमन काळ आपल्याला ख्रिस्ताचा योग्य रीतीने स्वीकार करावयास व पूर्ण तैयारीत राहण्यास आपल्याला आठवण करून देत आहे.

मनन चिंतन:

डिसेंबरचा महिना आला कि आपण सर्व जण व्यस्त होतो. नाताळाची तैयारी आपण मोठ्या उत्साहाने करत असतो. सगळीकडे आपल्याला सजावटीच्या गोष्टींची दुकाने आपल्या नजरेस पडतात. इतकेच नाही तर अनेक ऑफर व सेल ह्यांची याची आपण आतुरतेने वाट पाहत असतो. हे सर्व करताना आपण कुठेतरी दुर्लक्ष करतो ह्याची जाणीव फार कमी लोकांना होत असते. आपण आपल्या आध्यात्मिक जीवनाला गाढ झोप देत असतो, अशा स्थितीत आपण असल्याकारणाने आपण रात्रीस योग्य अशी कार्ये यांचे आपण तंतोतंतपणे आचरण करत असतो. ह्या स्थितीत आपणास रात्र फार आवडते व अंधारात आपण स्वतःला सुरक्षित असे समजत असतो.

आजच्या दुसऱ्या वाचनात संत पौल म्हणतो कि, रात्र सरली आहे, झोपेतून उठण्याची वेळ आली आहे (रोम १३:११). रात्रीस अनुकूल अशी कामे ज्यांची तुम्ही स्वतःला सवय करून घेतली आहे त्याचा त्याग करा. ज्या वाईट सवयी तुम्ही अंगीकारल्या आहेत त्या सोडून द्या किंबहुना त्यांचा त्याग करा / त्यांचे विसर्जन करा. दिवसा साजेल असे जीवन जगा (रोम १३:१३). आपण रात्रीची मुले नव्हे तर प्रकाशाची मुले बनण्याचा प्रयत्न करूया, कारण यशया संदेष्टा अध्याय दोन वचन पाच मध्ये म्हणतो कि, परमेश्वराच्या प्रकाशात चला. परमेश्वर आपला प्रकाश आहे. आज देऊळमाता आपल्याला आठवण करून देत आहे की जगाचा प्रकाश आपल्यामध्ये आला आहे व त्याच्या प्रकाशाला आपणामध्ये आत्मसात करणे अत्यंत गरजेचे आहे.

आजच्या शुभवर्तामानात आपणास दक्ष राहण्याचे आव्हान केले जात आहे (मत्यय २४:४२). आपण आपल्या जीवनात अनेक गोष्टींची दक्षता घेत असतो. आपण दक्ष राहातो आपल्या आरोग्याबाबत, आपल्या गुंतवणुकीविषयी, आपल्या मौल्यवान वस्तूविषयी, आपल्या मालमत्तेविषयी व अनेक अशा गोष्टीविषयी आपण दक्षता बाळगत असतो. परंतु इतकी दक्षता घेऊनसुद्धा आपण संतुष्ट नसतो, आपणामध्ये कुठे ना कुठे तरी ह्या गोष्टी चोरण्याची, हिरावून घेण्याची भीती असते. आगमन काळाच्या ह्या पहिल्या रविवारी, देऊळमाता आपणास दक्ष राहण्याची आठवण करून देत आहे. आता आपल्याला प्रश्न पडतो कि कसली दक्षता आपण घेतली पाहिजे? जागतिक गोष्टीविषयी आपण दक्षता घेतो परंतु आपण आपल्या आध्यात्मिक जीवनाची दक्षता घेत नाही, कारण हा जीवनाचा भाग सहजपणे आपल्या नजरेस येत नाही. परंतु हा एक जीवनाचा अविभाज्य असा भाग आहे. आपल्या उद्धारासाठी, तारणासाठी व ख्रिस्त सलग जीवन जगण्यासाठी हे गरजेचे आहे. आपण आपल्या शरीराच्या गरजा पुरवण्यासाठी गुंतलेले असतो, कारण ही वेळ लक्ष विचलित करण्याची आहे. ही उपभोगवादी जीवनशैली अगदी सहजपणे आपले लक्ष त्याच्या कडे वेधून घेत असते. म्हणून संत पौल आपणास सांगत आहे की, तुमच्या शरीराच्या वासना पुरवण्यास लक्ष देऊ नका (रोम १३:१४) नाहीतर तुम्ही भरकटले जाणार् तर दक्ष राहा, तैयारीत रहा.

आजच्या शुभवर्तमानात आपणास दक्ष राहण्यास सांगितले़ आहे. आपण दक्षता कसली घेतली पाहिजे? आपण कसली तैयारी केली पाहिजे? अनेक वेळेस आपणास सांगण्यात येते की ख्रिस्त येत आहे, तर दक्ष राहा तैयारीत रहा. परंतु जर आपण पाहिलं तर ख्रिस्त 2000 वर्षापूर्वी आला आहे व अजूनही तो आपणामध्ये आहे. तो आपणाबरोबर  सूरवाती पासून होता, आहे व सदैव असणार आहे. ही जाणीव अपणामध्ये अंकुरीत व्हावी व परमेश्वर माझ्या बरोबर आहे, तो माझा आधार आहे व त्याने माझे तारण केले आहे याची आठवण आपणास सतत व्हावी म्हणून आपण सदैव दक्ष असावे व तयारीत असावे. आपण आपली दुष्कर्मे, नकारात्मक सवयी या सर्वानविषयी दक्षता घ्यायला हवी. शेवटी आपण ख्रिस्ताला आपला शस्त्रसंभार बनवावे (रोम १३:१४ब) याचे आव्हान आज देऊळमाता आपणास करीत आहे. आगमन काळाच्या ह्या पहिल्या रविवारी आपणास सांगण्यात येते की तुम्ही तुमची दुष्कर्मे वाईट सवयीं सोडून द्या व परमेश्वराच्या प्रकाशात चला. जागृत राहा व भरकटले जाऊ नका कारण ख्रिस्त आपला तारणारा आम्हामध्ये आहे व तोच आपले बळ आणि आपली आशा आहे ह्याची जाणीव ठेवा. जागृत रहा तैयारीत रहा व ख्रिस्ताला आपले शस्त्रसंभार बनवा.

 

विश्वासू लोकांच्या प्रार्थना:

प्रतिसाद: ‘येशू तुझ्या स्वागतास आम्हाला तत्पर बनव.’

 

१.ख्रिस्तात जीवन जगण्यास मार्गदर्शन करणारे आपले पोप महाशय, बिशप्स, धर्मगुरू व धर्मभगिनी यांना सतत शारीरिक व मानसिक आरोग्याचा लाभ व्हावा व दैवी कार्य सतत चालू ठेवण्यास त्यांना कृपा व शक्‍ती मिळावी म्हणून आपण प्रभूकडे प्रार्थना करूया.

२.आपल्या देशात, समाजात अनेक लोक फूट पाडण्याचा प्रयत्न करत आहेत. समाजा ऐवजी स्वतःच्या स्वार्थास महत्व देत आहेत. त्यांना या स्वार्थी वृत्ती पासून दूर राहण्यास व समाज कल्याणाचा विचार करण्यास कृपा मिळावी म्हणून आपण प्रार्थना करूया.

३.आज अनेक लोक व्यसनाच्या आहारी गेलेले आहेत. त्यांना व्यसनमुक्त होण्यास परमेश्वराचे सहाय्य मिळावे म्हणून आपण प्रार्थना करूया.

४.सत्तेच्या लोभाने राजकारण्यांनी आपल्या राज्यात कल्लोळ घातला आहे व लोकांच्या अपेक्षांचा भंग केला आहे. अशा या परिस्थितीत लोकहिताच्या योजनेस प्राधान्य देण्यास त्यांना कृपा मिळावी म्हणून आपण प्रार्थना करूया.

५.जेव्हा आपण ख्रिस्ती जीवनाऐवजी ऐहिक जीवनात गुरफटून जातो. तेव्हा स्वतःला तारणापासून वंचित करतो. याची जाणीव आपणास व्हावी व ख्रिस्ती मूल्यांवर आपले जीवन पुनर्स्थापित करण्यास कृपा मिळावी म्हणून आपण प्रार्थना करूया.

६.थोडा वेळ शांत राहून आपल्या वैयक्तिक, सामाजिक, व कौटुंबिक गरजांसाठी प्रार्थना करूया.

Reflection for the Homily of 34^th SUNDAY IN ORDINARY TIME (20-11-2022) By Br. Jeoff Patil.

“मी तुला खरे सांगतो, आज तू माझ्या बरोबर स्वर्ग राज्यात असशील.”

ख्रिस्त राज्याचा सण – ३४ रविवार

दिनांक: २०/ ११/२०२२

पहिले वाचन: २ शमुवेल ५: १-३

दुसरे वाचन: संत पौलचे कलस्सैकरांस पत्र  १: १२-२०

शुभवर्तमान: लुक  २३: ३५-४३

प्रस्तावना:

ख्रिस्त दयेचा राजा

आज आपण ख्रिस्त राजाचा सण साजरा करत असून, सामान्य काळातील शेवटच्या आठवड्यात आपण पदार्पण करत आहोत. देऊळमाता आज आपल्याला आठवण करून देत आहे कि प्रभू येशू ख्रिस्त हा फक्त विश्वाचा राजा नसून, तो आपल्या हृदयाचा, आत्म्याच्या, शांतीचा, शरीराचा व आपल्या कुटुंबाचा राजा आहे. त्याचे हे राज्य हे अनंत काळचे राज्य आहे.

आजच्या पहिल्या वाचनात आपण पाहतो की ईस्राएलच्या लोकांनी दाविदाला आपला राजा म्हणून निवडले. आजच्या दुसऱ्या वाचनात संत पौल, ख्रिस्ताला विविध अशी उपमा देऊन ख्रिस्ताची श्रेष्ठता आपल्याला पटवून देत आहे. लुक लिखित शुभवर्तमानात येशू ख्रिस्त, एका विश्वासू चोराला स्वर्ग राज्याचे आश्वासन देत आहे

ख्रिस्त हा अखिल विश्वाचा व आपल्या प्रत्येकाचा राजा आहे. वधस्तंभावरील त्या चोराप्रमाणे आपल्याला सुद्धा तारणाचा मार्ग प्राप्त व्हावा, आपल्याही जीवनात बदल व्हावा. आपण सर्वजण एक धार्मिक व आध्यात्मिक कळप बनून, इतरांची सेवा करण्यासाठी व दुसऱ्यांना दया दाखवण्यासाठी आपल्याला देवाची कृपा मिळावी म्हणून विशेषतः या मिस्साबलीदानात आपण प्रार्थना करू या.

मनन चिंतन:

आज आपण ख्रिस्त राजाचा सण साजरा करत आहोत. जेव्हा आपण राजा हे शीर्षक ऐकतो तेव्हा आपल्या समोर कोणती प्रतिमा झळकते ?  आपल्या समोर विशेषतः मुकुट, सामर्थ्य, अधिकार, श्रीमंती तसेच अनेक शाही वेश परिधान केलेले सैनिक असे चित्र आपल्या समोर निर्माण होते असते. परंतु आज आपण ज्या राज्याचा सण साजरा करीत आहोत, तो याप्रकारचा राजा नव्हता. आपला राजा येशू ख्रिस्त दोन अपराध्या बरोबर क्रुसावर टांगून मरण पावला. आपला राजा हा करुणेचा राजा आहे. आपला राजा हा प्रेमाचा व शांतीचा आहे.

आजच्या पहिल्या वाचनात आपण पाहतो की दावीद इस्रायलाचा राजा होतो. दावीदाचे राज्य आपल्याला ख्रिस्ताच्या राज्याकडे निर्देशित करते आणि जगातील राज्य आणि दावीदाचे राज्य यांच्यातील फरक प्रकट करते. सौल राजा स्वतःचे हित साधतो तर दावीद राजा देवाचें इच्छेनुसार राज्य करतो. दाविदाला राजा म्हणून अभिषेक करण्यासाठी इस्रायलचे सर्व वंश आले होते. त्याचप्रकारे ख्रिस्त राजा हा सर्व लोकांचा राजा आहे. आपल्या सर्वांना ख्रिस्ताच्या राज्य राज्यात सहभागी होण्यासाठी आमंत्रित केले आहे.

संत पौलाने कलसीकरांस लिहिलेल्या दुसऱ्या पत्रात ख्रिस्ताच्या सर्व अधिकारांची चांगल्या प्रकारे वर्णन केलेले आपणास दिसून येते. ख्रिस्ता मध्ये देवाच्या दयाळूपणाचा व प्रेमाचा आपल्याला अनुभव येतो. आपण सर्व अंधारात पापांच्या राज्याला आधीन होत असतो पण ख्रिस्तामुळे आपण सर्व प्रकाश्याची मुले बनलो आहोत.

पोप फ्रांसिस फ्रान्सिस असे म्हणतात येशू ख्रिस्त हा सर्व सृष्टीचा केंद्रबिंदु आहे ख्रिस्ती या नात्याने आपले विचार, ख्रिस्ताच्या विचारा सारखे असले पाहिजेत, आपले कार्य ख्रिस्ताच्या कार्यसारखे असले पाहिजेत, आपले शब्द हे ख्रिस्ताच्या शब्दाप्रमाणे पाहिजेत.

आजच्या लुक लिखित शुभवर्तमानात आपल्यासमोर एक वेगळाच राजा प्रदर्शित केला आहे, तो आपल्या राजवाड्यात नाही, तर काल्वारीच्या डोंगरावर आहे तो सिंहासनावर बसला नाही तर क्रुसावर नीरबळ होऊन टांगला आहे. तो लोकांचा न्याय करत नाही, तर क्रुसाखाली जमलेली लोक त्याची थट्टा व निंदानालस्ती करत आहे. मग हा कसा आपला राजा? तर ख्रिस्त हां शांतीचा, प्रेमाचा, दयेचा राजा आहे. ख्रिस्ताचे राज्य बळाने पसरलेले नाही, तर ख्रिस्ताच्या प्रेमाच्या सामर्थ्यांने पसरलेले आहे.

येशूचे राज्य भूतलावरचे नाही तर त्याचे राज्य हे स्वर्गाचे आहे (योहान १८:३६). येशूचे राज्यपद हे सौम्यता, नम्रता, प्रेम व सेवा या मूल्याने भरलेले आहे. तो स्वतः जरी राजा असला तरी तो सेवक म्हणून जीवन जगला. प्रभू येशूने त्याच्या प्रजेवर खूप प्रेम केले व अजुनही करत हे. तो त्यांच्यावर मरेपर्यंत प्रेम करतो कारण त्याचा हेतू व स्वप्न हे आहे की आपण नेहमी त्याच्या बरोबर असावे. त्याचप्रमाणे एखादा मेंढपाळ आपल्या मेंढरांची काळजी घेतो किंवा एखादा पक्षी आपल्या पिल्लांना आपल्या पंखाखाली एकत्र गोळा करून ऊब देतो किंवा जशी एखादी आई आपल्या बाळाचे पालनपोषण करते यासर्वांपेक्षा अधिकतम रीतीने येशू ख्रिस्त त्याच्या प्रजा जनावर प्रेम करून त्यांना जवळ आणतो.

जर आपला राजा आपल्यावर इतके प्रेम करत असेल, तर आपण सुद्धा त्याला योग्य तो प्रतिसाद दिला पाहिजे कारण हे प्रेमाचे दळण-वळण एकेरी मार्गाने होत असेल तर त्याला काही अर्थ राहत नाही, उलट जी आई आपल्या मुलांवर प्रेम करते तीच आई वृद्धावस्थेत तेच प्रेम परत मिळवण्यासाठी वाट पाहत असते, तसा आपला प्रेमळ राजा आपल्या प्रेमाची आशेने वाट पाहत असतो. आपण त्याला सकारात्मक प्रतिसाद देतो का? हा प्रश्न आपण स्वतःला विचारायला हवा.  येशू ख्रिस्ताने कोणाचे शोषण केले नाही, तर लोकांची सेवा केली व त्यांना धीर दिला. इतकेच नाही तर मरते वेळीसुद्धा आपल्या मारेकरांना त्याने क्षमा केली व आपल्या उजव्या बाजूच्या चोराला स्वर्गाचे आश्वासन दिले, कारण त्याने येशूची करुणेने भरलेले राज्य ओळखले. त्याला कळून चुकले की येशू दयेचा व करूणेचा राजा आहे. आपण आज त्याच राजाचा सण साजरा करत असताना आपल्याला सुद्धा स्वर्ग राज्याचा अनुभव यावा व आपणास येशूच्या दयेचा व करुणेचा अनुभव यावा म्हणून आपण प्रार्थना करू या.

विश्वासू लोकांच्या प्रार्थना

प्रतिसाद: ’हे प्रभू तुझे राज्य आम्हांवर येवो.’

१.आपल्या ख्रिस्त सभेचा कारभार पाहणारे पोप फ्रान्सिस, सर्व बिशप्स, धर्मगुरू व व्रतस्थ ज्यांनी आपले सर्व आयुष्य प्रभू सेवेसाठी अर्पण केले आहे त्यांना देवाची कृपा-आशीर्वाद मिळावा व त्यांनी येशूची सुवार्ता सर्वत्र पसरवली म्हणून आपण प्रार्थना करूया.

२.आपले सर्व राजकीय पुढारी व नेते ह्यांनी येशू प्रमाणे जनहितासाठी झटावे व जनतेची अधिकाधिक सेवा करावी म्हणून आपण प्रार्थना करूया.

३.जे कोणी आजारी,  दुःखी व संकटांनी ग्रासलेले आहेत, आयुष्याला कंटाळलेले आहेत अशांना प्रभुचा दैवी स्पर्श व्हावा व ते लवकरात लवकर बरे व्हावेत म्हणून आपण प्रार्थना करूया.

४.आज ख्रिस्त राज्याचा सण साजरा करत असताना प्रभू येशूला आपल्या जीवनाचा राजा बनवून त्याचे राज्य आपल्या हृदयात यावे म्हणून आपण प्रार्थना करूया.

५. देशात परदेशात अनेक लोक अन्यायाला, हिंसेला, युद्धेला, अत्याचाराला, राजनीती व कुटनीती ह्यास बळी पडत आहेत, अश्या सर्व लोकांवर ख्रिस्ताचे न्यायचे व करुणेचे राज्य यावे म्हणून आपण प्रार्थना करूया.

६.थोडा वेळ शांत राहून आपल्या वैयक्तिक, सामाजिक व कौटुंबिक हेतूंसाठी प्रार्थना करूया.

  Reflection for the Homily of 33rd  SUNDAY IN ORDINARY TIME (13-11-2022) By Br. Roshan Nato.

“जो पुरुष परमेश्वराचे भय धरतो, जो त्याच्या मार्गाने चालतो तो धन्य तू आपल्या श्रमाचे फळ खाशील; तू सुखी होशील, तुझे कल्याण होईल.” (स्तोत्र २८:१-२)

सामान्य काळातील ३३ वा रविवार

दिनांक: १३/ ११/२०२२

पहिले वाचन: मलाखी ३: १९-२०

दुसरे वाचन: थेस्सलनीकाकरांस दुसरे पत्र ३: ७-१२ 

शुभवर्तमान: लुक २१: ५-१९

प्रस्तावना:

आज देऊळ माता सामान्य काळातील तेत्तीसावा रविवार साजरा करीत असताना, आजची उपासना आपळयाला देवाच्या नामावर भिस्त ठेऊन, विश्वासू राहण्यास बोलावत आहे. कारण नितीसुत्र १: ७ मध्ये सांगितल्या प्रमाणे, “देवाचे भय हे ज्ञानाचे उगम आहे”. त्याच प्रमाणे आजच्या दुसऱ्या वाचनात संत पौल आपल्याला येशू ख्रिस्ताच्या वचनाची आठवण करून देत आहे ती म्हणजे, ‘माझा पिता आज पर्यंत काम करीत आहे आणि मी ही काम करीत आहे’ (योहान ५:१७) ह्या वाचनाची आठवण करून देत अस्ताना आपणाला  बजावत आहे कि, स्वस्थपणे काम करून स्वतःचेच अन्न खा. तर आजच्या शभवर्तमानात खुद्द येशू ख्रिस्त आपल्याला जगातील मोहांपासून अलिप्त राहून, बहकून न जाता, देवाच्या तारणदायी वचनावर म्हणजेच, ‘तुमच्या एकही केसाला दगा लागू देणार नाही’ ह्या वचनावर विश्वास ठेवण्यास पाचारण करीत आहे. 

मनन चिंतन:

“जो पुरुष परमेश्वराचे भय धरतो, जो त्याच्या मार्गाने चालतो तो धन्य तू आपल्या श्रमाचे फळ खाशील; तू सुखी होशील, तुझे कल्याण होईल.” (स्तोत्र २८:१-२)

ख्रिस्तात माझ्या प्रिय भाविकांनो, आज देऊळमता सामान्य काळातील ३३ वा रविवार साजरा  करत आहे. आजची उपासना आपल्याला देवाच्या नामावर भिस्त ठेऊन, आपल्या एका केसाचाही नाश होणार नाही, ह्या आश्वासनावर विश्वास ठेवण्यास व त्याने केलेल्या आज्ञाचे विश्वासुपणे अनुकरण करण्यास पोचारण करत आहे. भाविकांनो प्रत्येक दिवस हा देवाने आपल्याला दिलेली एक देणगी आहे, म्हणून जीवनात कोणत्याही दिवसाला दोष देऊ नका. अस म्हणतात, : ‘उत्तम दिवस आठवणी देतात, चांगले दिवस आनंद देतात, वाईट दिवस अनुभव देतात तर अत्यंत वाईट दिवस आपल्याला शिकवण देतात’, म्हणून प्रत्येक दिवशीं देवाला धन्यवाद द्या त्याच्या नामाची स्मृति करा, त्याच्या नामाचा गौरव करा, कारण परमेश्वर जेव्हा आपल्या बरोबर असतो तेव्हा आपल्याला कशाचीही भीती वाटत नाही.

आजच्या पहिल्या वाचनात सेनाधीश परमेश्वर आपल्याला सांगतो कि ‘पाहा, भट्टीसारखा तप्त दिवस येत आहे, आणि या भट्टीत सर्व गर्विष्ठ, दुराचारी धसकट बनतील, परंतु जे माझ्या नामाचे भय धरतात, माझ्या आज्ञा पाळतात ते धन्य, कारण त्यांच्यावर न्यायत्त्वाचा सूर्य उदय पावेल, त्यांच्या पंखात आरोग्य असेल’. त्त्याचप्रमाणे आजच्या दुसऱ्या वाचनात संत पौल येशू ख्रिस्ताच्या नामाने आपल्याला आज्ञा बोध करून सांगता की कुणावार अवलंबून राहू नका, फुकट बसून खाऊ नका. श्रम करा, घाम गाळा आणि स्वस्तपणे काम करून स्वतःचे अन्न खा. कारण काम ही एकमेव गोष्ट आहे की, जी आपल्याला मनुष्य होण्याची जाणीव करून देते. कामामध्ये कुठल्याही प्रकारचा दर्जा नसतो. म्हणून हिंदीमध्ये अशी एक म्हण आहे की : “कोई भी धंधा छोटा नही, और धंधे से बडा कोई धर्म नही.” विश्वासुपणाने केलेल्या कामात तोटा मिळत नाही, तर परमेश्वराच्या कृपेने आपली भरभराट होते.

आजच्या शुभवर्तमानांमध्ये येशू ख्रिस्त आपल्याला सांगतात कीं या जगात काय चालले आहे त्याच्यावर तुम्ही लक्ष देऊ नका, तर माझ्या नामाने तुम्हाला कोणी बहकवू नये म्हणून काळजी घ्या. माझ्या नावा मुळे तुमचा छळ करतील तुम्हाला तुरुंगा टाकतील, परंतु भिऊ नका, कारण, मीच तुम्हाला या सर्व गोष्टींतून बाहेर पडण्यास समर्थ करीन. माझ्या नामा मुले सर्वजण तुमचा द्वेष करतील, काहीकांना ठार मारतील, परंतु भिऊ नका, धीर धरा, आणि विश्वास ठेवा, कारण तुमच्या डोक्याच्या एका केसालाही मी दगा लागू देणार् नाही.

भाविकांनो, आज येशू ख्रिस्त आपल्याला निडर होऊन त्याच्यावर विश्वास ठेवण्यास पाचारण करत आहे. जे पाचारण त्याने आपल्या प्रेषितांना केलं, जे पाचारण त्याने सर्व संतांना केल, तेच पाचारण आज येशू ख्रिस्त आपल्याला देत आहे. ज्याप्रमाणें प्रेषितांनी आणि संतांनी देवाच्या नामाचा प्रसार सर्व जगभर करण्यास आपल्या प्राणाची आहुती दिली, त्याचप्रमाणे आपल्यालासुद्धा येशू ख्रिस्त, घाबरून किंवा जगाच्या या मोहजाळ्यात बहकून न जाता परमेश्वराच्या नामावर विश्वास ठेवून त्याने दिलेल्या आज्ञा पाळून, एक विश्वासू आणि खंबीर जीवन जगण्यास सांगत आहे.

 ही गोष्ट आहे एका बाईची, जिणे आपल्या जीवनात किती तरी दुखांचा, कष्टांचा आणि छळांचा सामना केला. बालपण गरीबीत काढलं, शिक्षण गरीबी मुले अर्धवट राहिलं, वयाच्या दहाव्या वर्षी एका वयस्कर व्यक्तीबरोबर लग्न झालं. गरीबीने तर छळ केलाच होता, पण लग्न होऊन सासरचा छळ सुद्धा वाट्याला आला, परंतु तिने कधी आपल्या विधात्याला दोष दिला नाही तर उलट सर्व सहन करण्याची शक्ती मागितली. वयाच्या विसाव्या वर्षी बाळंत असताना पतीने लाथाबुक्क्यांनी मारून गोठ्यात जनावरांच्या पायाखाली बेशुद्धावस्थेत मरायला सोडलं. तेव्हा जनावरांकडून माणुसकीचा धडा शिकली.पतीने तर सोडलंच, पण आपल्या बाळाला आणि स्वतःला एक आसरा म्हणून माहेरी आली तेव्हा स्वतःच्या आईने सुद्धा तिला नाकारलं. तेव्हा ती आपल्या मुखातून शोक-उद्गार काढत म्हणाली “हे विधात्या  जीवन खूप कठिन आहे रे, आपल्या लोकांनी सोडलं, पण तुझ्या आश्रयाखाली मात्र सदैव ठेव.”

तिच्या जीवनात दुःख तर होतीच, पण आता तिला कष्टांनासुद्धा सामोरे जावे लागत होते. पोटाला भूख आहे, पण खिशात दमडी नाही म्हणून गैरसोयीमुळे भीक मागून स्वतःचं आणि आपल्या बाळाच पोट भरलं. इतकच नाही तर पोटभर जेवण मिळणार् या आशेवर रात्रभर भजनंसुद्धा गायली. परंतु या कष्टांना घाबरून न जाता आपल्या विधात्याच्या विश्वासात धृढ राहिली. आश्रयासाठी आणि जगातील दृष्टांपासून दूर राहण्यासाठी एका जागेवरून दुसऱ्या जागेवर जाण्यास बस वाहनाचे तिकीट मिळाले नाही, म्हणून बसमधून खाली उतरताच, बस पेटून राख होत बघता तिच्या मनात स्वतःला म्हणाली ‘देव तारी त्याला कोण मारी’. होय, माझ्या भाविकांनो म्हणून त्या बाईने आपले जीवन आपले नसून देवाने दिलेली एक देणगी आहे म्हणून ते जीवन गरीब व अनाथांसाठी अर्पण केलं आणि ती बाई दुसरी तिसरी कुणी नसून अनाथांची माय म्हणून संबोधलेली सिंधुताई सपकाळ होय. 

होय, माझ्या भावीकानो, सिंधुताईंनी आपल्या वाईट दिवसात कधीही आपल्या विधात्याला किवा परमेश्वराला दोष दिला नाही, तर ती तिच्या कठीण परिस्थितीत सुद्धा विश्वासू राहिली . तीने कोणाची चोरी किंवा लबाडी केली नाही, तर आपल्या विधात्याच्या आज्ञेत राहिली. आणि त्याच परमेश्वराने तीला बक्षीस म्हणून एक नवीन जीवनाची देणगी दिली. म्हणून भाविकांनो, आपण सुद्धा आपल्या जीवनात प्रेषिताप्रमाणे, संतांप्रमाणे आणि सिंधुताईप्रमाणे निडर होऊन, श्रद्धेने विश्वासाने देवाच्या अग्नेचे पालन करून त्याने दिलेल्या अनंत जीवनाच्या वचनांवर विश्वास ठेवण्यास त्याच परमेश्वराकडे व विधात्याकडे सामर्थ्य मागुया.

विश्वासू लोकांच्या प्रार्थना:

प्रतिसाद: “हे ख्रिस्ता तुझ्या लोकांची प्रार्थना ऐक”

१. ख्रिस्त सभेची अखंडितपणे सुवार्ता जगाला पोहोचविणारे पोप फ्रान्सिस, कार्डिनल्स,बिशप्स, धर्मगुरू व सर्व व्रतस्थ यांना सर्वांना ख्रिस्ताचे प्रेम, कृपा व दया मिळून ख्रिस्ताची सुवार्ता जगभर जोमाने पसरविता यावी  म्हणून आपण प्रार्थना करूया.

२. देशात अत्याचार, काळाबाजार, अन्याय व वैराचार ह्यासारख्या गोष्टी घडत आहेत, त्यामुळे देशाची उन्नती होत नाही. अशा वेळी आपल्या राजकीय नेत्यांनी होत असलेल्या वाईट गोष्टीवर आवाज उठवून, देशाला योग्य दिशा द्यावी व देशाची चांगल्यारितीने वाटचाल व्हावी म्हणून आपण प्रार्थना करूया.

३. रशिया उक्रेनमध्ये जे युद्ध चालू आहे त्यामुळे अनेक निष्पाप लोकांना या बळी पडाव लागत आहे, अनेकांना बेघर राहाव लागत आहे अश्या लोकांना परमेश्वराने दिलासा द्यावा त्यांचे सांत्वन करून त्यांना सहनशक्ती मिळावी म्हणून आपण प्रार्थना करूया.

४. आज युवक-युवती जीवनात योग्य साथीदार व नोकरीच्या शोधात आहेत, त्यांना योग्य साथीदार व नोकरी मिळून त्यांचे जीवन आनंदित व्हावे म्हणून आपण प्रार्थना करूया.

५. जे लोक अतिशय आजारी आहेत, ज्यांची सेवा करायला कोणीही नाही. अशा सर्व लोकांना ख्रिस्ताचा करुणामय स्पर्श व्हावा व त्यांची आजारातून मुक्तता व्हावी म्हणून आपण प्रार्थना करूया.

६. आता आपण थोडा वेळ शांत राहून आपल्या वैयक्तिक, कौटुंबिक व सामाजिक हेतूंसाठी प्रार्थना करूया.