Reflections for the homily for Second Sunday in the Ordinary Time (18-01-2026) by Br. Saurav Patil

 सामान्य काळातील दुसरा रविवार
दिनांक: १८/०१/२०२६
पहिले वाचन:  यशया ४९: ३, ५-६
दुसरे वाचन: पौलाचे करिंथकरांस पहिले पत्र १: १-३
शुभवर्तमान: योहान १: २९-३४

प्रस्तावना

प्रिय बंधू-भगिनींनो, आज पवित्र ख्रिस्तसभा सामान्य काळातील दुसरा रविवार साजरा करत आहे. आजची वाचने आपल्याला एका अत्यंत दिलासादायक सत्याची आठवण करून देतात की, देव आपल्याला नावानिशी ओळखतो आणि त्याच्या दृष्टीने कोणाचेही जीवन सामान्य किंवा निरर्थक नाही. देव प्रत्येकाला म्हणतो, “तू माझा सेवक आहेस आणि तुझ्याद्वारे मी माझे कार्य पूर्ण करीन.” आपली खरी ओळख ही जगातील यश किंवा पदावर अवलंबून नसून, देवाने दिलेल्या बोलावण्यावर अवलंबून आहे. देवाला आज आपल्याकडून केवळ बाह्य प्रार्थनेची अपेक्षा नाही, तर एका शांत आणि ‘ऐकणाऱ्या हृदयाची’ अपेक्षा आहे. ज्याप्रमाणे योहान बाप्तिस्मा देणाऱ्याने स्वतःचे महत्त्व न वाढवता येशूला “देवाचा कोकरू” म्हणून जगाला ओळख करून दिली, त्याचप्रमाणे आपणही आपल्या साध्या जीवनातून ख्रिस्ताची साक्ष दिली पाहिजे. स्वतःचा अहंकार बाजूला सारून देवाची इच्छा पूर्ण करणे, हीच खरी उपासना आहे. तर, या पवित्र समयी आपण आपले मन एकाग्र करूया आणि देवाची हाक ऐकून त्याला “प्रभू, मी येथे आहे; मला पाठव” असे उत्तर देण्यासाठी स्वतःला तयार करूया.

मनन चिंतन

प्रिय बंधू-भगिनींनो, आजच्या पवित्र मिस्सामधील सर्व वाचने आपल्याला एक खोल आणि अर्थपूर्ण सत्य शिकवतात: देव प्रत्येक माणसाला ओळखतो, त्याला नावानिशी बोलावतो आणि त्याच्या जीवनातून आपले कार्य पूर्ण करतो. आपण अनेकदा आपल्या जीवनाकडे सामान्य, निरुपयोगी किंवा दिशाहीन म्हणून पाहतो; पण आजचे पहिले वाचन आपल्याला ठामपणे सांगते की, देवाच्या दृष्टीने कोणतेही जीवन निरर्थक नाही. यशया संदेष्टा देवाचे शब्द सांगतो की, “तू माझा सेवक आहेस; तुझ्यामध्ये मी माझे वैभव प्रकट करीन.” म्हणजेच, देव आपल्याला केवळ स्वतःसाठी नाही, तर इतरांसाठी प्रकाश होण्यासाठी बोलावतो. देवाची योजना आपल्या मर्यादेपेक्षा मोठी आहे. ती फक्त एका राष्ट्रापुरती तर नसून संपूर्ण जगासाठी आहे.

या पार्श्वभूमीवर आजचे स्तोत्र आपल्याला योग्य वृत्ती शिकवते. स्तोत्रकर्ते म्हणतात की, त्यांनी परमेश्वरावर पूर्ण विश्वास ठेवला आणि परमेश्वराने त्यांचे ऐकले. देवाला केवळ बाह्य धार्मिक कृती, बलिदान किंवा शब्दांची प्रार्थना अपेक्षित नाही; तर त्याला आपल्या ऐकणाऱ्या, नम्र आणि आज्ञाधारक हृदयाची अपेक्षा आहे. आपण अनेकदा देवासाठी बरेच काही करतो, पण देवाशी शांतपणे बसून त्याचे ऐकायला वेळ काढत नाही. देवाची इच्छा समजून घेणे आणि त्यानुसार जीवन जगणे हीच खरी उपासना आहे, हे स्तोत्र आपल्याला शिकवते.

दुसऱ्या वाचनात संत पौल आपली ओळख करून देतो. तो स्वतःला मोठा शिक्षक, विद्वान किंवा नेता म्हणून सादर करत नाही; तर “देवाच्या इच्छेने ख्रिस्त येशूचा प्रेषित” असे म्हणतो. यामधून आपल्याला हे समजते की, खऱ्या अर्थाने आपली ओळख ही आपल्या पदावर, यशावर किंवा लोकांच्या मतावर आधारित नसते, तर देवाने आपल्याला दिलेल्या बोलावण्यावर आधारित असते. आजचे जग आपल्याला सतत विचारते: तू कोण आहेस, काय कमावतोस, तुझी ओळख काय? पण आजचे वचन आपल्याला आठवण करून देते की, सर्वात महत्त्वाचा प्रश्न हा आहे: देवाच्या नजरेत मी कोण आहे?

आजच्या शुभवर्तमानामध्ये योहान बाप्तिस्मा देणारा आपल्यासमोर एक सुंदर उदाहरण ठेवतो. तो येशूला पाहून स्पष्टपणे सांगतो, “हा देवाचा कोकरू आहे, जो जगाचे पाप दूर करतो.” योहान स्वतःकडे लोकांचे लक्ष वेधून घेत नाही, तर संपूर्ण लक्ष येशूकडे वळवतो. त्याचे जीवन हे साक्ष देण्याचे जीवन होते. त्याने येशूला ओळखले, पवित्र आत्म्याच्या प्रकाशात त्याच्यावर विश्वास ठेवला आणि इतरांनाही त्याच्याकडे नेले. हेच प्रत्येक ख्रिस्ती व्यक्तीचे खरे कार्य आहे: स्वतः मोठे होणे नव्हे, तर ख्रिस्ताला मोठे करणे.

प्रिय बंधू-भगिनींनो, आजचे वचन आपल्याला विचार करण्यास प्रवृत्त करते की, आपण आपल्या जीवनातून काय प्रकट करतो. आपण आपल्या शब्दांतून, कृतींतून आणि वृत्तीतून ख्रिस्ताकडे निर्देश करतो का, की स्वतःच्या स्वार्थाकडे? देवाने आपल्याला ज्या ठिकाणी ठेवले आहे: घरात, शाळेत, कामाच्या ठिकाणी, समाजात, तेथेच आपल्याला त्याचे साक्षीदार व्हायचे आहे. मोठी भाषणे किंवा असामान्य कार्ये नव्हे, तर साधे, प्रामाणिक आणि प्रेमळ जीवन हेच देवाचे तेज प्रकट करते.

म्हणून आज आपण देवाकडे हीच कृपा मागूया की, आपण त्याचा आवाज ऐकू शकू, त्याच्या बोलावण्याला होकार देऊ शकू आणि आपल्या संपूर्ण जीवनातून म्हणू शकू: “प्रभू, मी येथे आहे; मला पाठव.” आपले जीवन हे स्वतःसाठी नसून देवासाठी आणि इतरांसाठी एक आशीर्वाद ठरो. आमेन.

विश्वासू लोकांच्या प्रार्थना:

प्रतिसाद: ‘हे परमेश्वराच्या पवित्र कोकरा, आमची प्रार्थना ऐक’.

१) आपले परमगुरुस्वामी, महागुरुस्वामी आणि ख्रिस्तसभेच्या सर्व धार्मिक पुढार्यांनी सर्व ख्रिस्ती भाविकांना श्रद्धामय, प्रेममय आणि करुणामय जीवन जगण्यासाठी आणि ख्रिस्ती ऐक्याने बांधले जाण्यासाठी मदत आणि प्रेरणा द्यावी आणि त्यांच्या या पवित्र कार्यात त्यांना परमेश्वरी सहाय्य लाभावे म्हणून प्रार्थना करू या.

२) ख्रिस्तावरील विश्वासामुळे छळ, त्रास आणि अपमान सहन करावा लागणाऱ्या सर्व लोकांनी न भिता आणि अढळ श्रद्धेच्या बळावर आपले ख्रिस्ती जीवन जगण्यास परमेश्वराकडून कृपा आणि सामर्थ्य मिळावे म्हणून आपण प्रार्थना करू या.

३) सर्व आजारी, दुर्बल लोकांना परमेश्वराने आपल्या कृपेचा स्पर्श करून त्यांना नवजीवन द्यावे तसेच आत्म्याचे व शरीराचे चांगले स्वास्थ्य लाभावे म्हणून आपण प्रार्थना करू या.

४) आपल्या कुटुंबातील आणि आपल्या धर्मग्रामातील सर्व मृत व्यक्तींना दयाळू परमेश्वराने त्याच्या स्वर्गीय नंदनवनात चिरंतर शांती द्यावी म्हणून आपण प्रार्थना करू या.

५) आपण आपल्या वैयक्तिक, सामाजिक व कौटुंबिक गरजांसाठी प्रार्थना करू या.