Reflection for 21^st Sunday in Ordinary Time (22/08/2021) By        Bro. Brian Motheghar

सामान्यकाळातील एकविसावा रविवार

दिनांक: २२/०८/२०२१

पहिले वाचन: यहोशवा २४:१-२अ,१५-१८

दुसरे वाचन: इफिसकरांस पत्र ५:२१-३२

शुभवर्तमान: योहान ६:६०-६९

"प्रभुजी, आम्ही कोणाकडे जाणार? कारण सार्वकालिक जीवनाची वचनें आपणांजवळ आहेत"

प्रस्तावना:

आज आपण सामान्य काळातील एकविसावा रविवार साजरा करीत आहोत. आजची उपासना आपणाला जीवनात देवाची निवड करण्यासाठी आवाहान करीत आहे. आजच्या पहिल्या वाचनात यहोशवा इस्राएली लोकांना देव किंवा त्यांच्या पूर्वजांनी ज्या देव देवतांची किंवा ज्या जागेत आहेत ते म्हणजे आमोरीच्या लोकांचे देव ह्यांच्या मधिल देव निवडण्याची मोकळीकता देतो. तसेच आजच्या दुसऱ्या वाचनात संत पौल हा वैवाहिक जीवनाचा जीवनक्रम कसा असावा ह्याविषयी आपणास माहिती करून देत आहे. आजच्या शुभवर्तमानात सुद्धा प्रभू येशू ख्रिस्त आपल्या शिष्यांना त्याचा पाठलाग करण्यासाठी किंवा ज्याप्रमाणे दुसरे अन्य शिष्य ज्यांना प्रभू येशूची शिकवण पचली किंवा आवडली नाही, त्यांच्या प्रमाणे त्याला सोडून जाण्याची मोकळीकता देतो. परंतु आपल्याला पेत्राने केलेली कबुली ही वाचावयास मिळते.

पेत्राप्रमाणे आपल्याला सुद्धा समजले पाहिजे की, आपले दैनंदिन जीवन जगण्यासाठी सर्वकाळी जीवनाचे रहस्ये ख्रिस्ताठायी आहेत आणि आपल्या जीवनाचा जीवनक्रम सुरळीत चालावयाचा असेल तर ख्रिस्ताचीच निवड करणे योग्य आहे. आजच्या उपासनेत सहभागी होत असतांना ख्रिस्त आपल्या जीवनात सदैव असावा व नेहमी ख्रिस्ताचीच निवड आपल्या जीवनात आपण करावी म्हणून प्रार्थना करूया.

 

मनन चिंतन:

आपले दैनंदिन जीवन जगत असताना आपल्याला प्रत्येक पावला पावलावर निर्णय घेणे गरजेचे असते. परंतू ते निर्णय घेत असताना आपल्याला दोन जीवनातील किंवा दोन गोष्टींमधील एकाची निवड करावी लागते. त्याचप्रमाणे आजची उपासना सुद्धा आपणाला जीवनातील सर्वात मूलभूत पर्याय सादर करीत आहे; देव किंवा वाईट तत्व किंवा उपयुक्तता ह्यामध्ये निवड करण्यास सांगत आहे. कारण हेच आपल्या जीवनाचा मार्ग व त्या मार्गावर चालण्यास त्याचे अंतिम परिणाम निर्धारित करतात.

आजच्या पहिल्या वाचनात यहोशवा लोकांना एकदाच पण सर्वकाळसाठी देवाची निवड किंवा अन्य देव-देवतांची निवड करण्यास सांगत आहे. परंतु लोकांनी अन्य देव-देवतां ऐवजी प्रभू परमेश्वर जो जीवंतांचा देव आहे त्याची निवड केली. आपण जर जुन्या कराराची पाने पडताळली तर आपल्याला कळून चुकते की, ह्या लोकांची प्रभु परमेश्वरावर किती निष्ठा होती आणि ती निष्ठा किती डगमगणारी आणि क्षणभंगुर होती. आपल्याला हे ही माहित आहे कि ही लोकं परमेश्वरापासून किती वेळा दूर गेलेली होती. तसेच आपणाला हे ही ठाऊक आहे की परमेश्वर हा किती दयाळू व प्रेमाळू आहे, ज्याने आपल्या लोकांचा कधीही साथ सोडला नाही.

चार शुभवर्तमानापैकी योहान लिखित शुभवर्तमानात आपल्याला विशेषतः जीवनात जगातील प्रत्येक व्यक्तीच्या मनात किंवा अंत:करणात चाललेल्या निर्णयाचा संघर्ष ह्याविषयी सांगण्यात आले आहे. संघर्ष तो म्हणजे प्रकाश आणि अंधकार, चांगले आणि वाईट, आणि जर आध्यात्मिकरित्या पहायचे झाले तर प्रभू येशू ख्रिस्ताचे अनुयायी होण्याचे किंवा जीवनात होणारी तडजोड यापैकी एक निवडण्याचे संघर्ष. आणि हा संघर्ष सर्वात कठीण आहे.

आजच्या शुभवर्तमानाद्वारे आपल्याला समजते की, ख्रिस्ताने दिलेल्या जिवंत भाकरी व रक्ताच्या शिकवणीने काही शिष्यांना त्याची शिकवण पटली नाही. कारण कोण कोणाचे मांस खाणार आणि रक्त पिणार? या शिकवणुकीमुळे काही शिष्यांनी ख्रिस्ताचे अनुयायी होण्याचा मार्गच सोडून दिला व ह्या कारणाने ख्रिस्ताने त्यांना जबरदस्ती केली नाही, तर ते त्याला सोडण्यास मोकळे होते. येशूची सेवक होणे हा निर्णयक क्षण कधी कधी आपल्याला जीवनात वेदनादायक क्षण सुद्धा होऊ शकतो. तरीही येशू त्याच्या शिकवणुकीवर किंवा त्याच्या निर्णयावर कधीही तडजोड करीत नाही, उलट त्याने घेतलेल्या निर्णयावर तो ठाम असतो. म्हणूनच म्हणतात कि, बोले तैसा चाले, त्याची वंदावी पावले! अनेक अशा शिष्यांनी सोडून गेल्यानंतर येशू त्याच्या निवडलेल्या बारा जणांकडे वळतो व त्यांनासुद्धा निवड करण्याची मोकळीकता देतो. हे पाहण्यासाठी कि, ते त्यांच्या निर्णयावर कोठे उभे आहेत?, किंवा कोणता निर्णय घेतील? प्रभू त्यांना सुद्धा विचारतो की “तुमचीही निघून जाण्याची इच्छा आहे काय?”(योहान ६:६७) शिष्यांच्या अंत:करणात सुद्धा हा गोंधळ चाललेला असणार की, त्याचे अनुकरण करायचे की त्याला सोडून जायचे? परंतु पेत्राने दिलेले उत्तर हे येशूसाठी फार मोलाचे होते. “प्रभुजी आम्ही कोणाकडे जाणार, सर्वकालिक जीवनाची वचने आपणाजवळ आहेत” (योहान ६: ६८). ‘प्रभुजी तुम्हीच आमच्यासाठी एक नवीन दृष्टी उघडली आहे. ज्यामुळे आमच्या जीवनाला अर्थ आणि दिशा मिळाली आहे’.

पेत्राने निष्ठेने केलेली भव्य कबुली ही शतकानुशतके प्रतिध्वनी आहे आणि तीच भव्य कबुली आपल्यासाठी एक प्रेरणा आणि एक आव्हान सुद्धा आहे. या कोरोनाच्या काळात आपण अनेक अशा नाना प्रकारच्या अडचणींचा किंवा संकटांचा सामना केला आहे. उदाहरणार्थ गंभीर आजार, आर्थिक संकट किंवा आपल्या आप्त गणांचे निधन, इत्यादी. ह्याच अडचणी, समस्या काही लोकांसाठी एका भव्य धोंड्या सारख्या होत्या, ज्या त्यांच्या जीवनातील आनंद, आशा, प्रयत्नांना आणि देवावरील प्रेमळ विश्वासाला चिरडून टाकतात; तर काही जणांनी ह्याच समस्यांच्या दगडांची पायरी करून जीवनात वृद्धी केली आहे; तर काहींनी जीवनाची नवीन वाटचाल सुरू केले आहे. अशा दोहोंमधील निवड एखाद्याला वाटतील तितक्या दुर्मिळ असतात आणि कधी त्याच आपल्यालासुद्धा तशाच दुर्मिल वाटत असतात.

अशाच एका तामीळनाडूतील तुर्तीकोडी धर्म प्रांतातील फादर अन्थोनी नावाच्या धर्मगुरूची गोष्ट आहे. त्यांच्या गुरुदीक्षाविधीच्या दहाव्या वर्षी त्यांच्या डोळ्याचा प्रकाश त्यांच्यापासून दुरावला होता. आणि हा त्यांच्या जीवनातील एक गंभीर असा धक्का होता. हेच त्यांना त्यांच्या जीवनात त्यांना निष्क्रिय बनवण्यास कारण बनले असते. परंतु प्रार्थना आणि चिंतनाने त्यांनी हे दुःखदायक अपंगत्व धैर्याने स्वीकारले. आणि त्यांच्या जीवनात त्यांच्यासारख्या वंचित लोकांसाठी त्यांनी आपले हृदय आणि आत्मा समर्पित केला. आणि १९८२ मध्ये (All India Federation of Blind) सर भारतीय अंध लोकांसाठी संघाची स्थापना केली.

आपण स्वतःला प्रश्न विचारू या की, या सगळ्यात आपण कुठे उभे आहोत? आपले सर्वकाही येशुच्या सहवासात आहे का? आपल्या जीवनातील सर्व ताणतणाव, संकटे, निराशा या सर्वांचे सकारात्मक परिवर्तन करण्यासाठी आपल्याला शिष्यांप्रमाणे किंवा प्रेषितांप्रमाणे येशू ख्रिस्ताशी खोळ, वैयक्तिक संलग्नता असणे गरजेचे आहे. तेव्हाच आपण पेत्राप्रमाणे म्हणू शकतो, “सर्वकालीक जीवनाची वचने आपणाजवळ आहेत”, आणि हीच वचने आमच्या अंतःकरणातील तीव्र इच्छा पूर्ण करू शकतात आणि चिरस्थायी शक्ती आणि आनंद देऊ शकतात.

विश्वासू लोकांच्या प्रार्थना:

प्रतिसाद: हे प्रभू आमची प्रार्थना ऐक.

१.     आपले परमगुरुस्वामी पोप फ्रान्सिस, सर्व कार्डीनल्स, बिशप, धर्मगुरू, धर्मभगिनी आणि प्रापंचिक ह्यांनी ख्रिस्ताची सुवार्ता सर्व जगात पसरावी व ती आपल्या आचरणात आणावी, म्हणून आपण प्रभूकडे प्रार्थना करूया. 

२.     प्रत्येक व्यक्तीने एकमेकांच्या सुख-दुःखात सहभागी होऊन एकमेकांस सहाय्य करावे व प्रभू ख्रिस्ताचा प्रेमाचा, दयेचा आणि क्षमेचा संदेश आपल्या आचरणात आणावा, म्हणून आपण प्रभूकडे प्रार्थना करूया. 

३.     आपल्या अवती-भौती असलेल्या आजारी माणसांना चांगले आरोग्य मिळावे, बेरोजगारांना रोजगार मिळावा आणि दुःख-संकटात सापडलेल्यांना प्रभूचे धैर्य लाभावे, म्हणून आपण प्रभूकडे प्रार्थना करूया.   

४.     ख्रिस्ती श्रद्धेमुळे ज्या लोकांवर अन्याय होत आहेत, अशा लोकांना ख्रिस्ती श्रद्धेशी एकनिष्ठ राहण्यासाठी प्रभू परमेश्वराचे सामर्थ्य व धैर्य लाभावे, म्हणून आपण प्रभूकडे प्रार्थना करूया. 

५.     थोडावेळ शांत राहून आपण आपल्या वैयक्तिक, कौटुंबिक आणि सामाजिक हेतूंसाठी प्रार्थना करू या. 

 

Reflection for The Assumption of the Blessed Virgin Mary (15/08/2021) By Bro. Suhas Farrel

पवित्र मरीयेच्या स्वर्गनयनाचा सोहळा

दिनांक: - १५/०८/२०२१

पहिले वाचन: - प्रकटीकरण ११: १९अ- १२: १- ६अ, १०अ ब

दुसरे वाचन: - १ करिंथ १५: २०-२७अ

शुभवर्तमान: - लुक १:३९-५६

“स्त्रियांमध्ये तूं धन्य व तुझ्या पोटचे फळ धन्य!”

प्रस्तावना

        योहानाच्या शुभवर्तमानात अध्याय १७:२१ मध्ये आपण वाचतो कि, प्रभू येशूने आपल्या मरणापूर्वी स्वर्गीय पित्याकडे आपल्या शिष्यांसाठी कळकळीची प्रार्थना केली कि, “हे पित्या, जसे आपण दोघे एक आहोत, तसेच माझ्या शिष्यांना, माझ्या अनुयायांना देखील तू सदैव एकत्र ठेव”.

        आज ख्रिस्तसभा पवित्र मरीयेच्या स्वर्गनयनाचा सोहळा साजरा करीत आहे. आजच्या दिवशी पवित्र मरीयेला सदेह स्वर्गात घेतलं गेलं. आणि त्याद्वारे ती स्वर्ग आणि पृथ्वीची राणी झाली. हीच पवित्र मरिया देवाने आपणाला आपल्या सर्वांची आई म्हणून दिली आहे. पवित्र मरिया संपूर्ण जीवनभर प्रभूच्या शब्दाशी एकनिष्ठ राहिली. हीच पवित्र मरिया आपल्या सर्वांसाठी एक उत्तम आदर्श आहे. सार्वकालिक जीवनासाठी ती एक आशा आहे. करण आपण जर मरीये प्रमाणे आपले जीवन जगलो तर आपणालाही एके दिवशी सार्वकालिक जीवन प्राप्त होईल.

        आज आपण दोन मातांचा सण साजरा करीत आहोत. एक स्वर्गीय माता आणि दुसरी भारत माता. आपल्या स्वर्गीय मातेप्रमाणे भारत मातेचा सन्मान करणे हे आपल्या सर्वांचे कर्तव्य आहे. हे कर्तव्य प्रामाणिकपणे पार पाडता यावे व त्यासाठी लागणारी कृपा आपणा सर्वांना लाभावी म्हणून आपण प्रार्थना करू या.

मनन चिंतन

        एकदा एका माणसाची मोठ्या जहाजाने जलप्रवास करण्याची खूप इच्छा होती. आपली ही इच्छा पूर्ण करण्यासाठी त्याने अनेक अशा जहाज कंपन्यांचा शोध केला. आणि कालांतराने आवश्यक इतके पैसे जमा झाल्यावर तो आणि त्याची बहिण हे दोघेही जलप्रवासासाठी जाणार या विचारानेच ही व्यक्ती इतकी आनंदित होती कि ती आपल्या सर्व मित्र-मैत्रिणींना त्याविषयी सांगत फिरली. जलप्रवासाला जाण्याच्या महिन्या भर अगोदर रॉयल कॅरीवियन कंपनी कडून ह्या माणसाला एक (DVD) पाठविण्यात आला. त्या (DVD) मध्ये प्रवासाचं नियोजन कस असणार आहे? ते जहाज कुठे-कुठे मुक्कामासाठी थांबणार आहे? असे सर्व काही चित्रीकरण करण्यात आले होते. ती (DVD) पाहताच ह्या माणसाचा आनंद गगनात मावेनासा झाला. (DVD) मध्ये पाहत असलेला देखावा हा इतका रमणीय होता कि तो मनमुक्त झाला. तो एकदम भारावून गेला करण त्याला माहित होते कि, काही दिवसानंतर तो ती सगळी स्थळ स्वतःहून पाहणार आहे.

किती छान संकल्पना आहे ना? ज्या स्थळांना आपण भेट देणार आसतो त्या पहिल्यांदा टीव्ही अथवा कॉम्पुटरवर पाहणे. किंवा दुसरी एखादी गोष्ट जी आपण भविष्यामध्ये करणार आहोत त्याचा आढावा आपल्याला एखाद्या (DVD) द्वारे पाहण्यास मिळाला तर किती छान वाटेल? लग्न म्हणा किंवा एखादी नवीन नोकरी म्हणा कि ज्याच्याविषयी आपल्याला पूर्ण संकल्पना असली की आपली उत्सुकता अजून वाढते.

आज मरीयेच्या स्वर्गनयनाचा सण साजरा करीत असतांना देऊळमाता आपल्याला आपल्या इष्टस्थळाची एक झलक दाखवीत आहे. आपणा सर्वांना ठाऊक आहे की, मरिया ही सदेह स्वर्गात घेतली गेली आणि आपणा सर्वांचे ध्येयही स्वर्गात जाणे हेच आहे. आपला प्रभू येशूख्रिस्त खुद्द आपल्याला शाश्वती देतो की, तो आपल्याला स्वर्गाराज्यामध्ये घेऊन जाणार परंतु त्यासाठी आपल्याला प्रभू येशूख्रिस्तामध्ये राहायला लागेल. जेव्हा आपण ख्रिस्तामध्ये आणि ख्रिस्त आपणामध्ये असेल तेव्हाच आपण खऱ्या अर्थाने स्वर्गामध्ये सामील होण्यासाठी पात्र ठरू. करण प्रभू येशू ख्रिस्त हाच आपण सर्वांच्या तारणाचा एकमेव मार्ग आहे. मरीयेचे तारण हे प्रभू ख्रिस्ताद्वारेच झाले. ज्याप्रमाणे आपणा सर्वांना प्रभू येशूख्रिस्ताने स्वर्गाराज्याचे वचन दिले आहे, अगदी त्याचप्रमाणे मरीयेला देखील देवाने वचन दिले होते. मरीयेने देवाचा शब्द तंतोतंत पाळला आणि देवावर संपूर्ण विश्वासाने आपले जीवन समर्पण केले. मरीयेच्या त्या विश्वासाचे फल म्हणजेच आज आपण साजरा करीत असलेला ‘स्वर्गनयनाचा सण’.  मरिया ही तिच्या जन्मापासून परिपूर्ण म्हणजेच तिच्या आईच्या उदरामध्ये असतांनाच देवाने तिला पापांपासून वंचित ठेवले होते. पापाचा अंत हा मृत्यूमध्ये होत असतो. आणि मरिया ही पापांपासून मुक्त असल्याकारणाने ती मृत्यूला सामोरे न जाता परमेश्वराच्या वचनाप्रमाणे सदेह स्वर्गात घेतली गेली.

आपली पहिली आई, हेवा, ही पापात पडली आणि स्वर्गाचे द्वार बंद झाले. याउलट आपल्या सर्वांची आई पवित्र मरिया हिने पापांपासून वंचित राहून आपल्यासाठी स्वर्गाचे द्वार पुन्हा एकदा उघडे केले आहे. त्यामुळेच आता देवराज्यामध्ये फक्त कुमारी माता, पोपसाहेब, धर्मगुरू- धर्मभगिनी ह्यांनाच नाही तर आपणा प्रत्येकांसाठी जागा निश्चित केली आहे. आजचा हा सोहळा साजरा करीत असतांना मरिया माता ही आपणा सर्वांना अपले जीवन हे प्रभू येशूच्या जीवनाप्रमाणे जगण्यासाठी प्रेरित करीत आहे. तसे केल्यानेच आपण खऱ्या अर्थाने स्वर्गराज्यात प्रवेश करण्यासाठी पात्र ठरू.

ज्याप्रमाणे कथेतील माणसाने जलप्रवासास जाण्यासाठी त्याच्या कित्येक महिन्याची कमाई गोळा केली. त्यासाठी त्याने कित्येक अशा गोष्ठी बलिदान केल्या होत्या. आपण स्वर्गराज्यामध्ये प्रवेश करण्यासाठी काय काय बलिदान करत आहोत? जर एखाद्या जलप्रवासास जाण्यासाठी तो माणूस इतका उत्सुक होता तर स्वर्गराज्यामध्ये जाण्यासाठी आपण किती उत्सुक व्हायला पाहिजे? आज मरीयेच्या जीवनाद्वारे प्रेरित होऊन आपणही आपले जीवन प्रभू ख्रिस्ताच्या मार्गावर चालण्यासाठी प्रयत्न करूया.        

विश्वासू लोकांच्या प्रार्थना

प्रतिसाद: पवित्र माते, आम्हासाठी विनंती कर.

१. ख्रिस्तसभेचे अधिकारी पोप महाशय, सर्व बिशप, धर्मगुरू व व्रतस्त बंधू- भगिनी, जे ख्रिस्ताच्या मळ्यात कार्य करतात त्यांची श्रद्धा बळकट व्हावी व इतरांची श्रद्धा त्यांनी बळकट करावी, म्हणून आपण मरिया मातेसह प्रभूकडे प्रार्थना करूया.

२. ज्या स्त्रिया मातृपदाची अपेक्षा आपल्या मनात बाळगून आहेत, अशांवर देवाचा आशीर्वाद यावा व त्यांना मातृपद प्राप्त व्हावे, म्हणून आपण प्रार्थना करूया.

३. सर्व क्षेत्रात काम करणाऱ्या महिलांसाठी प्रार्थना करूया. सर्व क्षेत्रात महिला आघाडीवर आहेत. खाजगी व सार्वजनिक क्षेत्रात प्रामाणिकपणे त्या कार्यरत आहेत. त्याची छळणूक होऊ नये, म्हणून पवित्र मातेच्या मध्यस्थीने परमेश्वर पित्याजवळ प्रार्थना करूया.

४. सर्व स्थानिक कार्यकर्त्यांनी शांतता व न्यायासाठी एकत्र यावे तसेच संपूर्ण जगात शांतता पसरविण्यासाठी प्रयत्न करावेत, म्हणून आपण प्रार्थना करूया.

५. आता, थोडा वेळ शांत राहून आपल्या वैयक्तिक व कौटुंबिक गरजा प्रभूचरणी  ठेऊया.

                                  

Reflection for the 19^th Sunday in Ordinary Time (08/08/2021) By Bro. Roshan Rosario

सामान्य काळातील एकोणिसावा रविवार 

 दिनांक : ०८/०८/२०२१

पहिले वाचन - १ राजे १९:४-८

दुसरे वाचन – इफिसकरांस पत्र ४:३०- ५:२

शुभवर्तमान – योहान ६:४१-५१

“स्वर्गातून उतरलेली जिवंत भाकर मीच आहे; ह्या भाकरीतून जो कोणी खाईल तो सर्वकाळ जगेल”

प्रस्तावना

आज आपण सामान्य काळातील एकोणिसावा रविवार साजरा करीत आहोत आणि आजची उपासना आपणास प्रभू येशुख्रिस्त, जिवंत भाकर, जी स्वर्गातून उतरलेली आहे, ह्यावर विश्वास ठेवण्यास सांगत आहे.

भाकर ही मानवी जीवनातील एक महत्वाचा घटक आहे. भाकर आपली भूक भागविते, आपल्याला तृप्त करते, तसेच पुढचे कार्य करण्यास प्रबळ बनवते. हेच आज आपण पहिल्या वाचनात ऐकणार आहोत. एलिया संदेष्ट्याने एका दिवसाची वाट चालून जेव्हा तो थकून झोपी गेला तेव्हा परमेश्वराने त्याला भाकर व पाणी दिले; जिच्या बळावर तो चाळीस दिवस व चाळीस रात्र चालून देवाच्या पर्वतावर म्हणजे होरेब पर्वतावर गेला.

आजच्या शुभवर्तमानामध्ये लोकांनी येशू जिवंत भाकर, जी स्वर्गातून उतरलेली आहे, ह्यावर विश्वास न ठेवता त्याच्याविषयी कुरकुर करतात व संशय धरतात. ह्यावरून येशू त्यांना उघड सांगतो कि, जो माझ्यावर विश्वास ठेवणार त्याला सार्वकालिक जीवन प्राप्त होईल करण मीच जीवन देणारी स्वर्गीय भाकर आहे, आणि ही भाकर जो कोणी खाईल तो सर्वकाळ जगेल.

प्रभू येशूख्रिस्त हा स्वर्गातून उतरलेली जिवंत भाकर आहे, ह्यावर विश्वास ठेऊन तीचा आपल्या अंतःकरणात स्वीकार करावा म्हणून आपण परमेश्वराकडे प्रार्थना करू या.

 

बोधकथा

आजच्या वाचनाविषयी मला एका गोष्टीची आठवण येते: एकदा एका व्यक्तीने एका वर्तमानपत्राच्या संपादकाला असे लिहिले की, तो गेल्या तीस वर्षापासून चर्चमध्ये जात आहे व त्याने हजारो प्रवचन ऐकले आहेत आणि त्यातले त्याला एकही  प्रवचन आठवण नाही. तर त्याला असे वाटले की चर्चमध्ये जाण्याची त्याला गरज नाही आणि आणखी उपदेश ऐकण्याची गरज नाही. ह्यावर कोणी एका व्यक्तीने त्याला उत्तर दिले की, तुझ्या लग्नास तीस वर्षांहून अधिक वर्षे झाले असतील आणि तेव्हापासून तुझ्या पत्नीने बरेच पदार्थ बनवले असतील आणि तिने सर्व बनवलेले पदार्थ तुला आठवत आहेत का? तेव्हा तो व्यक्ती त्याला नाही असे म्हणाला. ह्यावर पुन्हा प्रश्न विचारात दुसरा व्यक्ती त्याला म्हणाला, “मग तू आता तुझ्या पत्नीच्या हाताचे अन्न कधीच खाणार नाही?” त्यावर पहिली व्यक्ती म्हणाली, “परंतु त्यातून मला रोजचा आहार मिळतो.” तेव्हा दुसरी व्यक्ती त्या पहिल्या व्यक्तीला म्हणते कि, जेव्हा तू पवित्र मिस्सामध्ये प्रभूचा शब्द ऐकतोस, पवित्र भाकर स्वीकारातोस तेव्हा तुझे आध्यात्मिक पोषण होते जे तुला आध्यात्मिक जीवन जगण्यास मदत करते.

बालच्या संदेष्ट्यांशी लढाई झाल्यानंतर संदेष्टा एलीयाला प्रोत्साहन आणि पाठिंब्याच्या स्वरूपात पोषणाची गरज लागते. राजा अहाबची पत्नी ईजबेलने त्याला ठार मारण्याचा प्रयत्न केल्याने त्याचा जीव धोक्यात होता. अश्या वेळी एलीयाला एकाकीपणाचा अनुभव झाला म्हणून त्याने प्रभूकडे प्रार्थना केली कि, परमेश्वरा, मला आता मरु दे; माझ्या पूर्वजांपेक्षा माझ्यात काय बरे आहे? त्याच्या मृत्यूची वाट बघत तो झोपी गेला; परंतु परमेश्वराची प्रेमळ नजर एलीयावर होती. त्याच्या प्रेमाखातर त्याने त्याला भाकर व पाणी पुरविले.

जेव्हा आपण परमेश्वराकडे रोजची भाकर मागतो, तेव्हा आपण फक्त सामान्य भाकर किंवा शारीरिक अन्नच मागत नाही, तर आत्म्याला पोषण देणारे आध्यात्मिक अन्न मागतो. एलीयाप्रमाणेच आपण कधीकधी एखाद्या संकटात सापडतो; ती संकटे आर्थिक किंवा वैवाहिक असू शकतात. त्या क्षणी आपण आध्यात्मिक आहाराची इच्छा जोपासतो धरतो आणि ते आहार आपल्याला प्रभू येशू मिस्साबलीदानात देत असतो, जे आपल्याला संदेष्टा एलीयासारखे  जीवनात पुढे जाण्यासाठी पोषण देते.  

ह्या जगाचा निरोप घेन्यागोदर प्रभू येशूने आपल्या शिष्यांना शेवटचे भोजन दिले जिच्यात त्याने भाकरीला आशीर्वाद देऊन स्वतःचे शरीर त्यांस दिले. प्रत्येक मिस्साबलीदानात प्रभू येशू स्वतः आपणास त्याचे शरीर भाकरीच्या रुपात देतो. हे आध्यात्मिक अन्न जे खातात ते येशुबरोबर आध्यात्मिक रूपाने एक होतात. म्हणूनच गलतीकरांस पत्र २: २० मध्ये संत पौल म्हणतो, “ह्या पुढे मी जगतो असे नाही तर ख्रिस्त माझ्यामध्ये जगतो”.

ज्या प्रमाणे परमेश्वराने एलीयाला भाकर दिली, त्याच प्रमाणे प्रत्येक मिस्साबलीदानात प्रभू येशू आपल्यालाही जीवनाची भाकर देत असतो, ज्याच्याने आपल्याला एलीयासारखे सामर्थ्य व कृपा मिळते.

जसं परमेश्वराने आपणास स्वतःच शरीर देऊन आपलं तारण केलं, आपल्याला कृपा सामर्थ्य दिलं, त्याचप्रमाणे आपण ही इतरांना त्यांच्या कामात त्यांना सहाय्य करून, व त्यांना मदतीचा हात देऊन, त्यांच्या जीवनात आनंद आणावा म्हणून प्रार्थना करू या.

 

विश्वासू लोकांच्या प्रार्थना

प्रतिसाद: हे प्रभू, स्वर्गातून उतलेली जिवंत भाकर आम्हांस दे.

१. आपले परमगुरु, महागुरू, धर्मगुरू व धर्मभगिनी व व्रतस्थ ह्यांनी सर्व भाविकांची अध्यात्मिक तयारी करावी व स्वर्गीय भाकरीचा अनुभव घेण्यास मदत करावी, म्हणून आपण प्रभूकडे प्रार्थना करूया.

२. ख्रिस्त आपली जिवंत भाकर आहे, यावरील आपला विश्वास बळकट व्हावा व प्रत्येक मिस्साबलिदानामध्ये ही जिवंत भाकर खऱ्या अर्थाने सेवन करण्यास प्रभूचे सामर्थ्य लाभावे, म्हणून आपण प्रभूकडे प्रार्थना करूया.

३. आपल्या धर्मग्रामासाठी प्रार्थना करूया कि, जेणेकरून या धर्मग्रामातील प्रत्येक भाविकाला प्रभू परमेश्वराच्या प्रेमाचा अनुभव यावा व त्यांनी परमेश्वराच्या कृपेने एकत्र येऊन, एक कुटुंब म्हणून कार्य करावे, म्हणून आपण प्रभूकडे प्रार्थना करूया.

४. आपल्या धार्मिक जीवनात येशूला ओळखण्यास व त्याच्या अधिक जवळ जाण्यास सामर्थ्य लाभावे, म्हणून प्रार्थना करूया.

५. जे लोक आजार, अन्याय, यातना, हिंसा यांना बळी पडले आहेत अशा सर्वांना स्वर्गीय भाकरीद्वारे कृपेचा अनुभव यावा, म्हणून प्रभूकडे प्रार्थना करूया.

६. थोडा वेळ शांत राहून आपल्या वैयक्तिक व सामाजिक गरजासाठी प्रार्थना करूया.