Reflection for the 4^th Sunday in Ordinary Time (02/02/2025) By Br. Rohsan Nato

सामान्य काळातील चौथा रविवार

दिनांक: ०२/०२/२०२५

पहिले वाचन: मलाखी: ३: १-४

दुसरे वाचन: इब्री लोकांस पत्र २:१४-१८

शुभवर्तमान: लुक: २: २२-४० किंवा २: २२- ३२

प्रस्तावना

      आज देऊळमाता सामान्य काळातील चौथा रविवार साजरा करीत असता, प्रथमत: येशूचे देवालयात समर्पण हा सण साजरा करत आहे. तसेच आज आपण जागतिक समर्पित  हा सुद्धा दिवस साजरा करत आहे. असे हे दुहेरी उत्सव साजरा करत असताना, आजची उपासना आपणास संयम ठेवून, ख्रिस्ताच्या तारणदायी कृत्यावर विश्वास ठेवण्यास व स्वतःला येशू ख्रिस्तप्रमाणे जनहितासाठी जगण्यास आमंत्रण करीत आहे.

       आजच्या पहिल्या वाचनात, मलाखी प्रवक्ता आपणास प्रभुच्या येण्याची भविष्यवाणी करीत असताना सांगतो की, “ज्या प्रभूला तुम्ही शोधता तो एकाकी आपल्या मंदिरात येईल”.

       तसेच आजचे दुसरे वाचन, हे इब्री लोकांस पाठवलेल्या पत्रातून घेतले असून, ते आपणास येशू ख्रिस्ताच्या मानवी देहधारणेची प्रतिमा रेखाटून सांगते की “त्याला सर्व प्रकारे आपल्या बंधुसारखे होणे अगत्याचे होते.”

       तसेच आजचे शुभवर्तमान आपणास येशू बाळाच्या मंदिरात समर्पणाचे व शिमोनाच्या भविष्यवाणीचे सविस्तरपणे वर्णन करीत असता, इस्रायलच्या तारणाबद्दल व पवित्र मरियेला होणाऱ्या दुःखाबद्दल सांगत आहे.

       म्हणून, या उपासनेत भाग घेत असता, येशू ख्रिस्ताप्रमाणे जनहितासाठी जगण्यास तसेच पवित्र मरियाप्रमाणे आपल्याला भविष्यात होणाऱ्या दुःखाबद्दल खंत व्यक्त न करता, त्या सर्वाना संयमाने पुढे जाण्यास कृपा मिळावी, म्हणून प्रार्थना करूया. 

मनन चिंतन

      अर्पण, अर्पण करितो समर्पण,

       तव वेदीवर जीवन समर्पण.

       असे म्हणतात की, "आयुष्याच्या प्रत्येक क्षणी लागतो संयम बाळगावा, हार ना मानावी कधी, मार्ग जरी कठीण लागे निवडावा."

       आणि ह्याच चार ओळींचे समर्थन करून आजचे शुभवर्तमान, आपणा सर्वांना येशू ख्रिस्ताच्या भावी खडतर परिश्रमांची, पवित्र मरियेला होणाऱ्या दुःखांची आणि शिमोनाला त्याच्या वृद्धावस्थेत प्रकट झालेल्या दैवी तारणाची आठवण करून देत आहे.

       आजच्या शुभवर्तमानात सांगितले असता, मोशेच्या नियमशास्त्राप्रमाणे, बाळ येशू व मरिया ह्यांचे शुद्धीकरणाचे दिवस भरल्यावर, ते (म्हणजे मरिया आणि योसेफ) त्याला  (येशूला)  वर येरुसलेमस प्रभूला समर्पण करावयास आणले. ते अशासाठी कि, "प्रत्येक प्रथम जन्मलेला मुलगा प्रभूसाठी पवित्र म्हटला जावा." म्हणून, प्रभूच्या नियमशास्त्रात लिहिल्याप्रमाणे वा सांगितल्याप्रमाणे  होल्यांचा जोडा किंवा पारव्यांची  दोन पिल्ले ह्यांचा यज्ञ करावा. आणि ह्याच देवालयात आपण पुढे वाचतो की, सिमोन नावाचा कोणी एक नीतिमान व भक्तिमान मनुष्य येरुसलेममध्ये असून इस्त्राएलच्या तारणाची वाट पाहत होता. ज्याच्यावर पवित्र आत्मा असून असे प्रकट करण्यात आले होते कि, “प्रभूच्या ख्रिस्ताला पाहण्याअगोदर तुला मरण येणार नाही.” आणि तेव्हा त्याला आत्म्याने मंदिरात आणले व नियमशास्त्राच्या विधीप्रमाणे करण्याकरिता आई-बाप येशूला आत घेऊन आले.

       “आणि तेव्हा त्याला आत्म्याने मंदिरात आणले व नियमशास्त्राच्या विधीप्रमाणे करण्याकरिता आई-बाप येशूला आत घेऊन आले. ह्या वाक्यावर आपल्याला जुन्या करारातील मलाखी प्रवाद्याने येशूच्या येण्याचे जे भाकीत केले होते ते पूर्णहोत असता, प्रवादी आपणास सांगतो की, ज्या प्रभुला तुम्ही शोधता तो एकाकी आपल्या मंदिरात येईल.

       होय माझ्या प्रिय भाविकांनो ज्या तारणाची शिमोन संयमाने वाट बघत होता, त्याच तारणाऱ्याला आज शिमोन आपल्या हातात घेऊन  देवाचे आभार मानत सांगतो कि: "हे प्रभू, आता तू आपल्या वचनाप्रमाणे आपल्या दासाला शांतिने जाऊ दे. कारण माझ्या डोळ्यांनी तुझे तारण पाहिले आहे."

       ह्याच तारणाचा उल्लेख आपण पुढे आजच्या दुसऱ्या वाचनात, इब्री लोकांस पाठवलेल्या पत्रातून आपण ऐकतो की, "त्याला सर्व प्रकारे आपल्या बंधूसारखे होणे अगत्याचे होते, कारण मरणावर सत्ता गाजवणारा म्हणजे सैतान ह्याला मरणाने शून्यत्वास नेण्यास व मरणाला घाबरून, जे आयुष्यभर दास्याच्या बंधनात होते त्यांना मुक्त करावयास म्हणजे त्यांचे तारण करावयास तो त्यांच्यासारखा रक्तामांसाचा झाला."

       पुढे शुभवर्तमान आपणास पवित्र मारीयेच्या दुःखाची म्हणजे शिमोनाने भाकीत केले गेलेले शब्द, “आणि पाहा तुझ्या स्वतःच्या हृदयातून तलवार आरपार जाईल." ह्यांची व हन्ना नावाची प्रवक्ती ह्यांच्याबद्दल सविस्तर पणे सांगते.

       प्रिय भाविकांनो, आपणास आपले दैनंदिन जीवन जगत असता, खूप अशा गोष्टींना म्हणजेच, परिश्रमांना, अडीअडचणींना व  दुःखांना सामोरे जावे लागते. परंतु हे सर्व होत असता, आपण आपल्या जीवनात खचून न जाता, जेव्हा संयम ठेवून ख्रिस्ताच्या साहाय्याची विनवणी करतो, तेव्हा  ख्रिस्त आपल्याला आपल्या जीवनाच्या परीक्षेत सहाय्य करण्यास नेहमी पुढे सरसावत असतो. आणि हेच शब्द आपण आजच्या दुसऱ्या वाचनात सुद्धा ऐकतो कि, "ज्या अर्थी त्याने स्वतः परीक्षा होत असता दुःख भोगले, त्याअर्थी ज्यांची परीक्षा होत आहे, त्यांना सहाय्य करण्यास तो समर्थ आहे."

       आजच्या आधुनिक युगात आपण पाहतो कि, कितीतरी लोक आपल्यावर आलेल्या दु:खांना, संकटांना घाबरून हताश होतात, खंत व्यक्त करतात, तर काही आत्महत्येचा पर्याय निवडतात. परंतु आजची उपासना आपणा प्रत्येकांस पवित्र मरियेप्रमाणे संयम राखून येणाऱ्या सर्व दु:खांना प्रभू ख्रिस्ताच्या तारणदायी कृपेवर विश्वास ठेवून ताठ मानेने सामोरे जाण्यास आव्हान करीत आहे.

       तसेच आज आपण जागतिक समर्पित दिन  साजरा करत आहोत. म्हणून आजच्या दिवशी आपण सर्वांनी आपल्या व्रतस्तांसाठी, म्हणजे ज्यांनी आपले संपूर्ण जीवन, प्रभूच्या मळ्यात कार्य करण्यासाठी  समर्पित केले आहे, त्या सर्वाना प्रभूची सेवा करण्यास भरपूर अशी कृपा व आशीर्वाद मिळावा. तसेच, येशू ख्रिस्ताप्रमाणे आपल्या वाट्याला येणाऱ्या अडीअडचणींना, दुःखांना, घाबरून न जाता, संयमाने तोंड देत जनहितासाठी आपले जीवन ख्रिस्ती मुळ्याच्या आधारे समर्पित  करण्यास ख्रिस्ताची मदत मिळावी, म्हणून प्रार्थना करूया.

विश्वासू लोकांची प्रार्थना

प्रतिसाद: ““हे परमेश्वरा तुझ्या लोकांची प्रार्थना ऐक.”

१. आपले परमाचार्य पोप फ्रान्सिस, कार्डिनल्स, बिशप्स, व देऊलमातेच्या कार्यात नेतृत्व करणाऱ्या सर्व अधिकाऱ्यांनी आपल्याला दिलेल्या कार्याद्वारे व ख्रिस्ताचा आदर्श समोर ठेवून, देवाच्या प्रजेला योग्य मार्ग दाखवून, त्यांना ख्रिस्ताकडे आणण्यासाठी पवित्र आत्म्याचे मार्गदर्शन मिळावे म्हणून प्रार्थना करूया.

२. जे भाविक समाजिक, आर्थिक व शिक्षणाच्या बाबतीत परिवर्तन करण्यासाठी झटत आहेत. पर्यावरण व निसर्गाच्या सर्व हक्कासाठी जे प्रयत्नशील आहेत. अशा सर्वांना परमेश्वराचे सहकार्य लाभावे, शासनाकडून योग्य ती मदत मिळावी, सर्व लोकांमध्ये शांतता व एकात्मता निर्माण व्हावी म्हणून आपण प्रार्थना करूया.

३. आज जागतिक समर्पित दिन साजरा करत असताना व्रतस्तांसाठी, म्हणजे ज्यांनी आपले संपूर्ण जीवन, प्रभूच्या मळ्यात कार्य करण्यासाठी  समर्पित केले आहे, त्या सर्वाना प्रभूची सेवा करण्यास भरपूर अशी कृपा व आशीर्वाद मिळावा. तसेच, येशू ख्रिस्ताप्रमाणे आपल्या वाट्याला येणाऱ्या अडीअडचणींना, दुःखांना, घाबरून न जाता, संयमाने तोंड देण्यास प्रभूचे सहाय्य मिळावे. म्हणून आपण प्रार्थना करूया.

४. शिक्षक, सैनिक, शेतकरी व इतर सर्व सेवक नेत्यांना त्यांच्या कार्यात परमेश्वराने यश द्यावे त्याद्वारे देवाची, समाजाची योग्य ती प्रगती व्हावी. सर्व अडीअडचणींवर मात करण्यासाठी त्यांना पवित्र आत्म्याचे मार्गदर्शन मिळावे म्हणून आपण प्रार्थना करूया.

५. सर्व राजकीय नेत्यांनी देशाचे हित पाहून लोकांच्या कार्यासाठी व त्यांच्या विकासासाठी झटावे, त्याचप्रमाणे देशात शांतता व सुव्यवस्था नांदावी, म्हणून आपण प्रार्थना करूया.

६. थोडा वेळ शांत राहून आपल्या वैयक्तिक, कौटुंबिक, आणि सामाजिक गरजासाठी प्रार्थना करूया.

 Reflection for the 3^rd Sunday in Ordinary Time (26/01/2025) By Br. Trimbak Pardhi

सामान्य काळातील तिसरा रविवार

दिनांक: २६/०१/२०२५

पहिले वाचन: नेहेमिया ८:२-४ अ, ५-६, ८-१०

दुसरे वाचन: १ कोरींथ १२:१२-३०

शुभवर्तमान: लुक १:१-४; ४:१४-२१

प्रस्तावना

      ख्रिस्ताठायी माझ्या प्रिय बंधू आणि भगिनींनो, आज आपण सामान्य काळातील तिसरा रविवार साजरा करीत आहोत. आजची उपासना आपल्याला देवाच्या शब्दाशी खोल संबंध जोडण्याची, ख्रिस्ताच्या शरीरात एकत्र राहण्याची आणि त्याच्या मिशनमध्ये सक्रियपणे भाग घेण्याचे आमंत्रण देते.

आजच्या पहिल्या वाचनात, एज्रा लोकांना एकत्र करून त्यांना पवित्र शास्त्र वाचून दाखवतो. लोक त्या शब्दाचा अर्थ समजून घेतात आणि त्या वाचनानुसार त्यांचे जीवन बदलण्याचा प्रयत्न करतात. देवाच्या शब्दाला मानवंदना देतात.

आजच्या दुसऱ्या वाचनात, संत पौल आपल्याला ख्रिस्ताच्या देहामध्ये एकता आणि विविधतेचे महत्त्व सांगतात. ख्रिस्ती लोकांनी त्यांच्या वरदानांवर आधारित कमी किंवा जास्त महत्त्वाची भावना ठेवू नये, तर सर्वांनी एकत्रितपणे कार्य केले पाहिजे. कारण आपण सर्व एकमेकांशी जोडलेले आहोत आणि प्रत्येकाची भूमिका महत्त्वाची आहे.

आजच्या लुकलिखित शुभवर्तमानातून, आपल्याला पवित्र शास्त्राकडे आदराने जाण्यासाठी, सखोल समजून घेण्यासाठी आणि आपल्या जीवनाला आकार देण्यासाठी प्रोत्साहित केले जात आहोत. तर आजच्या मिस्साबलीदानात आपल्याला देवाच्या अभिवचनावर विश्वास ठेवून, जगाला सुवार्ता पसरविण्यास आणि त्याच्या कार्यात भाग घेण्यास प्रेरणा मिळावी म्हणून प्रार्थना करूया.

मनन चिंतन

      आजच्या उपासनेत आपल्याला दिव्य वचनाचे महत्त्व आणि त्याचे आपल्या जीवनातील स्थान दाखवले आहे. येशू ख्रिस्ताचे कार्य, चर्चमधील एकता, आणि सुसंस्कारित जीवन जगण्याचा संदेश आपल्याला दिला गेला आहे.

आजच्या पहिल्या वाचनात, नेहेमिया आणि एज्रा देवाच्या मंदिरात गोळा झालेल्या लोकांसमोर पवित्र शास्त्र वाचतात आणि त्यांना देवाच्या वचनाचे महत्त्व समजावतात. लोक देवाचे वचन प्रेमाने आणि आदराने ऐकतात. वचन ऐकल्यामुळे त्यांच्या जीवनात एक नवीन प्रेरणा आणि आशा निर्माण होते. त्यांच्या जीवनात एक नवीन पुनरुत्थान घडते.

लोक अनेक वेळा निराश होतात, परंतु देवाचे वचन त्यांच्या जीवनात बदल घडवून आणते. त्यामुळे आपल्या रोजच्या जीवनात शास्त्राचा अभ्यास करणे, प्रार्थना करणे आणि त्या वचनानुसार वागणे अत्यंत आवश्यक आहे.

आजच्या दुसऱ्या वाचनात, संत पौल आपल्याला एकतेचा संदेश देतात. ते म्हणतात की चर्च म्हणजे एक शरीर आहे, जिथे प्रत्येक सदस्याला महत्त्व आहे. प्रत्येकाची भूमिका वेगळी असली तरी, एकमेकांच्या मदतीनेच चर्च शक्तिशाली होऊ शकते. प्रत्येक व्यक्तीला खास वरदान मिळाले आहे आणि त्या वरदानाचा उपयोग दुसऱ्याच्या भल्यासाठी केला पाहिजे

संत पौल सांगतात की, काही वरदान मोठी दिसतात तर काही वरदान छोटी असू शकतात. परंतु प्रत्येक वरदानाला त्याचे स्थान आणि महत्त्व आहे. आपण एकमेकांवर अवलंबून आहोत, त्यामुळे आपण एकमेकांवर प्रेम, आदर आणि सहकार्य करणे आवश्यक आहे. कोणत्याही व्यक्तीला कमी लेखणे किंवा त्याचे योगदान छोटे मानणे हे चुकीचे आहे. कारण प्रत्येकाचे योगदान तितकेच महत्त्वाचे आहे.

आजच्या समाजात अनेक वेळा आपण विविधतेच्या विरोधात जातो आणि विविध विचारधारा, क्षमता, आणि संस्कृतीमध्ये भेदभाव करतो. पण संत पौल आपल्याला शिकवतात की ख्रिस्ताच्या शरीरात सर्व सदस्य समान आहेत.

आजच्या लुकलिखीत शुभवर्तमानातील दोन भाग आपल्याला येशूचे जीवन आणि कार्य समजून देतात. पहिल्या भागात, येशूच्या जीवनाची आणि त्याच्या कार्याची अचूक माहिती दिली आहे.
    दुसऱ्या भागात, येशू त्याच्या सार्वजनिक सेवेत प्रारंभ करतो. येशू नेहमीच एका नव्या आशेचा प्रकाश म्हणून उभा राहिला. त्याचा प्रथम उपदेश नाजरेथ येथे झाला. येशूने संप्रदायाची जागा उचलून देण्याचा आणि लोकांच्या जीवनात देवाच्या राज्याची स्थापना करण्याचा संदेश दिला. त्याचा उद्देश गरिबांना आणि दुःखी लोकांना सुसंवाद आणण्यासाठी होता.

या दोन्ही भागांतून आपल्याला समजते की, येशू केवळ एक आध्यात्मिक नेता नव्हता, तर तो समाज सुधारकही होता. त्याचे कार्य लोकांच्या जीवनात परिवर्तन घडवून आणण्यासाठी होते. त्याच्या मार्गदर्शनातून आजही आपण शांती आणि उद्धार प्राप्त करू शकतो.

उदाहरणार्थ, आपण जेव्हा अडचणीत असतो, निराश होतो किंवा एकटेपण वाटते, तेव्हा एखाद्या मित्राची मदत आपल्याला योग्य मार्ग दाखवते. त्याचप्रमाणे, येशू आपल्याला मदत करतो. त्याच्या शिकवणीतून आपल्याला जीवन सुधारण्याचा मार्ग समजतो.

येशू म्हणतो, "तू गरिबांना आशा दे, दुःखी लोकांना बरे कर, आणि कैद्यांना मुक्त कर." तो आपल्याला जीवनात समजूत, दिलासा, आणि तात्काळ मदत देणारा मार्गदर्शक ठरतो.

उदाहरणार्थ, ज्या लोकांना अंधारात प्रकाशाची गरज आहे, त्यांच्यासाठी येशू प्रकाश बनतो.

आज प्रभू येशू आपल्याला शिकवतो की, जसा मित्र आपल्याला मदत करतो, तसाच तो आपल्याला योग्य मार्ग दाखवतो, आपली दिशा समजावतो, आणि आपल्या जीवनात सुख व शांती देतो.

त्यामुळे, सत्याच्या मार्गावर चालू या. इतरांवर प्रेम, दया आणि सहकार्य करूया. तसेच, परमेश्वराच्या राज्याचा प्रचार करूया.

विश्वासू लोकांची प्रार्थना

प्रतिसाद: “हे प्रभो, आमची प्रार्थना ऐकून घे”

१) आपल्या ख्रिस्तसभेची आध्यात्मिक काळजी घेणारे आपले पोप महाशय, कार्डीनल्स, बिशप्स, धर्मगुरू-धर्मभगिनी आणि सर्व प्रापंचिक ह्या सर्वावर देवाच्या कृपेचा वर्षाव व्हावा व त्यांच्या कृतीतून देवाचे प्रेम लोकांकडे पोहचावे म्हणून आपण प्रार्थना करू या.

२) आपल्या धर्मग्रामात जे कोणी आजारी आहेत. अशा सर्व आजारी लोकांना परमेश्वरी कृपेचा स्पर्श होऊन त्यांची आजारातून सुटका व्हावी म्हणून आपण प्रार्थना करू या.

३) आज प्रजासत्ताकदिनी, आम्ही आमच्या देशातील सर्व नेत्यांना आणि नागरिकांच्या मार्गदर्शनासाठी प्रार्थना करतो. कि जेणेकरून आमच्या देशात शांती, न्याय आणि ऐक्य पसरावो, म्हणून आपण प्रार्थना करूया.

४) आज आपण आपल्या देशासाठी प्रार्थना करूया की, देशभर पसरलेली अशांतता नष्ट व्हावी व सर्वत्र शांतता व सलोखा नांदावा म्हणून आपण प्रार्थना करू या.

५) येशू ख्रिस्त आपल्या आई-वडीलांच्या आज्ञेत राहिला व त्यांना मान व सन्मान दिला. आज मुल-मुली आई-वडिलांना अपशब्द बोलतात व दु:खवितात अशा मुला-मुलींना ईश्वराचे प्रेम मिळावे, जेणेकरून ही मुल-मुली आपल्या आई-वडिलांचा आदर राखतील म्हणून आपण प्रार्थना करू या.

७) आता थोडा वेळ शांत राहून आपल्या आपल्या वैयक्तिक, कौटुंबिक व सामाजिक गरजांसाठी प्रार्थना करूया.